ବାଲିଆପାଳ,୨୫।୩(ସ୍ବ.ପ୍ର.)- ଖରାଦିନ ଆରମ୍ଭରୁ ବାଲେଶ୍ୱର ଜିଲା ବାଲିଆପାଳ ବ୍ଲକର ବାଲିଆପାଳ ପଞ୍ଚାୟତରେ ଜଳସଙ୍କଟ ଦେଖାଦେଇଛି। ଦୁଇଟି ପାନୀୟଜଳ ପ୍ରକଳ୍ପ ଥାଇ ମଧ୍ୟ ଲୋକଙ୍କୁ ପାନୀୟଜଳ ଯୋଗାଇବାରେ ଫେଲ୍ ମାରିଛି। ଏହାସହିତ ଗଁାଗୁଡିକରେ ଥିବା ଗଭୀର ନଳକୂପ କଥା କହିଲେ ନ ସରେ। କେଉଁଠାରେ ନଳକୂପ ଅଚଳ ଅବସ୍ଥାରେ ରହିଛି, ତ କେଉଁଠି ବ୍ୟବହାର ଅନୁପଯୋଗୀ। ପଙ୍କ କାଦୁଅ ମିଶା ଆଇରନ ଜଳ ବାହାରୁଛି।
ବାଲିଆପାଳଠାରେ ତହସିଲ, ଥାନା, ବ୍ଲକ, ବିଭିନ୍ନ ପ୍ରକାର ଅଫିସ, ବ୍ୟାଙ୍କ ରହିଛି। ବାଲିଆପାଳରୁ ବାଲେଶ୍ୱର ଯାତାୟାତ ପାଇଁ ମୁଖ୍ୟ ରାସ୍ତା ସହିତ ବିଭିନ୍ନ ଛକରୁ ପଞ୍ଚାୟତକୁ ରାସ୍ତା ରହିଛି। ରାସ୍ତାର ଉଭୟପାର୍ଶ୍ୱରେ ଦୋକାନ ସହିତ ଗ୍ରାମ ରହିଥିବାରୁ ସବୁ ସମୟରେ ଛକରେ ଜନଗହଳି ଲାଗିଥାଏ। ରାସ୍ତା ପାର୍ଶ୍ୱରେ ସର୍ବସାଧାରଣ ବ୍ୟବହାର ଉଦ୍ଦେଶ୍ୟରେ ଗୋଟିଏ ଗୋଟିଏ ଟ୍ୟାପ୍ ରହିଛି। ସେଥିରୁ ପାଣି ନେବା ପାଇଁ ଲୋକଙ୍କୁ ଘଣ୍ଟା ଘଣ୍ଟା ଧରି ଅପେକ୍ଷା କରିବାକୁ ପଡୁଛି, ତ କେତେବେଳେ ଜଳ ନ ପାଇ ଖାଲି ବୋତଲ, ବାଲ୍ଟି ଧରି ଫେରିବାକୁ ପଡୁଛି। ୨୦୧୮ରେ ବସୁଧା ଯୋଜନାରେ ନିର୍ମିତ ଏକ ଲକ୍ଷ ଲିଟର ଜଳଧାରଣ କ୍ଷମତା ବିଶିଷ୍ଟ ଓଭରହେଡ୍ ଟାଙ୍କି କେବଳ ନାମକୁ ମାତ୍ର। ନିର୍ଦ୍ଦିଷ୍ଟ ସମୟ ସକାଳ, ମଧ୍ୟାହ୍ନ, ସନ୍ଧ୍ୟାରେ ୩ଥର ଜଳଯୋଗାଣ ହେଉଥିବାରୁ ଅନ୍ୟ ସମୟରେ ସାଧାରଣ ଲୋକେ ରାସ୍ତାରେ ଯିବା ଆସିବା କରୁଥିବା ବେଳେ ଜଳ ପାଇଁ ହଇରାଣ ହେଉଛନ୍ତି। ହେଲେ ଦୁଇତିନି ଦିନ ହେବ ଛକଗୁଡିକରେ ଆଦୌ ପାଣି ଆସୁ ନ ଥିବାରୁ ଲୋକମାନେ ନାହଁି ନ ଥିବା ଅସୁବିଧାର ସମ୍ମୁଖୀନ ହେଉଛନ୍ତି।
ଏ ସମ୍ପର୍କରେ ବାଲିଆପାଳ ସରପଞ୍ଚ ମଧୁସୂଦନ ବାରିକ କହନ୍ତି, ଭୂତଳ ଜଳସ୍ତର କମିଯାଇଥିବାରୁ ୫ ଏଚ୍ପି ମୋଟର ଠିକ୍ ଭାବେ ଜଳଯୋଗାଇ ପାରୁନାହଁି। ପୁରୁଣା ମୋଟର ପରିବର୍ତ୍ତନ କରି ୭ ଏଚ୍ପି ମୋଟର ସହିତ ୨୦ଫୁଟ୍ର ପାଇପ୍ ତଳକୁ ସଂଯୋଗ କରାଗଲେ ସବୁ ସମସ୍ୟାର ସମାଧାନ ହୋଇପାରିବ। ଗ୍ରାମୀଣ ଜଳ ଯୋଗାଣ ବିଭାଗ ଜେଇ ପଙ୍କଜ ତ୍ରିପାଠୀ କହିଛନ୍ତି, ମୁଁ ଏଠାରେ ଗତ ୪ମାସ ହେବ କାର୍ଯ୍ୟରେ ଯୋଗଦେଇଥିବାରୁ ସମସ୍ତ ଅଞ୍ଚଳ ବିଷୟରେ ଜାଣିନାହଁି। ଏହାଛଡ଼ା ଏନେଇ କୌଣସି ଅଭିଯୋଗ ଆସିନାହିଁ।
