ବେଙ୍ଗାଲୁରୁ, ୪।୫:କର୍ନାଟକ ବିଧାନସଭା ନିର୍ବାଚନକୁ ଆଉ ସପ୍ତାହେ ବାକି ଥିବା ବେଳେ ଭାଜପା ଏବଂ କଂଗ୍ରେସ ମଧ୍ୟରେ ହନୁମାନଙ୍କୁ ନେଇ ରାଜନୀତି ଦେଖିବାକୁ ମିଳିଛି। ନିର୍ବାଚନ ପାଇଁ କଂଗ୍ରେସ ପକ୍ଷରୁ ଜାରି ଇସ୍ତାହାରରେ ବଜରଙ୍ଗ ଦଳ ଏବଂ ପପୁଲାର ଫ୍ରଣ୍ଟ ଅଫ୍ ଇଣ୍ଡିଆ(ପିଏପ୍ଆଇ) ସଂଗଠନ ଉପରେ ନିଷେଦ୍ଧାଦେଶ ପ୍ରତିଶ୍ରୁତି ପରେ ଦୁଇଦଳ ମଧ୍ୟରେ ବାକ୍ଯୁଦ୍ଧ ତୀବ୍ର ହେବାରେ ଲାଗିଛି।
ଏହା ଉପରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି କଂଗ୍ରେସକୁ ଟାର୍ଗେଟ କରି କହିଛନ୍ତି ଯେ, ପ୍ରଭୁ ହନୁମାନଙ୍କୁ ପୂଜା କରୁଥିବା ଲୋକଙ୍କୁ କଂଗ୍ରେସ ତାଲା ପକାଇବାକୁ ପ୍ରୟାସ କରୁଛି। ତେବେ ପ୍ରଧାନମନ୍ତ୍ରୀ ମୋଦି ନିର୍ବାଚନ ରାଲିରେ ହନୁମାନଙ୍କ ନାରା ଲଗାଉଥିବାର ନଜର ଆସିଥିଲେ।
ଏହି ସମୟରେ କର୍ନାଟକ କଂଗ୍ରେସ ସଭାପତି ଡି.କେ ଶିବକୁମାର ଗୁରୁବାର ଚାମୁଣ୍ଡେଶ୍ୱରୀ ମନ୍ଦିର ପରିଦର୍ଶନ କରିବା ବେଳେ କହିଛନ୍ତି ଯେ, କର୍ନାଟକରେ ଆମ ଦଳ କ୍ଷମତାକୁ ଆସିଲେ ରାଜ୍ୟର ବିଭିନ୍ନ ସ୍ଥାନରେ ହନୁମାନ ମନ୍ଦିର ନିର୍ମାଣ ହେବ। ସେ ଆହୁରି କହିଛନ୍ତି ଯେ, ମନ୍ଦିର ନିର୍ମାଣର କାର୍ଯ୍ୟ କିପରି ଚାଲିଛି ତାହା ଦେଖିବା ପାଇଁ ଏକ ସ୍ବତନ୍ତ୍ର କମିଟି ଗଠନ କରାଯିବ। ଏଥିସହ ପ୍ରଭୁ ହନୁମାନଙ୍କ ନୀତିକୁ ରାଜ୍ୟର ସବୁ ଯୁବବର୍ଗଙ୍କ ପାଖରେ ପହଞ୍ଚାଇବାକୁ ସ୍ବତନ୍ତ୍ର କାର୍ଯ୍ୟକ୍ରମ ମଧ୍ୟ କରିବୁ।
