ନୂଆଦିଲ୍ଲୀ, ୨୯।୯: ଆଇପିଏଲ୍ ତ୍ରୟୋଦଶ ସଂସ୍କରଣ ପ୍ରାରମ୍ଭିକ ପର୍ଯ୍ୟାୟ ମୁକାବିଲାଗୁଡ଼ିକ ବେଶ୍ ରୋମାଞ୍ଚକ ରହିଛି। ଆଇପିଏଲ୍ର ପ୍ରଥମ ୧୦ ଦିନ ମଧ୍ୟରେ ପ୍ରଶଂସକ ୨ଟି ସୁପର୍ ଓଭର ଦେଖିବାର ସୁଯୋଗ ପାଇଛନ୍ତି। ଆଇପିଏଲ୍-୧୩ର ପ୍ରଥମ ସୁପର୍ ଓଭର୍ ସେପ୍ଟେମ୍ବର ୨୦ରେ ଦେଖିବାକୁ ମିଳିଥିଲା। ଦିଲ୍ଲୀ କ୍ୟାପିଟାଲ୍ସ ଓ କିଙ୍ଗ୍ସ ଇଲେଭେନ ପଞ୍ଜାବ ମଧ୍ୟରେ ଖେଳାଯାଇଥିବା ମ୍ୟାଚ୍ ଟାଇ ରହିଥିଲା। ପ୍ରଥମେ ବ୍ୟାଟିଂ କରି ଦିଲ୍ଲୀ ୧୫୭ ରନ କରିଥିବାବେଳେ ପଞ୍ଜାବ ମଧ୍ୟ ସମାନ ସଂଖ୍ୟକ ସ୍କୋର କରିଥିଲା। ଏହାପରେ ସୁପର୍ ଓଭରରେ ପଞ୍ଜାବ ପକ୍ଷରୁ ଧାର୍ଯ୍ୟ ୩ ରନର ସହଜସାଧ୍ୟ ଟାର୍ଗେଟ୍କୁ ଦିଲ୍ଲୀ ହାସଲ କରିନେଇଥିଲା। ସେହିଭଳି ସୋମବାର ରୟାଲ ଚ୍ୟାଲେଞ୍ଜର୍ସ ବାଙ୍ଗାଲୋର ଓ ମୁମ୍ବାଇ ଇଣ୍ଡିଆନ୍ସ ମଧ୍ୟରେ ଅନୁଷ୍ଠିତ ଚଳିତ ଆଇପିଏଲ୍ର ୧୦ମ ମୁକାବିଲା ମଧ୍ୟ ଟାଇ ରହିଥିଲା। ପ୍ରଥମେ ବ୍ୟାଟିଂ କରି ବାଙ୍ଗାଲୋର ୨୦୧ ରନ କରିଥିବାବେଳେ ମୁମ୍ବାଇ (୨୦୧/୫) ମଧ୍ୟ ସମାନ ସଂଖ୍ୟକ ସ୍କୋର କରିଥିଲା। ଫଳରେ ସୁପର୍ ଓଭରର ସହାୟତା ନିଆଯାଇଥିଲା। ଯେଉଁଥିରେ ବାଙ୍ଗାଲୋର ବିଜୟ ଲାଭ କରିଥିଲା।
ଯଦି ସୁପର୍ ଓଭର ଟାଇ ରୁହେ ତେବେ କ’ଣ ହେବ? ଯଦି କୌଣସି ସୁପର୍ ଓଭର ଟାଇରେ ସମାପ୍ତ ହୁଏ ତେବେ ଫଳାଫଳ ନ ମିଳିବା ପର୍ଯ୍ୟନ୍ତ ଆଉ ଏକ ସୁପର୍ ଓଭର ଖେଳାଯିବ। ଯେପର୍ଯ୍ୟନ୍ତ ଗୋଟିଏ ଦଳ ଅନ୍ୟ ଦଳ ଅପେକ୍ଷା ଅଧିକ ରନ୍ ସଂଗ୍ରହ ନ କରିଛି ସେ ପର୍ଯ୍ୟନ୍ତ ଅସୀମିତ ସଂଖ୍ୟକ ସୁପର୍ ଓଭର ଅନୁଷ୍ଠିତ ହେବ। ଏଠାରେ ଉଲ୍ଲେଖଯୋଗ୍ୟ, ବହୁ ବିତର୍କିତ ‘ବାଉଣ୍ଡରୀ ଗଣନା ନିୟମ’କୁ କ୍ରିକେଟ୍ର ସର୍ବୋଚ୍ଚ ସଂସ୍ଥା ଆଇସିସି ଉଠାଇ ଦେଇଥିବାରୁ ବିସିସିଆଇ ମଧ୍ୟ ଆଇପିଏଲ୍ରେ ଏହାକୁ ଲାଗୁ କରିଛି। ତେଣୁ ସୁପର୍ ଓଭର ଟାଇ ରହିଲେ ‘ବାଉଣ୍ଡରୀ ଗଣନା ନିୟମ’ ଏଠାରେ ଲାଗୁ ହେବ ନାହିଁ। ଫଳରେ ଫଳାଫଳ ପାଇଁ ଆଉ ଏକ ସୁପର୍ ଓଭରର ସହାୟତା ନିଆଯିବ।
