କରାଚି,୯।୮: ପାକିସ୍ତାନର କରାଚି ସହରରେ ଏକ ଲଜ୍ଜାଜନକ ଘଟଣା ଘଟିଛି। ଜଣେ ସୁରକ୍ଷାକର୍ମୀ ଗର୍ଭବତୀ ମହିଳାଙ୍କୁ ଚାପୁଡା ମାରିବା ସହ ତାଙ୍କୁ ଠେଲି ଦେଇଥିଲେ। ଘଟଣାର ଭିଡିଓ ଭାଇରାଲ ହେବା ପରେ ପୋଲିସ ଅଭିଯୁକ୍ତଙ୍କୁ ଗିରଫ କରିଛି।
କରାଚିର ଗୁଲିସ୍ତାନ-ଇ-ଜୋହର ଅଞ୍ଚଳରେ ଥିବା ଏକ ଆପାର୍ଟମେଣ୍ଟ କୋଠା ବାହାରେ ଏହି ଘଟଣା ଘଟିଛି। ଆକ୍ରମଣର ଘଟଣା ସିସିଟିଭି କ୍ୟାମେରାରେ କଏଦ ହୋଇଛି। ଏହାର ଏକ ଭିଡିଓ ପ୍ରସ୍ତୁତ କରି ଲୋକମାନେ ଏହାକୁ ସୋସିଆଲ ମିଡିଆରେ ଭାଇରାଲ କରିଥିଲେ। ଭିଡିଓରେ ସୁରକ୍ଷା କର୍ମୀ ମହିଳାଙ୍କ ସହ ଯୁକ୍ତିତର୍କ କରୁଥିବା ଦେଖିବାକୁ ମିଳିଛି। ଏହି ସମୟରେ ସେ ମହିଳାଙ୍କୁ ଚାପୁଡ଼ା ମାରି ତାଙ୍କୁ ଠେଲି ଦେଇଥିଲେ। ମହିଳା ଜଣକ ତଳେ ପଡ଼ିଯାଇ ଉଠିବାକୁ ଚେଷ୍ଟା କରିବାରୁ, ତାଙ୍କ ଗୋଇଠା ମାରିଥିଲେ ସୁରକ୍ଷାକର୍ମୀ। ପୋଲିସ ଅଭିଯୁକ୍ତ ସୁରକ୍ଷାକର୍ମୀଙ୍କ ବିରୋଧରେ ମାମଲା ରୁଜୁ କରି ଗିରଫ କରିଛି। ଏହି ଘଟଣା ପାକିସ୍ତାନରେ ଏବଂ ବିଶେଷ କରି କରାଚିରେ ଜନ ଅସନ୍ତୋଷ ସୃଷ୍ଟି କରିଛି।
ସୂଚନାଯୋଗ୍ୟ, ପୀଡିତା ମହିଳା ଗୁଲିସ୍ତାନ-ଇ-ଜୋହର ଅଞ୍ଚଳରେ ଅବସ୍ଥିତ ନୋମାନ ଗ୍ରାଣ୍ଡ ସିଟିରେ ଥିବା ଏକ ଘରେ କାମ କରନ୍ତି। ସେ ଗର୍ଭବତୀ ଥିବା ପୋଲିସକୁ କହିଛନ୍ତି। ଅଗଷ୍ଟ ୫, ଦିନ ୩ଟାରେ ସେ ତାଙ୍କ ପୁଅଙ୍କୁ ଘରୁ ଖାଇବା ନେଇ ଆସିବାକୁ କହିଥିଲେ। ପୁଅ ଖାଦ୍ୟ ସହିତ ପହଞ୍ଚିଥିଲେ। ସେଠାରେ କିନ୍ତୁ ସୁରକ୍ଷାକର୍ମୀ ତାଙ୍କୁ ଅଟକାଇଥିଲେ। ମହିଳା ବାହାରକୁ ଆସି ସୁରକ୍ଷାକର୍ମୀଙ୍କୁ ନିଜ ପରିଚୟ ଦେଇଥିଲେ ମଧ୍ୟ ସେ ବୁଝି ନ ଥିଲେ। ଏହି କାରଣରୁ ଉଭୟଙ୍କ ମଧ୍ୟରେ ଝଗଡା ହୋଇଥିଲା।
