ସମ୍ବଲପୁର,୧୮ା୮(ଶୁଭାଶିଷ ପାଢ଼ୀ): ସମ୍ବଲପୁର ଜିଲା ହୀରାକୁଦ ଥାନା ଅଞ୍ଚଳରେ ଆରଡବ୍ଲ୍ୟୁଏସ୍ଏସ୍ ପକ୍ଷରୁ ବିଛା ଯାଇଥିବା ପାଣି ପାଇପ୍ ଚୋରି ର଼୍ୟାକେଟର ପୋଲିସ ପର୍ଦ୍ଦାଫାଶ କରିଛି। ଏହି ଘଟଣାରେ ୯ ଅଭିଯୁକ୍ତଙ୍କୁ ଗିରଫ କରାଯାଇଛି। ସେମାନେ ହେଲେ ହୀରାକୁଦର ବସୁଦେବ ଓରାମ, ଯଶୋବନ୍ତ ଭୋଇ, ଗୋଲବଜାରର ବିକାଶ ଦାସ, ମାଷ୍ଟର ମାଇଣ୍ଡ ମହମ୍ମଦ ଇମରାନ, ଫରୋଜ ଖାନ, କଟକ ବକ୍ସିବଜାରର ସନ୍ଦିପ ଅଗ୍ରୱାଲ, ପଶ୍ଚିମବଙ୍ଗର ଅମିତ ସାମନ୍ତ, ରାୟପୁରର ସଞ୍ଜୀବ ପଣ୍ଡିତ ଓ ଅନିଲ ପନସାରି।
ଅଭିଯୁକ୍ତମାନଙ୍କ ନିକଟରୁ ୨୫୦ ଡିଆଇ ପାଇପ୍, ଏମପି-ଜିଏ-୩୬୪୧ ନମ୍ବର ଟ୍ରକ୍, ଓଡି୧୫ପି-୮୧୩୧ ଓ ଓଡି୦୫-ବିଏମ୍-୭୫୬୮ ନମ୍ବର ବିଶିଷ୍ଟ ୨ଟି କାର୍, ୧୦ଟି ମୋବାଇଲ ପୋନ, ନଗଦ ୮୭ ହଜାର ଟଙ୍କା ଜବତ ହୋଇଛି। ଏସ୍ପି ଅଫିସ ସମ୍ମିଳନୀ କକ୍ଷରେ ଶୁକ୍ରବାର ଆୟୋଜିତ ଖବରଦାତା ସମ୍ମିଳନୀରେ ଏସ୍ପି ମୁକେଶ କୁମାର ଭାମୁ ଏହି ସୂଚନା ଦେଇଛନ୍ତି।
ଏସ୍ପି କହିଥିଲେ, ସରକାର ଘରକୁ ଘର ପାନୀୟ ଜଳ ଯୋଗାଣ ପାଇଁ ଯୋଜନା କରି ପାଇପ୍ ବିଛା କାମ କରୁଛନ୍ତି। ଏହି ପ୍ରକଳ୍ପରେ ଲାଗୁଥିବା ଲୁହା ପାଇପ୍କୁ ଅଭିଯୁକ୍ତମାନେ ଚତୁରତା ସହ ଚୋରି କରି ନେଉଥିଲେ। ପରେ ସେମାନେ ଏହାକୁ ରାଜ୍ୟ ବାହାର ପଶ୍ଚିମବଙ୍ଗ, ରାୟପୁର ଏବଂ କଟକ ଆଦି ଅଞ୍ଚଳକୁ ଚାଲାଣ କରୁଥିଲେ। ହୀରାକୁଦ ଅଞ୍ଚଳରେ ଅଭିଯୁକ୍ତମାନେ ପାଇପ୍ ଚୋରି କରିବା ସମୟରେ ପୋଲିସ ଟିମ୍ ସେମାନଙ୍କୁ କାବୁ କରିନେଇଥିଲା। ର଼୍ୟାକେଟ କେବଳ ସମ୍ବଲପୁର ନୁହେଁ ସୁନ୍ଦରଗଡ଼, ବୌଦ୍ଧ, ଝାରସୁଗୁଡ଼ା, ବଲାଙ୍ଗୀର, ସୋନପୁର, ବରଗଡ଼ ଆଦି ଜିଲାରେ ପାଣି ପାଇପ୍ ସହ ଅନ୍ୟ ମୂଲ୍ୟବାନ ସାମଗ୍ରୀ ଚୋରି କରୁଥିଲେ। ଘଟଣାରେ ଅନ୍ୟ କାହାର ସମ୍ପୃକ୍ତି ରହିଛି ସେ ନେଇ ପୋଲିସ ତଦନ୍ତ କରୁଛି ବୋଲି ଏସ୍ପି ଭାମୁ ସୂଚନା ଦେଇଛନ୍ତି।
