ନୂଆଦିଲ୍ଲୀ,୧୨।୧୨: ସଂସଦର ଶୀତକାଳୀନ ଅଧିବେଶନରେ ଉତ୍ତେଜନା ମଧ୍ୟରେ କଂଗ୍ରେସ ସଭାପତି ମଲ୍ଲିକାର୍ଜୁନ ଖାର୍ଗେ ମୋଦି ସରକାରଙ୍କ ଉପରେ ବର୍ଷିଛନ୍ତି। ସେ କହିଛନ୍ତି, ଗଣତନ୍ତ୍ର ସର୍ବଦା ଦୁଇଟି ଚକ ଉପରେ ଚାଲିଥାଏ। ଗୋଟିଏ ଚକ ଶାସକ ଦଳ ଏବଂ ଅନ୍ୟଟି ହେଉଛି ବିରୋଧୀ ଦଳ। ଉଭୟ ଆବଶ୍ୟକ। ଅଧିବେଶନ ସମୟରେ ହିଁ ଦେଶ ସାଂସଦଙ୍କ ମତାମତ ଶୁଣେ।
ସୋସିଆଲ ମିଡିଆ ପ୍ଲାଟଫର୍ମରେ ପୋଷ୍ଟରେ ଖାର୍ଗେ କହିଛନ୍ତି, ୧୬ ମେ, ୧୯୫୨ରେ, ଅଧ୍ୟକ୍ଷ ଭାବରେ ରାଜ୍ୟ ସଭାର ପ୍ରଥମ ଚେୟାରମ୍ୟାନ ଡକ୍ଟର ରାଧାକ୍ରିଷ୍ଣନ ଏମ୍ପିମାନଙ୍କୁ କହିଥିଲେ ଯେ, ମୁଁ କୌଣସି ଦଳର ନୁହେଁ ଏବଂ ଏହାର ଅର୍ଥ ହେଉଛି ଯେ ମୁଁ ଗୃହର ପ୍ରତ୍ୟେକ ଦଳର ଅଟେ। ନିରପେକ୍ଷତାର ଏହି ପରମ୍ପରା ଆପଣଙ୍କ କାର୍ଯ୍ୟକାଳ ମଧ୍ୟରେ ସମ୍ପୂର୍ଣ୍ଣ ଭାଙ୍ଗି ଯାଇଥିଲା (ଚେୟାରମ୍ୟାନ ଜଗଦୀପ ଧନଖର)। ଆଜି ବିରୋଧୀଙ୍କ ସ୍ବରକୁ ଅଟକାଇବା ବର୍ତ୍ତମାନ ରାଜ୍ୟ ସଭାରେ ସଂସଦୀୟ ପଦ୍ଧତିର ନିୟମ ପାଲଟିଛି।
କଂଗ୍ରେସ ସଭାପତି ଅଭିଯୋଗ କରିଛନ୍ତି, ସଂସଦର ଶୋଭା ଏବଂ ନୈତିକତା ଭିତ୍ତିକ ପରମ୍ପରାର ଉଲ୍ଲଂଘନ ବର୍ତ୍ତମାନ ରାଜ୍ୟ ସଭାରେ ଏକ ନିତିଦିନିଆ ହୋଇଯାଇଛି। ଗଣତନ୍ତ୍ରକୁ ଭାଙ୍ଗିବା ଏବଂ ସତ୍ୟକୁ ପରାସ୍ତ କରିବା ପାଇଁ ଉଦ୍ୟମ ଜାରି ରହିଛି। ସମ୍ବିଧାନର ସୈନିକ ଏବଂ ରକ୍ଷକ ଭାବରେ ଆମର ନିଷ୍ଠା ଅଧିକ ଶକ୍ତିଶାଳୀ ହୋଇଯାଇଛି। ଆମେ ମୁଣ୍ଡ ନୁଆଁଇବୁ ନାହିଁ, ଅଟକିବୁ ନାହିଁ, ସମ୍ବିଧାନ, ସଂସଦର ସମ୍ମାନ ଏବଂ ଗଣତନ୍ତ୍ରର ସୁରକ୍ଷା ପାଇଁ ପ୍ରତ୍ୟେକ ବଳିଦାନ ଦେବାକୁ ପ୍ରସ୍ତୁତ ରହିବୁ।
