ସମ୍ବଲପୁର,୩୦ା୬(ବି.ଶଙ୍କର): ସମ୍ବଲପୁର ସହରରେ ଅତ୍ୟାଧୁନିକ ଫ୍ଲାଏଓଭର ଜନସାଧାରଣଙ୍କ ପାଇଁ ଅସୁବିଧା ସୃଷ୍ଟି କରୁଛି। ଫ୍ଲାଏଓଭର ଉଭୟ ପାର୍ଶ୍ୱରେ ଡ୍ରେନ ନିର୍ମାଣ ହୋଇ ନାହିଁ। ଫଳରେ ବର୍ଷାପାଣି ଜିଲାପାଳ, ଆର୍ଡିସି ଅଫଇସ ସମ୍ମୁଖ ରାସ୍ତାରେ ଲହଡି ଭାଙ୍ଗୁଛି। ଅସରାଏ ବର୍ଷାରେ ଫ୍ଲାଏଓଭର ଉପରେ ପାଣି ଜମି ରହୁଛି। ଫଳରେ ଏହାର ସ୍ଥାୟିତ୍ୱକୁ ନେଇ ପ୍ରଶ୍ନ ଉଠିଛି।
ଧୁଚୁରାପଡା ଛକରୁ କଚେରି ଛକ ପର୍ଯ୍ୟନ୍ତ ପ୍ରାୟ ୨କି.ମି. ରାସ୍ତା ଦୁଇଶହ କୋଟିରୁ ଊର୍ଦ୍ଧ୍ୱ ବ୍ୟୟ ଅଟକଳରେ ନିର୍ମିତ ହୋଇଛି। ହେଲେ ନିର୍ମାଣ କାର୍ଯ୍ୟରେ ତ୍ରୁଟି ଯୋଗୁ ଫ୍ଲାଇଓଭର ତଳେ ରାସ୍ତାରେ ଯାଉଥିବା ଲୋକଙ୍କ ଉପରେ ପାଣି ପଡୁଛି। ଏ ନେଇ ବରିଷ୍ଠ ଭାଜପା ନେତା ତଥା ଯୁବମୋର୍ଚ୍ଚାର ପୂର୍ବତନ ସମ୍ବଲପୁର ଜିଲା ସଭାପତି ସୂର୍ଯ୍ୟ ପାଣିଗ୍ରାହୀ କହିଛନ୍ତି, ଏହି ସମସ୍ୟା ବିଷୟରେ ଜାଣି ସୁଦ୍ଧା ଜିଲା ପ୍ରଶାସନ ନୀରବଦ୍ରଷ୍ଟା ସାଜୁଛି। ସମ୍ବଲପୁରବାସୀଙ୍କ ହିତ ଦୃଷ୍ଟିରୁ ପ୍ରଶାସନ ତୁରନ୍ତ ସମସ୍ୟା ସମାଧାନ କରିବା ଦରକାର। ସେହିପରି ବିଜୁ ଯୁବ ଜନତା ଦଳ ରାଜ୍ୟ ସାଧାରଣ ସମ୍ପାଦକ ହିରାଲାଲ ବେହେରା କହିଛନ୍ତି, ଜିଲାପାଳ କାର୍ଯ୍ୟାଳୟ ସମ୍ମୁଖ ରାସ୍ତାକୁ ବାରମ୍ବାର ତିଆରି କରାଯାଉଛି। ବର୍ଷା ଜଳ ନିଷ୍କାସନ ହେଉ ନ ଥିବାରୁ ପୁଣି ନୂତନ କାର୍ଯ୍ୟକୁ ଭଙ୍ଗାଯାଉଛି। ଏହା ଦୂରଦର୍ଶିତାର ଅଭାବ। ରାସ୍ତାରୁ କିପରି ଜଳ ନିଷ୍କାସନ ହେବ ସେ ଦିଗରେ ସମ୍ପୃକ୍ତ ବିଭାଗ ଓ ଜିଲା
ପ୍ରଶାସନ କାର୍ଯ୍ୟ କରିବା ଉଚିତ।
