ଦେବଗଡ,୧୬।୫(ଶଶାଙ୍କ ଶେଖର ଝାଙ୍କର):ଗତ ଏପ୍ରିଲ ୩୦ ତାରିଖ ରାତ୍ରୀରେ ବାରକୋଟ ଥାନା ଅନ୍ତର୍ଗତ ମର୍ହା ଗ୍ରାମରେ ଘଟିଥିବା ବହୁଚର୍ଚ୍ଚିତ ବନ୍ୟଜନ୍ତୁ ଶିକାରୀ ସୁରେଶ ଶବର(୫୯)ହତ୍ୟା ଘଟଣାର ଅଭିଯୁକ୍ତକୁ ପୋଲିସ ଗୁରୁବାର ଗିରଫ କରି କୋର୍ଟ ଚାଲାଣ କରିଛି । ଗିରଫ ହତ୍ୟାକାରୀ ମର୍ହା ଗ୍ରାମର ଭାଗୁଡୁ ପ୍ରଧାନ ଓରଫ ବୁଦ୍ଧରାମ ପ୍ରଧାନ(୩୫) ବୋଲି ଜଣାପଡିଛି । ଘଟଣାର ଦୀର୍ଘ ୧୫ ଦିନ ପରେ ପୋଲିସ ହତ୍ୟାକାରୀ ଭାଗୁଡୁକୁ ଗିରଫ କରିଥିବା ବେଳେ ସୁରେଶଙ୍କ ଦୋକାନରୁ ନେଇଥିବା ସାମଗ୍ରୀର ବକେୟା ପ୍ରାପ୍ୟ ପ୍ରଦାନକୁ କେନ୍ଦ୍ରକରି ଏହି ଘଟଣା ଘଟିଥିବା ପୋଲିସ ପକ୍ଷରୁ ସୂଚନା ମିଳିଛି ।
ସୂଚନା ଅନୁଯାୟୀ, ମର୍ହା ଗ୍ରାମରେ କୁଖ୍ୟାତ ଜନ୍ତୁ ଶିକାରୀ ସୁରେଶ ଶବରଙ୍କ ଏକ ରାସନ ଦୋକାନ ରହିଥିବା ବେଳେ ଉକ୍ତ ଗ୍ରାମର ଭାଗୁଡୁ ଓରଫ ବୁଦ୍ଧରାମ ପ୍ରଧାନ(୩୫)ତାଙ୍କ ନିକଟରୁ ୮୦୦ ଟଙ୍କାର ସାମଗ୍ରୀ ଧାର ସୂତ୍ରରେ ନେଇଥିଲା । ମାତ୍ର ସୁରେଶ ଏକାଧିକ ବାର ବକେୟା ଟଙ୍କା ଫେରସ୍ତ ମାଗିଥିଲେ ହେଁ ଭାଗୁଡୁ ଏହି ଟଙ୍କା ପରିଶୋଧ ନକରି ଦିନ ଗଡାଇ ଚାଲିଥିଲା । ସୁରେଶ ଗତ ୩୦ ତାରିଖ ରାତି ପ୍ରାୟ ୮ଟା ସମୟରେ ଶ୍ରମିକ ଯୋଗାଡ ପାଇଁ ଏକ ବାଇକ ଯୋଗେ ୨ କି.ମି. ଦୂରବର୍ତୀ ଔତଳ ଗ୍ରାମକୁ ଯାଇ ଫେରୁଥିବା ବେଳେ ଔତଳ ରାସ୍ତାରେ ଥିବା ଏକ ନାଳ ନିକଟରେ ଭାଗୁଡୁ ସହିତ ଦେଖାହୋଇଥିଲା। ଏହି ସମୟରେ ସୁରେଶ ବାଇକଟିକୁ ନାଳକଡରେ ରଖିଦେଇ ଭାଗୁଡୁକୁ ଅଟକାଇବା ସହ ବକେୟା ଥିବା ୮ ଶହ ଟଙ୍କା ଫେରସ୍ତ ମାଗିଥିଲେ । ମାତ୍ର ଭାଗୁଡୁ ନିଜର ଅକ୍ଷମତା ପ୍ରକାଶ କରିବାରୁ ଉଭୟଙ୍କ ମଧ୍ୟରେ ବଚସା ହୋଇଥିଲା । ଏହି ସମୟରେ ସୁରେଶ ନିଜ ପାଖରେ ଏକ ବନ୍ଧୁକ ଏକ ଟାଙ୍ଗିଆ(କୁରାଢୀ) ରଖିଥିବା ବେଳେ ବନ୍ଧୁକ ଦେଖାଇ ଭାଗୁଡୁକୁ ନାନା ଧମକ ଚମକ ଦେଇଥିଲା । ଫଳରେ ଭାଗୁଡୁ ଭୟଭୀତ ହୋଇ ନିକଟସ୍ଥ ଜଙ୍ଗଲ ମଧ୍ୟକୁ ଦୌଡି ପଳାଇଥିଲା । ସୁରେଶ ସେଠାରୁ ଭାଗୁଡୁକୁ ଜଙ୍ଗଲ ରାସ୍ତାରେ ଗୋଡାଇ ଗୋଡାଇ ମର୍ହା ଗ୍ରାମର ପୋଖରୀ ନିକଟରେ ପହଂଚିବା ବେଳକୁ ଭାଗୁଡୁ ସୁଯୋଗ ଦେଖି ଏକ ଠେଙ୍ଗା ସାହାଯ୍ୟରେ ସୁରେଶଙ୍କ ମୁଣ୍ଡକୁ ପଛପଟୁ ଆକ୍ରମଣ କରିଥିଲା । ଫଳରେ ସୁରେଶ ଗୁରୁତର ଆହତ ହୋଇ ତଳେ ପଡିଯାଇଥିଲେ । ଏହାଦେଖି ଭାଗୁଡୁ ସୁରେଶଙ୍କ ହାତରୁ ଟାଙ୍ଗିଆଟିକୁ ଛଡାଇ ଆଣିବାସହ ଏହା ସାହାଯ୍ୟରେ ସୁରେଶଙ୍କ ବେକ ଓ ମୁଣ୍ଡ ଆଦି ଶରୀରର ବିଭିନ୍ନ ଅଂଶରେ ଚୋଟ ପକାଇଥିଲା । ଫଳରେ ଘଟଣା ସ୍ଥଳରେ ସୁରେଶଙ୍କ ମୃତ୍ୟୁ ଘଟିଥିଲା ଓ ଭାଗୁଡୁ ସେଠାରୁ ଫେରାର ହୋଇଯାଇଥିଲା । ପୋଲିସ ଭାଗୁଡୁକୁ ଗିରଫ କରିବା ସହ ହତ୍ୟାକାଣ୍ଡରେ ବ୍ୟବହୃତ ଟାଙ୍ଗିଆକୁ ଜବତ କରିଛି । ସେହିପରି ଭାଗୁଡୁକୁ କୋର୍ଟ ଚାଲାଣ କରିଥିବା ବେଳେ ଅଦାଲତରେ ଜାମିନ ନାମଞ୍ଜୁର ହେବାରୁ ତାକୁ ଜେଲ ହାଜତକୁ ପଠାଇ ଦିଆଯାଇଛି ।
