ଭୁବନେଶ୍ୱର,୭।୧୦(ବ୍ୟୁରୋ): ଓଡ଼ିଶା ସିଭିଲ ସର୍ଭିସ-୨୦୨୦ (ଓଏଏସ୍) ପରୀକ୍ଷା ଫଳ ଶୁକ୍ରବାର ପ୍ରକାଶ ପାଇଛି। ତେବେ ପ୍ରଥମ ଚେଷ୍ଟାରେ ଟପ୍ପର ହୋଇଥିବା ତେଜସ୍ବିନୀ ବେହେରା କହିଛନ୍ତି, ପରୀକ୍ଷାରେ ପ୍ରଥମ ହେବି ବୋଲି କେବେ ଭାବି ନ ଥିଲି। କିନ୍ତୁ ଲିଷ୍ଟରେ ନାଁ ରହିବ ନିଶ୍ଚିତ ଥିଲି। ଅର୍ଥନୀତି ଏବଂ ଗୃହ ବିଜ୍ଞାନ ଅପ୍ସନାଲ ରଖିଥିଲି। ଜେଏନ୍ୟୁରେ ଅର୍ଥନୀତିରେ ପିଜି କରିବା ଦିନରୁ ପ୍ରସ୍ତୁତି ଚଳାଇଥିଲି। ପ୍ରସ୍ତୁତି ପାଇଁ ଜେଏନ୍ୟୁ ଭଲ ପରିବେଶ ଦେଇଥିଲା। ସାକ୍ଷାତକାର ପରୀକ୍ଷା ମାତ୍ର ୧୫ ମିନିଟ ଥିବାରୁ ଟିକେ ଆଶଙ୍କା ଥିଲା। ଏଥିରେ ଅର୍ଥନୀତି ଓ ରାଜନୀତି ବିଷୟରେ ପ୍ରଶ୍ନ ଥିଲା ବୋଲି ଟପ୍ପର ତେଜସ୍ବିନୀ କହିଛନ୍ତି।
ସେହିପରି ଦ୍ୱିତୀୟ ସ୍ଥାନ ଅଧିକାର କରିଥିବା ଶୁଭଙ୍କରୀ ସୁଦେଷ୍ଣା ଦାଶ କହିଛନ୍ତି, ଦ୍ୱିତୀୟ ପ୍ରୟାସରେ ସଫଳତା ପାଇଛି। ୨୦୧୯ ମସିହାରେ ପ୍ରଥମେ ଓଏଏସ୍ ଦେଇଥିଲି। କିନ୍ତୁ ପ୍ରିଲିମ୍ରୁ କଟିଯାଇଥିଲି। ପ୍ରାଣୀ ଚିକିତ୍ସକ ଚାକିରି କରିଥିଲି। ଓଏଏସ୍ ପାଇଁ ଚାକିରି ଛାଡ଼ିଲି। ଜୁଲୋଜି ଓ ଭେଟେରିନାରି ଅପ୍ସନାଲ ରଖିଥିଲି। ୨ୟ ଥର ବେଳକୁ କୋଚିଂ ନେଲି। ଜଣେ ଭଲ ମେଣ୍ଟର ମଧ୍ୟ ମିଳିଲେ।
ଅନ୍ୟପକ୍ଷେ ପରୀକ୍ଷାରେ ତୃତୀୟ ଟପ୍ପର ଅନନ୍ୟା ସୃଷ୍ଟି ଶତପଥୀ କହିଛନ୍ତି, ରେଜଲ୍ଟ ଭଲ ହେବବୋଲି ନିଶ୍ଚିତ ଥିଲି। ମାତ୍ର ୩ୟ ହେବି ବୋଲି ଭାବି ନଥିଲି। ଏହା ମୋର ପ୍ରଥମ ଚେଷ୍ଟା ଥିଲା। ସମାଜ ବିଜ୍ଞାନ, ଗୃହ ବିଜ୍ଞାନ ଅପ୍ସନାଲ ଥିଲା। ବୁର୍ଲାରୁ ଇଂଜିନିୟରିଂ ପରେ ଏବେ ମୁଁ ପିଏଚ୍ଡି କରୁଛି। ସୋସିଆଲ ମିଡିଆରୁ ଯଥେଷ୍ଟ ଦୂରରେ ରହୁଥିଲି। ଫେସବୁକ ନଥିଲା। ରିଲାକ୍ସ ପାଇଁ କେବଳ ଗଜଲ ଶୁଣେ।
