ଲଣ୍ଡନ,୨୨।୨ : ଗତ ସପ୍ତାହରେ ବିବିସିର ନୂଆଦିଲ୍ଲୀ ଏବଂ ମୁମ୍ବାଇ କାର୍ଯ୍ୟାଳୟରେ ଆୟକର ଚଢ଼ାଉ ପରେ ବ୍ରିଟେନ ସରକାର ସଂସଦରେ ବିବିସିର ସମ୍ପାଦକୀୟ ସ୍ବାଧୀନତାର ପ୍ରତିରକ୍ଷା କରିଛନ୍ତି। ସରକାରଙ୍କ ତରଫରୁ ଏହା କୁହାଯାଇଛି ଯେ ଯେତେବେଳେ ଲେଖା ସ୍ବାଧୀନତାରର କଥା ଆସେ ସେତେବେଳେ ଆମେ ବିବିସି ସହିତ ଏହି ପ୍ରସଙ୍ଗରେ ସୁଦୃଢ଼ ଭାବରେ ଛିଡା ହୋଇଛୁ।
ହାଉସ ଅଫ କମନ୍ସରେ ଉଠାଯାଇଥିବା ଏକ ଜରୁରୀ ପ୍ରଶ୍ନର ଉତ୍ତରରେ ବ୍ରିଟିଶ ଏଫସିଡିଏର କନିଷ୍ଠ ମନ୍ତ୍ରୀ କହିଛନ୍ତି ଯେ ଆଇ-ଟି ବିଭାଗ ଦ୍ୱାରା ଚାଲିଥିବା ଅନୁସନ୍ଧାନ ଉପରେ ସରକାର କୌଣସି ମନ୍ତବ୍ୟ ଦେଇ ପାରିବେ ନାହିଁ, କିନ୍ତୁ ଗଣମାଧ୍ୟମର ସ୍ବାଧୀନତା ଏବଂ ବାକ୍ ସ୍ବାଧୀନତାକୁ ସର୍ବଦା ସମର୍ଥନ କରିବୁ।
ଏଫସିଡିଏର ସଂସଦୀୟ ଅଣ୍ଡର ସେକ୍ରେଟେରୀ ଡେଭିଡ ରଟଲି କହିଛନ୍ତି ଯେ ଆମେ ବିବିସି ପାଖରେ ଛିଡା ହୋଇଛୁ। ଆମେ ବିବିସିକୁ ପାଣ୍ଠି ଦେଉଛୁ। ଆମେ ଭାବୁଛୁ ବିବିସିର ୱାଲର୍ଡ ସର୍ଭିସ୍ ଗୁରୁତ୍ୱପୂର୍ଣ୍ଣ। ଆମେ ଚାହୁଁଛୁ ବିବିସି ସମ୍ପାଦକୀୟ ସ୍ବାଧୀନତା ପାଉ। ଏହା ଆମ ସରକାରଙ୍କୁ ସମାଲୋଚନା କରେ। ବିରୋଧୀ ଲେବର ପାର୍ଟିକୁ ସମାଲୋଚନା କରେ। ଏହାର ସ୍ବାଧୀନତା ଅଛି ଯାହାକୁ ଆମେ ବିଶ୍ୱାସ କରୁ ଯେ ଏହା ଗୁରୁତ୍ୱପୂର୍ଣ୍ଣ । ଆମେ ଭାରତର ସରକାରଙ୍କ ସମେତ ସମଗ୍ର ବିଶ୍ୱରେ ଆମର ବନ୍ଧୁମାନଙ୍କୁ ଏହାର ଗୁରୁତ୍ୱ ଜଣାଇବାକୁ ଚାହୁଁଛୁ ।
ଏହି ପ୍ରସଙ୍ଗରେ ହାଉସ ଅଫ କମନ୍ସକୁ ସୂଚନା ଦେଇ ମନ୍ତ୍ରୀ କହିଛନ୍ତି ଯେ ବିବିସି କାର୍ଯ୍ୟକ୍ଷମ ଏବଂ ସମ୍ପାଦକୀୟ ଭାବରେ ସ୍ବାଧୀନ ଅଟେ। ଜନସାଧାରଣଙ୍କ ପାଇଁ ପ୍ରସାରଣ ଏକ ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରେ। ଗୁଜରାଟୀ,ମରାଠୀଳ ପଞ୍ଜାବୀ ଏବଂ ତେଲୁଗୁ ଆଦି ଚାରିଟି ଭାରତୀୟ ଭାଷା ସହିତ ୧୨ ଟି ଭାଷାରେ ଏହା ସେବା ପ୍ରଦାନ କରିଥାଏ। ବିବିସି ମାଧ୍ୟମରେ ଆମର ସ୍ବର ଏବଂ ଏକ ସ୍ବାଧୀନତାର ସ୍ବର ସମଗ୍ର ବିଶ୍ୱରେ ଶୁଣାଯିବା ଜରୁରୀ ହୋଇଥିବାରୁ ଆମର ସମର୍ଥନ ଜାରି ରହିବ।
