ହାଇଦ୍ରାବାଦ,୧ା୧୦: ବାବ୍ରି ମସ୍ଜିଦ ଧ୍ୱଂସ ମାମଲାରେ ସ୍ବତନ୍ତ୍ର ସିବିଆଇ କୋର୍ଟ ସମସ୍ତ ଅଭିଯୁକ୍ତଙ୍କୁ ନିର୍ଦ୍ଦୋଷରେ ଖଲାସ କରିଛନ୍ତି। ମସ୍ଜିଦ ଭଙ୍ଗା ଘଟଣା ଯୋଜନାବଦ୍ଧ ନ ଥିଲା, ଆକସ୍ମିକ ଥିଲା ବୋଲି କୋର୍ଟ କହିଛନ୍ତି। ଏହାକୁ ନେଇ ହାଇଦ୍ରାବାଦ ଏମ୍ପି ତଥା ଏଆଇଏମ୍ଆଇଏମ୍ ପାର୍ଟି ମୁଖ୍ୟ ଅସାଦୁଦ୍ଦିନ ଓୱାଇସି ଗଭୀର କ୍ଷୋଭ ପ୍ରକାଶ କରି ଭାରତୀୟ ନ୍ୟାୟପାଳିକାର କଳାଦିନ ବୋଲି କହିଛନ୍ତି। ‘କୋର୍ଟଙ୍କ ରାୟ କେବଳ ହିନ୍ଦୁତ୍ୱ ବିଚାରକୁ ସନ୍ତୁଷ୍ଟ କରିବ, ଭାରତୀୟ ମୁସଲମାନ ନ୍ୟାୟ ପାଇନାହାନ୍ତି। ମୁଁ ଜଣେ ଭାରତୀୟ ମୁସଲମାନ ଭାବରେ ଆଜି ନିଜକୁ ଅପମାନିତ ଏବଂ ଅସହାୟ ମନେ କରୁଛି। ଠିକ୍ ଯେପରି ୧୯୯୨ରେ, ଯେତେବେଳେ ମୁଁ ଯୁବକ ଥିଲି ବୋଲି ଓଓ୍ବାଇସି କହିଛନ୍ତି। ଓଓ୍ବାଇସି କହିଛନ୍ତି ଯେ, ‘ବାବ୍ରି ମସ୍ଜିଦ୍ ଭଙ୍ଗାଯିବା ଆଇନର ଗୁରୁତର ଉଲ୍ଲଂଘନ ବୋଲି ସୁପ୍ରିମ୍କୋର୍ଟ ଗତବର୍ଷ ନଭେମ୍ବର ୯ରେ ଅଯୋଧ୍ୟା ଜମି ବିବାଦ ମାମଲାର ରାୟ ପ୍ରକାଶ କରି କହିଥିଲେ। ହେଲେ ସୁପ୍ରିମ୍କୋର୍ଟଙ୍କ ଉକ୍ତ ରାୟକୁ ବିରୁଦ୍ଧାଚରଣ କରୁଛି ସିବିଆଇ କୋର୍ଟଙ୍କ ଏହି ରାୟ। ସେ ରାୟ ଉପରେ ପ୍ରଶ୍ନ ପଚାରିଛନ୍ତି ଯେ, ମସ୍ଜିଦ୍ ଭଙ୍ଗାଯିବା, ମୂର୍ତ୍ତି ରଖାଯିବା ଏବଂ ମସ୍ଜିଦ ତାଲା ଖୋଲାଯିବା ମ୍ୟାଜ୍ ଥିଲା କି? ଲାଲକୃଷ୍ଣ ଆଡ଼ଭାନୀ ସମଗ୍ର ଦେଶରେ ରଥଯାତ୍ରା କରିଥିଲେ। ଫଳରେ ସବୁ ସ୍ଥାନରେ ହିଂସା ହୋଇଥିଲା। ଉମା ଭାରତୀ ସ୍ଲୋଗାନ ଦେଇଥିଲେ ଯେ, ଆଉ ଏକ ଧକ୍କା ଦିଅ ବାବ୍ରି ମସ୍ଜିଦ ଭାଙ୍ଗି ଦିଅ। ଯେତେବେଳେ ବାବ୍ରି ମସ୍ଜିଦ ଭଙ୍ଗାଯାଉଥିଲା ସେତେବେଳେ ମିଠା ବଣ୍ଟାଯାଉଥିଲା। ଆଡ଼ଭାନୀ, ମୁରଲୀ ମନୋହର ଜୋଷୀ, ଉମା ଭାରତୀ ଓ ଅନ୍ୟମାନେ ଖୁସି ମନାଉଥିଲେ। ଏହି ସବୁ କ’ଣ ସତ୍ୟ ନୁହେଁ କି ବୋଲି ଓଓ୍ବାଇସି ପ୍ରଶ୍ନ କରିଛନ୍ତି। ସେ ଆହୁରି କହିଛନ୍ତି ଯେ, ବାବ୍ରି ମସ୍ଜିଦ୍ ଭାଙ୍ଗିଥିବା ନେଇ ଯେଉଁ ଅଭିଯୁକ୍ତ ଭଗବାନ ଗୋୟଲ କୋର୍ଟ ବାହାରେ ସ୍ବୀକାର କରିଛନ୍ତି ତାଙ୍କୁ କୋର୍ଟ ନିର୍ଦ୍ଦୋଷରେ ଖଲାସ କରିଛନ୍ତି। ଏନେଇ ସେ ଟୁଇଟ୍ ଯୋଗେ ଏକ ଶାୟରୀ ପୋଷ୍ଟ କରିଛନ୍ତି ଯେ, ‘ଓ୍ବହି କାତିଲ୍ ଓ୍ବହି ମୁନ୍ସିଫ୍ ଅଦାଲତ ଉସ୍ କି ଓ୍ବ ଶାହିଦ୍, ବହୁତ ସେ ଫୈସଲେଁା ମୈ ଅବ୍ ତରଫ-ଦାରୀ ଭି ହୋତି ହେ’।
