ମସ୍କେ,୨୪।୮: ଏକ ବିମାନ ଦୁର୍ଘଟଣାରେ ୱାଗନର୍ ଗ୍ରୁପ୍ର ମୁଖ୍ୟ ୟେଭ୍ଗେନି ପ୍ରିଗୋଝିନଙ୍କ ଦେହାନ୍ତ ହୋଇଛି। ଦୁଇ ମାସ ପୂର୍ବେ ଅର୍ଥାତ୍ ଜୁନ ଶେଷରେ ପ୍ରିଗୋଝିନ ରୁଷିଆର ସେନା ବିରୋଧରେ ବିଦ୍ରୋହ ଘୋଷଣା କରିଥିଲେ। ସେବେଠାରୁ ରୁଷିଆର ରାଷ୍ଟ୍ରପତି ଭ୍ଲାଡିମିର ପୁଟିନ ଏବଂ ୱାଗନର୍ ମୁଖ୍ୟଙ୍କ ମଧ୍ୟରେ ସମ୍ପର୍କ ସ୍ବାଭାବିକ ନ ଥିଲା।
ୱାଗନର୍ ଗ୍ରୁପ ମୁଖ୍ୟ ପ୍ରିଗୋଝିନଙ୍କ ମୃତ୍ୟୁ ପରେ ରୁଷିଆ ରାଷ୍ଟ୍ରପତି ଭ୍ଲାଦିମିର ପୁଟିନଙ୍କ ଏକ ପୁରୁଣା ଭିଡିଓ ଭାଇରାଲ ହେବାରେ ଲାଗିଛି। ଏହି ଭିଡିଓରେ ସେ କହିଛନ୍ତି ଯେ, ଯେଉଁମାନେ ପ୍ରତାରଣା କରନ୍ତି ମୁଁ ସେମାନଙ୍କୁ କ୍ଷମା କରେ ନାହିଁ।
୨୦୧୮ରେ ପୁଟିନଙ୍କୁ ଏକ ସାକ୍ଷାତକାରରେ ପଚରା ଯାଇଥିଲା ଯେ, ତୁମ ନଜରରେ କିଛି କ୍ଷମା ଯୋଗ୍ୟ ବ୍ୟକ୍ତି ଅଛନ୍ତି କି? ଏହାର ଜବାବରେ ରାଷ୍ଟ୍ରପତି ପୁଟିନ କହନ୍ତି, ହଁ ଅଛନ୍ତି କିନ୍ତୁ ସମସ୍ତେ ନୁହଁନ୍ତି। ଏହା ବ୍ୟତୀତ ତାଙ୍କୁ ପଚରାଯାଇଥିଲା, ତାଙ୍କୁ କ୍ଷମା ନ କରିବାର ସର୍ତ୍ତ କ’ଣ? ଧୋକା ଦେଉଥିବା ବ୍ୟକ୍ତିଙ୍କୁ ମୁଁ ଆଦୌ କ୍ଷମା ଦିଏ ନାହିଁ ବୋଲି କହନ୍ତି ପୁଟିନ।
ସୂଚନାଯୋଗ୍ୟ,ରୁଷିଆ ରାଜଧାନୀ ମସ୍କୋରୁ ସେଣ୍ଟ ପିଟର୍ସବର୍ଗ ଅଭିମୁଖେ ଯାଉଥିବା ଏକ ବିଜନେସ୍ସ ଜେଟ ବୁଧବାର ଦୁର୍ଘଟଣାଗ୍ରସ୍ତ ହୋଇଛି। ଏହି ଦୁର୍ଘଟଣାରେ ବିମାନରେ ଥିବା ସମସ୍ତ ୧୦ ଯାତ୍ରୀଙ୍କ ମୃତ୍ୟୁ ଘଟଛି। ଯାତ୍ରୀ ତାଲିକାରେ ରୁଷିଆର ଘରୋଇ ସେନା ଓ୍ବାଗନର ମୁଖ୍ୟ ୟେଭ୍ଗେନି ପ୍ରିଗୋଝିନ ଥିବା କୁହାଯାଉଛି। ଜୁନ ଶେଷ ଆଡ଼କୁ ପ୍ରିଗୋଝିନ ରୁଷିଆ ସେନା ବିରୋଧରେ ସଶସ୍ତ୍ର ବିଦ୍ରୋହ କରି ନିଜ ସୈନ୍ୟଙ୍କ ସହ ମସ୍କୋ ଅଭିମୁଖେ ଅଗ୍ରସର ହୋଇଥିଲେ। ରୁଷିଆ ରାଷ୍ଟ୍ରପତି ଭ୍ଲାଡିମିର ପୁଟିନଙ୍କ ଘନିଷ୍ଠ ସହଯୋଗୀ ତଥା ବେଲାରୁଷ ରାଷ୍ଟ୍ରପତି ଆକେଲକଜାଣ୍ଡାର ଲୁକାସେନେକୋଙ୍କ ହସ୍ତକ୍ଷେପ ପରେ ଓ୍ବାଗନର୍ ସେନା ପଛଘୁଞ୍ଚା ଦେଇଥିଲା। ପରବର୍ତ୍ତୀ ସମୟରେ ପ୍ରିଗୋଝିନଙ୍କ ସୈନ୍ୟ ବେଲାରୁଷରେ ଥିବା ୟୁକ୍ରେନ ବିରୋଧୀ ଶିବିରଗୁଡିକରେ ଅବସ୍ଥାନ କରିଥିବା କୁହାଯାଇଥିଲା। ଅନ୍ୟପଟେ ଦେଶ ତଥା ଦେଶ ବାହାରେ ଜଣେ ପରେ ଜଣେ ପୁଟିନ ବିରୋଧୀ ଓ ସମାଲୋଚକଙ୍କ ରହସ୍ୟଜନକ ମୃତ୍ୟୁ ଘଟି ଚାଲିଥିବାରୁ ସଦ୍ୟ ବିମାନ ଦୁର୍ଘଟଣାକୁ ନେଇ ଅନେକ ପ୍ରଶ୍ନବାଚୀ ଛିଡ଼ା ହୋଇଛି।
