ମାଞ୍ଚେଷ୍ଟର, ୨୪।୭: ଘରୋଇ ଇଂଲଣ୍ଡ ଓ ଓ୍ବେଷ୍ଟଇଣ୍ଡିଜ ମଧ୍ୟରେ ସ୍ଥାନୀୟ ଓଲ୍ଡ ଟ୍ରାଫୋର୍ଡ ଗ୍ରାଉଣ୍ଡରେ ଶୁକ୍ରବାରଠାରୁ ନିର୍ଣ୍ଣାୟକ ୩ୟ ଟେଷ୍ଟ ମ୍ୟାଚ୍ ଆରମ୍ଭ ହୋଇଛି। ଏହି ମ୍ୟାଚ୍ରେ ଭ୍ରମଣକାରୀ ଓ୍ବେଷ୍ଟଇଣ୍ଡିଜ ଅଧିନାୟକ ଜାସନ ହୋଲ୍ଡର ଟସ୍ ଜିତି ପ୍ରଥମେ ବୋଲିଂ କରିବାକୁ ନିଷ୍ପତ୍ତି ନେଇଛନ୍ତି। ପ୍ରଥମ ମ୍ୟାଚ୍କୁ ଓ୍ବେଷ୍ଟଇଣ୍ଡିଜ ଓ ୨ୟ ଟେଷ୍ଟକୁ ଘରୋଇ ଦଳ ଜିତିଥିବାରୁ ୩ ମ୍ୟାଚ୍ବିଶିଷ୍ଟ ସିରିଜ ବର୍ତ୍ତମାନ ୧-୧ସ୍ଥିତିରେ ବରାବର୍ ରହିଛି। ତେଣୁ ଓ୍ବେଷ୍ଟଇଣ୍ଡିଜ ଅଧିନାୟକ ହୋଲ୍ଡରଙ୍କ ନିକଟରେ ସିିରିଜ୍ କବ୍ଜା କରିବାର ଏକ ସୁବର୍ଣ୍ଣ ସୁଯୋଗ ରହିଛି। ଯଦି ଓ୍ବେଷ୍ଟଇଣ୍ଡିଜ ଏହି ମ୍ୟାଚ୍ ଜିତିନିଏ ତେବେ ଦୀର୍ଘ ୩୨ ବର୍ଷର ବ୍ୟବଧାନ ପରେ ଇଂଲଣ୍ଡ ମାଟିରେ ଟେଷ୍ଟ ସିରିଜ ଜିତି ଇତିହାସ ରଚିବ। ଶେଷଥର ପାଇଁ ଓ୍ବେଷ୍ଟଇଣ୍ଡିଜ ୧୯୮୮ରେ ଇଂଲଣ୍ଡକୁ ଘରୋଇ ପରିବେଶରେ ଟେଷ୍ଟ ସିରିଜରେ ହରାଇଥିଲା। ଏହି ମ୍ୟାଚ୍ ଜିତିବା ଲାଗି ଓ୍ବେଷ୍ଟଇଣ୍ଡିଜ କିଛି ସ୍ବତନ୍ତ୍ର ରଣନୀତି ସହ ପଡ଼ିଆକୁ ଓହ୍ଲାଇଛି। ଶେଷ ମୁହୂର୍ତ୍ତରେ ଅଧିନାୟକ ହୋଲ୍ଡର ଅଫ୍ସ୍ପିନର ତଥା ୧୪୦ କିଲୋ ଓଜନ ବିଶିଷ୍ଟ ରାଖିମ କର୍ନଓ୍ବାଲ୍ଙ୍କୁ ଦଳରେ ସାମିଲ କରିଛନ୍ତି। ଅଲ୍ଜାରୀ ଜୋସେଫ୍ଙ୍କ ସ୍ଥାନରେ କର୍ନଓ୍ବାଲ୍ଙ୍କୁ ଦଳରେ ନିଆଯାଇଥିବା ଜଣାପଡ଼ିଛି। ଡାହାଣହାତୀ ଅଫ୍ସ୍ପିନର କର୍ନଓ୍ବାଲ ଗତ ବର୍ଷ ଭାରତ ବିପକ୍ଷରେ ଖେଳି ଅନ୍ତର୍ଜାତୀୟ କ୍ୟାରିୟର ଆରମ୍ଭ କରିଥିଲେ। ଅନ୍ତର୍ଜତୀୟ କ୍ରିକେଟ୍ରେ ସେ ବର୍ତ୍ତମାନ ସବୁଠାରୁ ଅଧିକ ଓଜନ ଖେଳାଳିର ମାନ୍ୟତା ପାଇଛନ୍ତି।
