ନୂଆଦିଲ୍ଲୀ,୨୬।୩ : ୨୦୨୩-୨୪ ଆର୍ଥିକ ବର୍ଷ ପାଇଁ ଗ୍ରାମୀଣ ରୋଜଗାର ଗ୍ୟାରେଣ୍ଟି ଯୋଜନା ଅନ୍ତର୍ଗତ ମଜୁରୀ ହାର ବୃଦ୍ଧି ପାଇଁ କେନ୍ଦ୍ର ସରକାର ଅଧିସୂଚନା ଜାରି କରିଛନ୍ତି। ହରିୟାଣାର ଦୈନିକ ସର୍ବାଧିକ ମଜୁରୀ ୩୫୭ ଟଙ୍କା ଥିବାବେେଳେ ମଧ୍ୟପ୍ରଦେଶ ଏବଂ ଛତିଶଗଡରେ ସର୍ବନିମ୍ନ ସ୍ଥିର ମଜୁରୀ ଦିନକୁ ୨୨୧ ଟଙ୍କା ରହିଛି।
କେନ୍ଦ୍ର ଗ୍ରାମ୍ୟ ଉନ୍ନୟନ ମନ୍ତ୍ରଣାଳୟ ୨୪ ମାର୍ଚ୍ଚରେ ମହାତ୍ମା ଗାନ୍ଧୀ ଜାତୀୟ ଗ୍ରାମୀଣ ନିଯୁକ୍ତି ଗ୍ୟାରେଣ୍ଟି ଯୋଜନା ଅଧୀନରେ ବେତନ ହାରରେ ପରିବର୍ତ୍ତନ ସମ୍ପର୍କରେ ବିଜ୍ଞପ୍ତି ଜାରି କରିଛି। ମହାତ୍ମା ଗାନ୍ଧୀ ଜାତୀୟ ଗ୍ରାମୀଣ ନିଯୁକ୍ତି ଗ୍ୟାରେଣ୍ଟି ଆକ୍ଟ (ମନରେଗା), ୨୦୦୫ ର ଧାରା ୬(୧) ଅନୁଯାୟୀ ଏହି ବିଜ୍ଞପ୍ତି ଜାରି କରାଯାଇଛି। ମଜୁରୀ ୭ ରୁ ୨୬ ଟଙ୍କା ପର୍ଯ୍ୟନ୍ତ ବୃଦ୍ଧି କରାଯାଇଛି। ଏପ୍ରିଲ ୨ ତାରିଖରୁ ଏହା କାର୍ଯ୍ୟକାରୀ ହେବ।
ପୂର୍ବ ବର୍ଷର ହାର ତୁଳନାରେ ରାଜସ୍ଥାନ ସର୍ବାଧିକ ମଜୁରୀ ବୃଦ୍ଧି ପଞ୍ଜିକରଣ କରିଛି। ରାଜସ୍ଥାନ ପାଇଁ ସଂଶୋଧିତ ମଜୁରୀ ଦିନକୁ ୨୫୫ ଟଙ୍କା ରହିଛି। ୨୦୨୨-୨୩ ରେ ଏହା ୨୩୧ ଟଙ୍କା ଥିଲା। ଗତ ବର୍ଷ ତୁଳନାରେ ବିହାର ଏବଂ ଝାଡଖଣ୍ଡରେ ପ୍ରାୟ ଆଠ ପ୍ରତିଶତ ବୃଦ୍ଧି ପଞ୍ଜିକୃତ ହୋଇଛି। ଗତ ବର୍ଷ ଏହି ଦୁଇ ରାଜ୍ୟରେ ମନରେଗା ଶ୍ରମିକଙ୍କ ଦୈନିକ ମଜୁରୀ ୨୧୦ ଟଙ୍କା ଥିଲା। ବର୍ତ୍ତମାନ ଏହାକୁ ୨୨୮ ଟଙ୍କାକୁ ସଂଶୋଧନ କରାଯାଇଛି।
ଛତିଶଗଡ ଏବଂ ମଧ୍ୟପ୍ରଦେଶ ପାଇଁ ସର୍ବନିମ୍ନ ଦୈନିକ ମଜୁରୀ ୨୨୧ ଟଙ୍କା ରହିଛି। ପୂର୍ବ ବର୍ଷ ତୁଳନାରେ ଏଥିରେ ୧୭ ପ୍ରତିଶତ ବୃଦ୍ଧି ରେକର୍ଡ କରାଯାଇଛି। ୨୦୨୨-୨୩ ମସିହାରେ ଉଭୟ ରାଜ୍ୟରେ ଦୈନିକ ମଜୁରୀ ୨୦୪ ଟଙ୍କା ଥିଲା। ରାଜ୍ୟମାନଙ୍କ ପାଇଁ ମଜୁରୀ ବୃଦ୍ଧି ଦୁଇରୁ ୧୦ ପ୍ରତିଶତ ମଧ୍ୟରେ ରହିଛି। ସର୍ବନିମ୍ନ ପ୍ରତିଶତ ବୃଦ୍ଧି ପଞ୍ଜିକୃତ ରାଜ୍ୟଗୁଡ଼ିକ ମଧ୍ୟରେ କର୍ନାଟକ, ଗୋଆ, ମେଘାଳୟ ଏବଂ ମଣିପୁର ରହିଛନ୍ତି।
