ବାରଙ୍ଗ,୨୬।୧୨(ଲିଙ୍ଗରାଜ ରାଉତ)- ନନ୍ଦନକାନନ ଆସନ୍ତା ୨୯ରେ ୬୪ତମ ପ୍ରତିଷ୍ଠା ଦିବସ ପାଳିବାକୁ ଯାଉଛି। ନନ୍ଦନକାନନ ସବୁବର୍ଷ ପର୍ଯ୍ୟଟକଙ୍କୁ ନୂଆବର୍ଷର ଭେଟି ଦେଉଥିବାବେଳେ ଚଳିତବର୍ଷ ପ୍ରତିଷ୍ଠା ଦିବସରେ ପର୍ଯ୍ୟଟକଙ୍କୁ ନୂଆ ପ୍ରଜାତିର (କଙ୍ଗାରୁ ଜାତୀୟ)ୱାଲାବି ଭେଟି ଦେବାକୁ ଯାଉଛି। ଶୁକ୍ରବାର ରାତିରେ ହଳେ ୱାଲାବି ଓ ହଳେ ଲିଭିଂଷ୍ଟୋନ ଟୁରାକୋ ନନ୍ଦନକାନନରେ ଆସି ପହଞ୍ଚିଛି। ହାଇଦ୍ରାବାଦର ଏକ ଘରୋଇ ସଂସ୍ଥାଠାରୁ ପ୍ରାୟ ୨୦ ଲକ୍ଷ ଟଙ୍କାରେ କ୍ରୟ କରାଯାଇ ୪ ଅତିଥିଙ୍କୁ ନନ୍ଦନକାନନକୁ ଅଣାଯାଇଛି। ୱାଲାବି ଆସିବା ପରେ ସ୍ବାସ୍ଥ୍ୟ ପରୀକ୍ଷା କରାଯାଇ କ୍ବାରେଣ୍ଟାଇନରେ ରଖାଯାଇଛି। ଏହା ପରେ ନୂଆ ହୋଇଥିବା ଏନ୍କ୍ଲୋଜରରେ ଛଡ଼ାଯିବ। ପ୍ରତିଷ୍ଠା ଦିବସରେ ଉକ୍ତ ଏନ୍କ୍ଲୋଜରର ଉଦ୍ଘାଟନ କରାଯିବା ପରେ ପର୍ଯ୍ୟଟକମାନେ ଏହାକୁ ଦେଖିପାରିବେ ବୋଲି ନନ୍ଦନକାନନ ଉପନିର୍ଦ୍ଦେଶକ ସନଥ୍ କୁମାର ନାରାୟଣ କହିଛନ୍ତି। ତେବେ ଚଳିତବର୍ଷ ପ୍ରତିଷ୍ଠା ଦିବସରେ ବଟାନିକାଲ ଗାର୍ଡେନରେ ନୂଆ କରି ହୋଇଥିବା ଜଳଜ ଉଭିଦ ଆକ୍ୱାରିୟମ, ବିଭିନ୍ନ ପ୍ରଜାତିର ବାଉଁଶକୁ ନେଇ କରାଯାଇଥିବା ବଗିଚା, ବାଘୁଣୀ ଅଙ୍କିତାର ୪ ଛୁଆଙ୍କ ନାମକରଣ କରାଯିବ ବୋଲି ଜଣାପଡ଼ିଛି।
