ଅହମଦାବାଦ,୫।୧୨ : ଶେଷ ଏବଂ ଦ୍ୱିତୀୟ ପର୍ଯ୍ୟାୟ ମତଦାନ ପାଇଁ ସୋମବାର ଗୁଜରାଟର ୧୪ ଟି ଜିଲ୍ଲାର ୯୩ ଟି ଆସନରେ ସକାଳ ୮ ଟାରୁ ମତଦାନ ଆରମ୍ଭ ହୋଇଛି। ଏଥିମଧ୍ୟରେ କେନ୍ଦ୍ରୀୟ ଏବଂ ଉତ୍ତର ଜିଲ୍ଲାର ୧୫ ଟି ସିଟ ଅନ୍ତର୍ଭୁକ୍ତ। ୬୧ ଟି ରାଜନୈତିକ ଦଳର ୮୩୩ ଜଣ ପ୍ରାର୍ଥୀଙ୍କ ଭାଗ୍ୟ ନିର୍ଣ୍ଣୟ ହେବ। ରାଜ୍ୟ ନିର୍ବାଚନ ଆୟୋଗ ଅନୁଯାୟୀ, ପ୍ରାର୍ଥୀମାନଙ୍କ ମଧ୍ୟରେ ୨୮୫ ସ୍ବାଧୀନ ପ୍ରାର୍ଥୀ ରହିଛନ୍ତି। ଦ୍ୱିତୀୟ ପର୍ଯ୍ୟାୟରେ ଅନେକ ଭିଆଇପି ପ୍ରାର୍ଥୀଙ୍କ ଭାଗ୍ୟର ଫଇସଲା ହେଉଛି।
ଭାଜପା ଏବଂ ଦିଲ୍ଲୀ ମୁଖ୍ୟମନ୍ତ୍ରୀ ଅରବିନ୍ଦ କେଜରିୱାଲଙ୍କ ନେତୃତ୍ୱରେ ଏଏପି ସମସ୍ତ ୯୩ଟି ଆସନରେ ପ୍ରତିଦ୍ୱନ୍ଦ୍ୱିତା କରୁଛି। କଂଗ୍ରେସ ୯୦ଟି ଆସନରେ ପ୍ରତିଦ୍ୱନ୍ଦ୍ୱିତା କରୁଛି ଏବଂ ଏହାର ସହଯୋଗୀ ଜାତୀୟତାବାଦୀ କଂଗ୍ରେସ ପାର୍ଟି (ଏନସିପି) ଦୁଇଟି ଆସନରେ ପ୍ରାର୍ଥୀ ରଖିଛି। ଭିଆଇପି ପ୍ରାର୍ଥୀଙ୍କ ମଧ୍ୟରେ ରାଜ୍ୟ ମୁଖ୍ୟମନ୍ତ୍ରୀ ଭୁପେନ୍ଦ୍ର ପଟେଲ ଘାଟଲୋଡିଆରୁ, ବିରାମଗାମର ଭାଜପା ନେତା ହାର୍ଦ୍ଦିକ ପଟେଲ ଏବଂ ଗାନ୍ଧିନଗର ଦକ୍ଷିଣ ଅଞ୍ଚଳର ଭାଜପାର ଆଲପେଶ ଠାକୋର ପ୍ରତିଦ୍ୱନ୍ଦ୍ୱିତା କରୁଛନ୍ତି।
ଏଥିସହ ଜିଗ୍ନେଶ ମେଭାନୀ ବନାସକାଣ୍ଠା ଜିଲାର ବଡ଼ଗାମ ଆସନରୁ କଂଗ୍ରେସ ପ୍ରାର୍ଥୀ ଭାବରେ ପ୍ରତିଦ୍ୱନ୍ଦ୍ୱିତା କରୁଛନ୍ତି ଏବଂ ଗୁଜରାଟ ବିଧାନସଭାରେ ବିରୋଧୀ ଦଳର ନେତା ସୁଖରାମ ରାଠଓ୍ବା ଛୋଟା ଉଦୟପୁର ଜିଲାର ଜେତପୁରରୁ ପ୍ରାର୍ଥୀ ହୋଇଛନ୍ତି। ବଡୋଦରା ଜିଲାର ୱାଘୋଡିଆ ଆସନରୁ ଜଣେ ସ୍ବାଧୀନ ପ୍ରାର୍ଥୀ ଭାବରେ ଭାଜପା ବିଦ୍ରୋହୀ ମଧୁ ଶ୍ରୀବାସ୍ତବ ପ୍ରତିଦ୍ୱନ୍ଦ୍ୱିତା କରୁଛନ୍ତି।
