ଦଶମନ୍ତପୁର, ୨୦।୪: ( ଡି.ଏନ୍.ଏ.) କାମରେ ଆସୁନି ୯ ଲକ୍ଷ ଟଙ୍କାର ଜଳପ୍ରକଳ୍ପ। ଜଳ କଷ୍ଟ ଭୋଗୁଛନ୍ତି କୋରାପୁଟ ଜିଲା ଦଶମନ୍ତପୁର ବ୍ଲକ ମୁଜାଙ୍ଗ ପଞ୍ଚାୟତର ବାଟିଶିଲଗୁଡା ଗ୍ରାମବାସୀ । ଏହି ଗ୍ରାମରେ ୭୨ ପରିବାର ବସବାସ କରନ୍ତି। ଜନସଂଖ୍ୟା ପ୍ରାୟ ୩୮୬ରୁ ଊର୍ଦ୍ଧ୍ୱ ରହିଛି। ଗ୍ରାମବାସୀଙ୍କ ପାନୀୟ ଜଳ ପାଇଁ ୨ଟି ନଳକୂପ ଖନନ କରାଯାଇଛି । ତେବେ ଏହି ନଳକୂପ ଖନନର ଅଳ୍ପ ଦିନ ପରେ ଅଚଳ ହୋଇ ପଡିଥିବା ଗ୍ରାମର ଗଙ୍ଗାଧର ମୁଦୁଲି, ଅଭି ମୁଦୁଲି, ଈଶ୍ୱର ମୁଦୁଲି, ପ୍ରୀତମ ମୁଦୁଲି, ଗରି ମୁଦୁଲି, ବତୀ ମୁଦୁଲି, ମଙ୍ଗଳି ମୁଦୁଲି, ସମାରୀ ମୁଦୁଲି କହିଛନ୍ତି। ନଳକୂପ ୨ଟି ଅଚଳ ଯୋଗୁ ଗ୍ରାମବାସୀ ପାନୀୟ ଜଳ ପାଇଁ ବହୁ ଅସୁବିଧାର ସମ୍ମୁଖୀନ ହେଉଛନ୍ତି। ଗ୍ରାମବାସୀଙ୍କ ଜଳକଷ୍ଟ ଦୂର କରିବା ଲାଗି ଡିଏମ୍ଏଫ୍ ଫଣ୍ଡ ଏବଂ ଜିଲା ପରିଷଦ ପାଣ୍ଠିରୁ ଗ୍ରାମରେ ୨୦୨୧-୨୨ ଆର୍ଥିକ ବର୍ଷରେ ୯ ଲକ୍ଷ ୨୦ ହଜାର ଟଙ୍କାର ଏକ ସୋଲାର ପ୍ରକଳ୍ପ ମଞ୍ଜୁର ହୋଇଥିଲା। ଏହା ପ୍ରତିଷ୍ଠା ପରେ କିଛି ମାସ ଗ୍ରାମବାସୀଙ୍କ ଜଳକଷ୍ଟ ଦୂର ହୋଇଥିଲା। ମାତ୍ର ପରବର୍ତ୍ତୀ ସମୟରେ ଉକ୍ତ ପ୍ରକଳ୍ପଟି ଅଚଳ ହୋଇପଡିଛି। ନିମ୍ନମାନର କାର୍ଯ୍ୟ ଯୋଗୁ ପ୍ରକଳ୍ପ ଅଳ୍ପଦିନ ମଧ୍ୟରେ ଅଚଳ ହୋଇପଡିଲା ବୋଲି ଗ୍ରାମବାସୀ ଅଭିଯୋଗ କରିଛନ୍ତି। ଏବେ କୌଣସି ବିକଳ୍ପ ନ ପାଇ ଗ୍ରାମବାସୀ ଗ୍ରାମ ନିକଟସ୍ଥ ଏକ ବିଲରୁ ଦୂଷିତ ଜଳ ସଂଗ୍ରହ କରି ଚଳୁଛନ୍ତି । ଗ୍ରାମରେ ଖୁବ୍ ଶୀଘ୍ର ପାନୀୟ ଜଳ ବ୍ୟବସ୍ଥା ନ କଲେ ଆମେ ଜିଲାପାଳଙ୍କ ଦ୍ବାରସ୍ଥ ହେବୁ ବୋଲି ଗ୍ରାମବାସୀ ଚେତାବନୀ ଦେଇଛନ୍ତି।
