ଅନେକ ସମୟରେ ତାଙ୍କ ବିବୃତ୍ତି ଯୋଗୁ ବିବାଦରେ ରହୁଥିବା ୱେଷ୍ଟଇଣ୍ଡିଜର ବିସ୍ଫୋରକ ବ୍ୟାଟ୍ସମ୍ୟାନ ମାର୍ଲନ ସାମୁଏଲ୍ସ କ୍ରିକେଟର ସମସ୍ତ ଫର୍ମାଟ ଅବସର ନେଇଛନ୍ତି। ୱେଷ୍ଟଇଣ୍ଡିଜ କ୍ରିକେଟ ମୁଖ୍ୟ କାର୍ଯ୍ୟନିର୍ବାହୀ ଜନି ଗ୍ରେଭ ସାମୁଏଲ୍ସଙ୍କ ଅବସର ବିଷୟରେ ସୂଚନା ଦେଇଛନ୍ତି। ଅନ୍ତର୍ଜାତୀୟ କ୍ୟାରିୟର ବିଷୟରେ କହିବାକୁ ଗଲେ ସେ ୭୧ଟି ଟେଷ୍ଟରେ ହାରାହାରି ୩୨.୬୪ରେ ୩ ହଜାର ୯୧୭ ରନ ସଂଗ୍ରହ କରିଥିଲେ, ସେଥିରେ ସେ ୭ଟି ଶତକ ଏବଂ ୨୪ ଅର୍ଦ୍ଧଶତକ ହାସଲ କରିଥିଲେ। ଏଥିସହିତ ୨୦୭ଟି ଏକଦିବସୀୟରେ ସେ ହାରାହାରି ୩୨.୦୭ ରେ ୫ ହଜାର ୬୦୬ ରନ ସ୍କୋର କରିଥିଲେ। ଏକଦିବସୀୟ କ୍ରିକେଟରେ ସେ ୧୦ ଶତକ ଏବଂ ୩୦ ଅର୍ଦ୍ଧଶତକ ହାସଲ କରିଛନ୍ତି। ସେ ୬୭ଟି ଟି -୨୯ ମ୍ୟାଚରେ ହାରାହାରି ୨୯.୨୯ ରେ ୧ ଟି ଅର୍ଦ୍ଧଶତକ ହାସଲ କରି ୧୬୧୧ ରନ ସଂଗ୍ରହ କରିଥିଲେ। ସେ ୪୧ଟି ଟେଷ୍ଟ, ୮୯ଟି ଏକଦିବସୀୟ ଏବଂ ୨୨ ଟି -୨୦ ଉଇକେଟ ମଧ୍ୟ ରେକର୍ଡ କରିଛନ୍ତି। ସାମୁଏଲ୍ସ ୨୧ବର୍ଷ ବୟସରେ ଭାରତ ବିପକ୍ଷରେ ପ୍ରଥମ ଟେଷ୍ଟ ଶତକ ହାସଲ କରିଥିଲେ। ସାମୁଏଲ୍ସ ଯୋଗୁ ୱେଷ୍ଟଇଣ୍ଡିଜ ଦୁଇଥର ଟି -୨୦ ବିଶ୍ୱ ଚାମ୍ପିଅନ ହୋଇଥିଲା। କାରଣ ଉଭୟ ବିଶ୍ୱକପ୍ରେ ଦଳ ପାଇଁ ସାମୁଏଲ୍ସ ସର୍ବାଧିକ ରନ ସଂଗ୍ରହ କରିଥିଲେ। କିଛି ଦିନ ପୂର୍ବରୁ ସାମୁଏଲ୍ସ କ୍ରିକେଟର ସ୍ତ୍ରୀଙ୍କ ଉପରେ ହୋଇଥିବା ଅଶ୍ଳୀଳ ମନ୍ତବ୍ୟ ଦେଇ ଚର୍ଚ୍ଚାକୁ ଆସିଥିଲେ। ସେ ଇଂଲଣ୍ଡ କ୍ରିକେଟରଙ୍କ ସ୍ତ୍ରୀ ଏବଂ ବିଶେଷକରି ବେନ ଷ୍ଟୋକ୍ସଙ୍କ ସ୍ତ୍ରୀଙ୍କ ବିଷୟରେ ଅଶ୍ଳୀଳ ମନ୍ତବ୍ୟ ଦେଇଥିଲେ।
