ବେଲପାହାଡ଼,୨୮ା୪(ଡି.ଏନ୍.ଏ.): ଝାରସୁଗୁଡ଼ା ଜିଲା ବନହରପାଲି ଥାନା ଅଧୀନ ଓପିଜିସି ପମ୍ପ୍ହାଉସ ରିଜର୍ଭୟରରେ ବୁଡ଼ିଯାଇ ଶୁକ୍ରବାର ଜଣେ ବ୍ୟକ୍ତିଙ୍କ ମୃତ୍ୟୁ ଘଟିଛି। ମୃତକ ହେଲେ ବନହରପାଲି ପମ୍ପ୍ହାଉସ ପଡ଼ାର ବାସିଲ ଡୁଙ୍ଗ୍ଡୁଙ୍ଗ୍ (୫୫)।
ମିଳିଥିବା ସୂଚନା ମୁତାବକ, ବାସିଲ ଓପିଜିସି ରିଜର୍ଭୟରରୁ ମାଛ ଧରି ପରିବାର ପ୍ରତିପୋଷଣ କରୁଥିଲେ। ସେ ସବୁଦିନ ପରି ଶୁକ୍ରବାର ରିଜର୍ଭୟରରେ ମାଛ ଧରିବାକୁ ଏକ ମୋଟର ଟ୍ୟୁବ୍ ସହାୟତାରେ ପାଣିକୁ ପଶି ଜାଲ ବିଛାଇଥିଲେ। ପରେ ସେ ଟ୍ୟୁବ୍ ସହାୟତାରେ କୂଳକୁ ଫେରୁଥିଳେ। ସେତିକି ବେଳେ ବ୍ୟୁଟ୍ ଓଲଟି ପଡ଼ିଥିଲା। ଫଳରେ ବାସିଲ ପାଣିରେ ବୁଡ଼ିଯାଇଥିଲେ। ସ୍ଥାନୀୟ ଲୋକେ ଘଟଣା ସମ୍ପର୍କରେ ବନହରପାଲି ପୋଲିସକୁ ଖବର ଦେଇଥିଲେ। ପୋଲିସ ଘଟଣାସ୍ଥଳରେ ପହଞ୍ଚି ଅଗ୍ନିଶମ କର୍ମଚାରୀଙ୍କ ସହାୟତାରେ ମୃତଦେହ ଉଦ୍ଧାର କରିଥିଲା। ଏନେଇ ପୋଲିସ ଏକ ଅପମୃତ୍ୟୁ ମାମଲା ରୁଜୁ କରି ମୃତଦେହ ବ୍ୟବଚ୍ଛେଦ ପରେ ପରିବାର ଲୋକଙ୍କୁ ହସ୍ତାନ୍ତର କରିଛି। ଅନ୍ୟପକ୍ଷେ ମୃତକଙ୍କ ପରିବାର ଲୋକଙ୍କୁ ସରକାରୀ ସହାୟତା ଯୋଗାଇଦେବାକୁ ସାଧରଣରେ ଦାବି ହୋଇଛି।
