ନୂଆଦିଲ୍ଲୀ,୧୧।୨: ଟିମ୍ ଇଣ୍ଡିଆର ପୂର୍ବତନ ଓପନର୍ ଓ୍ବାସିମ୍ ଜାଫର ଶୁକ୍ରବାର ଇଣ୍ଡିଆନ୍ ପ୍ରିମିୟର ଲିଗ୍(ଆଇପିଏଲ୍) ଫ୍ରାଞ୍ଚାଇଜ୍ ପଞ୍ଜାବ କିଙ୍ଗ୍ସର ବ୍ୟାଟିଂ ପ୍ରଶିକ୍ଷକ ପଦରୁ ଇସ୍ତଫା ଦେଇଛନ୍ତି। ମୁମ୍ବାଇର ପୂର୍ବତନ ରଣଜୀ କିମ୍ବଦନ୍ତୀ କ୍ରିକେଟରଙ୍କ ଏହି ନିଷ୍ପତ୍ତି ଆଇପିଏଲ୍ ୨୦୨୨ ମେଗା ନିଲାମ ପୂର୍ବରୁ ଆସିଛି। ଗୋଟିଏ ପଟେ ଫ୍ରାଞ୍ଚାଇଜ୍ଗୁଡ଼ିକ ପକ୍ଷରୁ ରଣନୀତି ପ୍ରସ୍ତୁତ ହେଉଥିବା ବେଳେ ଜାଫରଙ୍କ ଏହି ନିଷ୍ପତ୍ତି ପଞ୍ଜାବକୁ ଶକ୍ତ ଝଟ୍କା ଦେଇଥିବା ଚର୍ଚ୍ଚା ହେଉଛି।
ସୋସିଆଲ ମିଡିଆରେ ପୋଷ୍ଟ କରି ଜାଫର ଫ୍ରାଞ୍ଚାଇଜ୍କୁ ଧନ୍ୟବାଦ ଜଣାଇଛନ୍ତି। ଏହାଛଡ଼ା ସେ ମୁଖ୍ୟ କୋଚ୍ ଅନିଲ କୁମ୍ବଲେଙ୍କୁ ଆଗାମୀ ଆଇପିଏଲ୍ ସିଜନ ପାଇଁ ଶୁଭକାମନା ଜଣାଇଛନ୍ତି। ପୋଷ୍ଟରେ ଜାଫର ଲୋକପ୍ରିୟ ବଲିଉଡ୍ ଗୀତ ‘ଚନ୍ନା ମେରିୟା’ର ଏକ ଫଟୋ ଟୁଇଟ୍ କରି ଏହା କହିଛନ୍ତି।
କହିରଖୁଛୁ, ଗତ ଦୁଇ ସିଜନରୁ ପଞ୍ଜାବର ଅଧିନାୟକ ଥିବା କେ.ଏଲ୍.ରାହୁଲ ଏବଂ ପଞ୍ଜାବ କିଙ୍ଗ୍ସର ସହକାରୀ ପ୍ରଶିକ୍ଷକ ଆଣ୍ଡି ଫ୍ଲାଓ୍ବାର ଦଳ ସହ ନ ରହିବାକୁ ନିଷ୍ପତ୍ତି ନେଇଥିଲେ।
