ଭଞ୍ଜନଗର,୧୬।୫(ବାବୁଲା ପ୍ରଧାନ):ପୂର୍ବତନ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ପୈତୃକ ଗ୍ରାମ ଗଞ୍ଜାମ ଜିଲା ବେଲଗୁଣ୍ଠା ବ୍ଲକ ନୂଆଗାଁକୁ ପାଇପ ଯୋଗେ ପାଣି ଯୋଗାଣ ୫ ଦିନ ଧରି ବନ୍ଦ ଥିଲା। ଏନେଇ ଧରିତ୍ରୀ ପୋର୍ଟାଲରେ ବୁଧବାର ଏବଂ ପତ୍ରିକାରେ ଗୁରୁବାର ଖବର ପ୍ରକାଶିତ ହୋଇଥିଲା । ଏହାପରେ ପ୍ରଶାସନ ପକ୍ଷରୁ ଗ୍ରାମକୁ ପାଇପ ଯୋଗେ ପାଣି ଯୋଗାଣ ଗୁରୁବାର ସଂଧ୍ୟାରେ ସାଭାବିକ କରିଛନ୍ତି। ଯାହାକୁ ନେଇ ଗ୍ରାମବାସୀ ଖୁସିବ୍ୟକ୍ତ କରିଛନ୍ତି । ପ୍ରଶାସନର ପଦକ୍ଷେପକୁ ଗ୍ରାମର ସଞ୍ଜୟ କୁମାର ନାୟକ, ଗୋବର୍ଦ୍ଧନ ପ୍ରଧାନ ପ୍ରମୁଖ ସ୍ବାଗତ କରିଛନ୍ତି।
ଘଟଣାରୁ ପ୍ରକାଶ ଯେ, ଗଞ୍ଜାମ ଜିଲା ଭଞ୍ଜନଗର ଗ୍ରାମ୍ୟ ପାଇପ ଜଳ ଯୋଗାଣ ବିଭାଗ ଅଧିକ୍ଷଣ ଯନ୍ତ୍ରୀଙ୍କ ଅଧିନରେ ଥିବା ବେଲଗୁଣ୍ଠା ବ୍ଲକ ନୂଆଗାଁ ପାଇପ ଜଳ ଯୋଗାଣ ପ୍ରକଳ୍ପ ଗତ ୧୦ ତାରିଖରେ ଅଚଳ ହୋଇପଡିଥିଲା। ଫଳରେ ଲୋକେ ବିଶୁଦ୍ଧ ପାଣି ଟୋପାଏ ପାଇ ପାରୁନଥିଲେ। ଯାହାକୁ ନେଇ ଲୋକେ ନାହିଁ ନ ଥିବା ଅସୁବିଧାର ସମ୍ମୁଖୀନ ହୋଇଥିଲେ। ପମ୍ପ ହାଉସ ମୋଟରଟି ଅଚଳ ଯୋଗୁ ଏହି ସମସ୍ୟା ଦେଖାଦେଇଥିଲା। ନୂଆଗାଁ ହେଉଛି ପୂର୍ବତନ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ପୈତୃକ ଗ୍ରାମ। ନବୀନ ପଟ୍ଟନାୟକ ଦୀର୍ଘବର୍ଷ ଧରି ଶାସନ କ୍ଷମତାରେ ରହିବା ସମୟରେ ପୈତୃକ ଗ୍ରାମରେ ଥିବା ଘରକୁ ଦୁଇଥର ବୁଲିବାକୁ ଆସିଥିଲେ। ନବୀନ ପଟ୍ଟନାୟକ ମୁଖ୍ୟମନ୍ତ୍ରୀ ଥିବା ସମୟରେ ନୂଆଗାଁଠାରେ ଏକ ହାଇଲେବଲ ସେତୁ ନିର୍ମାଣ ସହ ଗ୍ରାମକୁ ପକ୍କା ରାସ୍ତା ହୋଇଥିଲା। କିନ୍ତୁ ନବୀନଙ୍କ ହାତରେ ପ୍ରାୟ ୧୦ ବର୍ଷ ପୂର୍ବେ ଗ୍ରାମରେ ଉଦଘାଟିତ ହୋଇଥିବା ପାଠାଗାରଟି ଆଜି ପର୍ଯ୍ୟନ୍ତ ସର୍ବସାଧାରଣ ପାଇଁ ଖୋଲିପରିଲା ନାହିଁ। ଉଦଘାଟନ ପରଠୁ ପାଠାଗାରରେ ତାଲା ଝୁଲୁଛି।
ବର୍ତ୍ତମାନ କ୍ଷମତା ଚାଲିଯିବା ପରେ ପ୍ରଶାସନ ମଧ୍ୟ ଉକ୍ତ ଗ୍ରାମବାସୀଙ୍କ ସମସ୍ୟାକୁ ତୁରନ୍ତ ସମାଧାନ କରିବା ପାଇଁ ଆଉ ଗୁରୁତ୍ୱ ଦେଉ ନ ଥିବା ଅଭିଯୋଗ ହୋଇଛି। ନୂଆଗାଁ ଗ୍ରାମଟି ଏକ ବଡ ଗ୍ରାମ ହୋଇଥିବା ବେଳେ ଗ୍ରାମରେ ଏକ ହଜାରରୁ ଉର୍ଦ୍ଧ ପରିବାର ବସବାସ କରୁଛନ୍ତି । ଦେଶ ସାଧୀନତା ପୁର୍ବରୁ ଉକ୍ତ ଗ୍ରାମରେ ବ୍ରିଟିଶ ଶାସକ ମାନେ ନିଜର କାର୍ଯ୍ୟାଳୟ ଖୋଲିଥିଲେ। ଇତିହାସ ପ୍ରସିଦ୍ଧ ଘୁମୁସର ନୂଆଗାଁ ଆଜି ବିଭିନ୍ନ କ୍ଷେତ୍ରରେ ଅବହେଳିତ ଅବସ୍ଥାରେ। ଗ୍ରାମରେ ବସବାସ କରୁଥିବା ଲୋକଙ୍କୁ ବଡ ନଦୀରୁ ପାଇପ ଯୋଗେ ଆଣି ଯୋଗାଇ ଦିଆଯାଉଛି । କିନ୍ତୁ ବଡନଦୀ କୂଳରେ ଥିବା ପମ୍ପ ହାଉସ ମୋଟର ଟି ଅଚଳ ହୋଇପଡ଼ିବା ପରେ ବିକଳ୍ପ ଭାବେ ତୁରନ୍ତ ପାଣି ଦେବା ବ୍ୟବସ୍ଥା କରାଯାଇନଥିଲା । ଅଚଳ ମୋଟରକୁ ଗ୍ରାମ୍ୟ ପାଇପ ଜଳ ଯୋଗାଣ ବିଭାଗ ପକ୍ଷରୁ
ମରାମତି କରିବା ଦ୍ୱାରା ପାଣି ଯୋଗାଣ ବିଳମ୍ବ ହୋଇଥିଲା।
