ବେଜିଂ,୩୧।୫: ଚାଇନାରେ ବୟସ୍କଙ୍କ ସଂଖ୍ୟା ବୃଦ୍ଧି ପାଉଥିବାରୁ ସରକାର ଏବେ ନୂଆ ଆଇନ ପ୍ରଣୟନ କରିଛନ୍ତି। ଏଣିକି ଦେଶରେ ଦମ୍ପତିମାନେ ତିନି ସନ୍ତାନ ଜନ୍ମ ଦେଇପାରିବେ। ଦେଶର ଭବିଷ୍ୟତକୁ ଦୃଷ୍ଟିରେ ରଖି ଏଭଳି କରାଯାଉଥିବା ସରକାରଙ୍କ ପକ୍ଷରୁ କୁହାଯାଇଛି। ପୂର୍ବରୁ ଦେଶରେ ଦମ୍ପତିମାନେ ଦୁଇ ସନ୍ତାନ ଜନ୍ମ କରିବାକୁ ଆଇନ ଜାରି କରାଯାଇଥିଲା। ଦେଶର ଭବିଷ୍ୟତ ମାନବ ସମ୍ବଳକୁ ଦୃଷ୍ଟିରେ ରଖି ସରକାର ପୁରୁଣା ଆଇନକୁ ସଂଶୋଧନ କରିଛନ୍ତି। ଦେଶରେ ଶିଶୁ ଜନ୍ମହାର କମ୍ ରହିଥିବାରୁ ସରକାର ଏଭଳି ପଦକ୍ଷେପ ଗ୍ରହଣ କରିଛନ୍ତି। ୨୦୧୦ରୁ ୨୦୨୦ ମଧ୍ୟରେ ଚାଇନାର ଜନସଂଖ୍ୟା ବୃଦ୍ଧି ହାର ୦.୫୩ ପ୍ରତିଶତ ଥିଲା। ୨୦୦୦ରୁ ୨୦୧୦ ମଧ୍ୟରେ ୦.୫୭ ପ୍ରତିଶତ ଥିଲା। ୨୦୨୦ରେ ଦେଶର ୧୨ ନିୟୁତ ଶିଶୁ ଜନ୍ମ ହୋଇଥିଲେ। ୨୦୧୬ରେ ଏହା ୧୮ ନିୟୁତ ଥିଲା। ୧୯୭୦ରେ ଦେଶର ଜନସଂଖ୍ୟାକୁ ନିୟନ୍ତ୍ରଣ କରିବା ଲାଗି କେତେକ ଅଞ୍ଚଳରେ ଗୋଟିଏ ସନ୍ତାନ ଜନ୍ମ ଆଇନ ପ୍ରଣୟନ କରାଯାଇଥିଲା। ପରବର୍ତ୍ତୀ ସମୟରେ ଦେଶବ୍ୟାପୀ ଏହାକୁ ପ୍ରଣୟନ କରାଯାଇଥିଲା। ୨୦୦୯ରେ ଏହାକୁ କୋହଳ କରାଯାଇଥିଲା। ମାତାପିତାଙ୍କ ଗୋଟିଏ ସନ୍ତାନ ଥିବା କ୍ଷେତ୍ରରେ ଦମ୍ପତିଙ୍କୁ ଦ୍ୱିତୀୟ ସନ୍ତାନ ପାଇଁ ଅନୁମତି ପ୍ରଦାନ କରାଯାଇଥିଲା। ୨୦୧୪ରେ ଦେଶବ୍ୟାପୀ ଏହାକୁ ଲାଗୁ କରାଯାଇଥିଲା।
