ରସୁଲପୁର,୧୨।୪(ଡି.ଏନ.ଏ.): ରସୁଲପୁର ବ୍ଲକ ଅନ୍ତର୍ଗତ ପ୍ରଥମାଖଣ୍ଡି ପଞ୍ଚାୟତ ଗୋପାଳପୁର ଗ୍ରାମର ବୁଣାକାରଙ୍କୁ ସମବାୟ ବିଭାଗ ପକ୍ଷରୁ ଋଣ ପ୍ରଦାନ କରିବାକୁ ନେଇ ଏକ ବୈଠକ ସମିତି ସଭାପତି ନରେଶ ମହାନ୍ତିଙ୍କ ଅଧ୍ୟକ୍ଷତାରେ ଅନୁଷ୍ଠିତ ହୋଇଯାଇଛି। କୃଷି ଓ କୃଷକ, ବୁଣାକାର, ଶିଳ୍ପୀ, କାରିଗରଙ୍କ ବିକାଶ ପାଇଁ ଉଦ୍ଦିଷ୍ଟ ବଳରାମ ଯୋଜନା ଜରିଆରେ ବୁଣାକାରଙ୍କୁ ବିନା ସୁଧରେ ଋଣ ପ୍ରଦାନ କରାଯିବ। ଉକ୍ତ ଋଣର ସୁବିଧା ତନ୍ତଶାଳାଧାରୀମାନେ ପାଇପାରିବେ। ଜଣେ ତନ୍ତଶାଳାଧାରୀଙ୍କୁ ସର୍ବାଧିକ ୫୦ ହଜାର ଟଙ୍କା ପର୍ଯ୍ୟନ୍ତ ବିନା ସୁଧରେ ଋଣ ପ୍ରଦାନ କରାଯିବ। ଋଣ ଗ୍ରହିତା କିସ୍ତି ଜରିଆରେ ଋଣ ପରିଶୋଧ କରିବାକୁ ସୁଯୋଗ ଦିଆଯିବ। ନିର୍ଦ୍ଧାରିତ ଅବଧି ମଧ୍ୟରେ ଋଣ ପରିଶୋଧ କରିବାରେ ବିଫଳ ହେଲେ ସଂପୃକ୍ତ ବୁଣାକାରଙ୍କୁ ଆଗକୁ ଋଣ ପ୍ରଦାନ କରାଯିବ ନାହିଁ ବୋଲି ବୈଠକରୁ ସୂଚନା ମିଳିଛି।
ତେବେ ଋଣ ପ୍ରଦାନକୁ ନେଇ ସମବାୟ ବିଭାଗ ପକ୍ଷରୁ ଜାରି କରାଯାଇଥିବା ନିୟମ ଋଣ ପ୍ରଦାନରେ ବାଧକ ସାଜୁଛି। ଉକ୍ତ ନିୟମକୁ ସରଳୀକରଣ କରିବାକୁ ବୁଣାକାରମାନେ ଦାବି କରିଛନ୍ତି। ନିୟମ ଅନୁସାରେ ଗୋଟିଏ ପରିବାରର ଜଣେ ତନ୍ତଶାଳାଧାରୀଙ୍କୁ ଋଣ ପ୍ରଦାନ କରାଯିବ। ଋଣ ଗ୍ରହଣ କରିବାକୁ ବୁଣାକାର ପ୍ରାଥମିକ କୃଷି ସମବାୟ ସମିତି(ପାକ୍ସ) ଜରିଆରେ ଆବେଦନ କରିବେ। ଉକ୍ତ ଆବେଦନପତ୍ରକୁ ସମିତି ପକ୍ଷରୁ ଯାଞ୍ଚ କରାଯାଇ ଋଣଗ୍ରହିତାଙ୍କୁ ଚୟନ କରାଯିବ। ଯେଉଁମାନେ ଯୋଗ୍ୟ ବିବେଚିତ ହେବେ ସେମାନଙ୍କୁ ବିଭିନ୍ନ ବ୍ୟାଙ୍କରୁ ନୋଡିୟୁଜ ସାର୍ଟିଫିକେଟ ହାସଲ କରିବାକୁ ପଡ଼ିବ। ଏହିଭଳି କେତେକ ନିୟମରେ କୋହଳ କରିବାକୁ କହୁଯାଉଛି। ଏହାଛଡ଼ା ଗୋଟିଏ ପରିବାରରେ ଏକାଧିକ ବୁଣାକାର ଅଛନ୍ତି। ପ୍ରତ୍ୟେକଙ୍କ ଗୋଟିଏ ଲେଖାଏ ତନ୍ତଶାଳ ରହିଛି। ଏହିକ୍ଷେତ୍ରରେ ଜଣେ ବୁଣାକାରଙ୍କୁ ଋଣ ପ୍ରଦାନରେ ଅଗ୍ରାଧିକାର ପ୍ରଦାନ କରିବା ଭଳି ନିୟମରେ ଏକାଧିକ ପରିବାର ଋଣ ଗ୍ରହଣ କରିବାରୁ ବଞ୍ଚତ୍ତ ହେବେ। କେନ୍ଦ୍ର ସରକାରଙ୍କ ପକ୍ଷରୁ ମୁଦ୍ରା ଋଣ ଅତି ସରଳ ନିୟମ ଆଧାରରେ ବ୍ୟାଙ୍କ ପକ୍ଷରୁ ପ୍ରଦାନ କରାଯାଉଛି। ତେବେ ସମବାୟ ଋଣ ପ୍ରଦାନର ନିୟମରେ ସରଳୀକରଣ କରାଯାଉ ବୋଲି ବୈଠକ ଜରିଆରେ ଦାବି କରାଯାଇଛି। ବୈଠକରେ କଟକ କେନ୍ଦ୍ର ସମବାୟ ବ୍ୟାଙ୍କର କୁଆଖିଆ ଶାଖା ପରିଚାଳକ ନିହାର ରଞ୍ଜନ ସ୍ବାଇଁ ଯୋଗଦେଇ ଋଣ ପ୍ରଦାନର ବିଭିନ୍ନ ଦିଗ ସମ୍ପର୍କରେ ମତ ଦେଇଥିଲେ। ବୁଣାକାର ନେତା ରମେଶ ଚନ୍ଦ୍ର ଦାସ, ମକରଧ୍ୱଜ ଗୁଇଁ, ନରେନ୍ଦ୍ର ବେହେରା ଓ ଅଶୋକ ଗୁଇଁ ପ୍ରମୁଖଙ୍କ ସମେତ ୨୦ରୁ ଊର୍ଦ୍ଧ୍ୱ ବୁଣାକାର ବୈଠକରେ ସାମିଲ ହୋଇଥିଲେ। ସମିତିର ସମ୍ପାଦକ ପ୍ରଶାନ୍ତ ସାହାଣୀ ପ୍ରାରମ୍ଭିକ ସୂଚନା ପ୍ରଦାନ କରିବା ସହ ଧନ୍ୟବାଦ ଦେଇଥିଲେ।
