ନୂଆଦିଲ୍ଲୀ,୬।୧୨: ଶିଆ ୱାକଫ ବୋର୍ଡର ପୂର୍ବତନ ଚେୟାରମ୍ୟାନ ୱାସିମ ରିଜଭି ଇସଲାମ ଛାଡି ସୋମବାର ହିନ୍ଦୁଧର୍ମରେ ଦୀକ୍ଷିତ ହୋଇଛନ୍ତି। କୁରାନର ଆୟତଗୁଡ଼ିକୁ ହଟାଇବା ପାଇଁ ସୁପ୍ରିମକୋର୍ଟରେ ଆବେଦନ କରିଥିବା ୱାସିମ ରିଜଭି ହିନ୍ଦୁଧର୍ମ ଗ୍ରହଣ କରିଛନ୍ତି। ସେ ୱାସିମ ରିଜଭିରୁ ଜିତେନ୍ଦ୍ର ନାରାୟଣ ସିଂ ତ୍ୟାଗି ନାମ ଗ୍ରହଣ କରିଛନ୍ତି। ଗାଜିଆବାଦରେ ଥିବା ଦଶନା ଦେବୀ ମନ୍ଦିର, ଶିବ ଶକ୍ତି ଧାମର ମହନ୍ତ ୟତି ନରସିଂହାନନ୍ଦ ଗିରି ମହାରାଜ ତାଙ୍କୁ ସନାତନ ଧର୍ମ ଗ୍ରହଣ କରାଇଛନ୍ତି।
ଉଲ୍ଲେଖନୀୟ ବିଷୟ ହେଉଛି, ୱାସିମ ରିଜଭି ଯେତେବେଳେ କୁରାନର ପଦଗୁଡିକ ହଟାଇବା ପାଇଁ ସୁପ୍ରିମକୋର୍ଟରେ ଆବେଦନ କରିଥିଲେ ସେତେବେଳେ ସେ ଲାଇମଲାଇଟକୁ ଆସିଥିଲେ। କେତେକ ସଂଖ୍ୟାଲଘୁ ସଂଗଠନ ତାଙ୍କ ବିରୁଦ୍ଧରେ ଠିଆ ହୋଇଥିଲେ। ୱାସିମ ରିଜଭିଙ୍କ ପୁସ୍ତକକୁ ନେଇ ଅନେକ ବିବାଦ ମଧ୍ୟ ହୋଇଥିଲା। ବହୁ ହିନ୍ଦୁ ଧର୍ମର ନେତା ୱାସିମ ରିଜଭି ହିନ୍ଦୁ ହେବାକୁ ସ୍ବାଗତ କରିଛନ୍ତି।
କିଛି ଦିନ ପୂର୍ବରୁ ୱାସିମ ରିଜଭି ତାଙ୍କ ଇଚ୍ଛା ପତ୍ରରେ ଲେଖିଥିଲେ ଯେ ମୃତ୍ୟୁ ପରେ ତାଙ୍କୁ କବର ଦେବା ପରିବର୍ତ୍ତେ ତାଙ୍କୁ ହିନ୍ଦୁ ରୀତିନୀତି ଅନୁଯାୟୀ ଶବଦାହ କରାଯିବା ଉଚିତ। ତେବେ ମୁସଲମାନ ସମ୍ପ୍ରଦାୟ କହିଛି ଯେ ଏହି ପ୍ରସଙ୍ଗରେ ଇସଲାମ ଏବଂ ଶିଆ ସମ୍ପ୍ରଦାୟର ସହିତ କୌଣସି ସମ୍ପର୍କ ନାହିଁ।
କିଛି ଦିନ ପୂର୍ବରୁ ୱାସିମ ରିଜଭି ଏକ ଭିଡିଓ ଜାରି କରି କହିଥିଲେ ଯେ ତାଙ୍କୁ ହତ୍ୟା କରିବା ପାଇଁ ଷଡଯନ୍ତ୍ର କରାଯାଉଛି। ମୌଳବାଦୀମାନେ ତାଙ୍କ ଜୀବନ ନେବାକୁ ଚାହୁଁଛନ୍ତି। ସେ କୁରାନର ୨୬ ଆୟତ ହଟାଇବା ପାଇଁ ସୁପ୍ରିମକୋର୍ଟରେ ଏକ ଆବେଦନ କରିଛନ୍ତି। ସେଥିପାଇଁ ଏହା କରାଯାଉଛି ବୋଲି ସେ କହିଥିଲେ। ସେ ଇଛା ପ୍ରକାଶ କରିଛନ୍ତି ଯେ ମୃତ୍ୟୁ ପରେ ତାଙ୍କର ଶେଷ ରୀତିନୀତିରେ ସମୟରେ ମହନ୍ତ ୟତି ନରସିଂହାନନ୍ଦ ଗିରି ମହାରାଜ ମୁଖାଗ୍ନି ଦେବେ।
ୱାସିମ ରିଜଭି ଦୀର୍ଘ ଦିନ ଧରି ମୌଳବାଦୀଙ୍କ ଟାର୍ଗେଟରେ ରହିଆସିଛନ୍ତି। ମୌଳବାଦୀଙ୍କ ବିରୋଧରେ ସେ ଖୋଲାଖୋଲି ଭାବେ ସ୍ବର ଉତ୍ତୋଳନ କରୁଛନ୍ତି।
