ରାୟଗଡ଼ା,୯।୧୦(ଆଶିଷ ରଞ୍ଜନ ପଣ୍ଡା)-ରାୟଗଡ଼ା ପୌର ପରିଷଦ ଉପାଧ୍ୟକ୍ଷା ଶୁଭ୍ରା ପଣ୍ଡାଙ୍କ ବିରୋଧରେ ଅନାସ୍ଥା ପ୍ରସ୍ତାବ ପାଇଁ ଗୁରୁବାର ପୌର କାର୍ଯ୍ୟାଳୟରେ ମତଦାନ ଅନୁଷ୍ଠିତ ହୋଇଯାଇଛି। ନିର୍ବାଚନ ଅଧିକାରୀ ତଥା ଉପଜିଲାପାଳ ରମେଶ କୁମାର ଜେନାଙ୍କ ପ୍ରତ୍ୟକ୍ଷ ତତ୍ତ୍ୱାବଧାନରେ ଏହି ଭୋଟିଂ ପ୍ରକ୍ରିୟା ଅନୁଷ୍ଠିତ ହୋଇଥିଲା । ପୌର ପରିଷଦର ୨୪ଜଣ କାଉନସିଲରଙ୍କ ମଧ୍ୟରୁ ଭାଜପାର ୨ଜଣ ଏବଂ କଂଗ୍ରେସର ଜଣେ କାଉନସିଲରଙ୍କ ବ୍ୟତୀତ ଅନ୍ୟ ୨୧ଜଣ ବିଜେଡି କାଉନସିଲର ଭୋଟିଂ ପ୍ରକ୍ରିୟାରେ ଅଂଶଗ୍ରହଣ କରି ମତଦାନ କରିଥିଲେ ।
ହେଲେ ଅନାସ୍ଥା ପ୍ରସଙ୍ଗରେ ରହିତାଦେଶ ପାଇଁ ଉପାଧ୍ୟକ୍ଷା ଶୁଭ୍ରା ପୂର୍ବରୁ ହାଇକୋର୍ଟଙ୍କ ଦ୍ୱାରସ୍ଥ ହୋଇଥିଲେ । ଏହି ମାମଲାରେ ଗୁରୁବାର ହାଇକୋର୍ଟ ଜଷ୍ଟିସ୍ ଭି.ନରସିଂହ ଶୁଣାଣିକରି ନିର୍ବାଚନ ଫଳାଫଳ ଘୋଷଣା ଉପରେ ରହିତାଦେଶ ଜାରି କରିଛନ୍ତି। ଆସନ୍ତା ୧୫ତାରିଖରେ ପରବର୍ତ୍ତୀ ଶୁଣାଣି ହେବା ନେଇ ରାୟ ପ୍ରକାଶ ପାଇଛି। ଯେହେତୁ ନିର୍ବାଚନର ସମସ୍ତ ପ୍ରକ୍ରିୟା ଆରମ୍ଭ ହୋଇସାରିଛି, ତେଣୁ ଫଳାଫଳ ଘୋଷଣା ବ୍ୟତୀତ ଅନ୍ୟ ସମସ୍ତ ପ୍ରକ୍ରିୟା ଉପରେ ରହିତାଦେଶ ରାୟ ଦେଇନାହାନ୍ତି ଜଷ୍ଟିସ୍ ନରସିଂହ । ହାଇକୋର୍ଟଙ୍କ ନିର୍ଦ୍ଦେଶ ପ୍ରକାରେ ନିର୍ବାଚନ କାର୍ଯ୍ୟ ହୋଇଥିବା ନିର୍ବାଚନ ଅଧିକାରୀ ତଥା ଉପଜିଲାପାଳ ଜେନା କହିଛନ୍ତି। ନିର୍ବାଚନ ପରେ ସମସ୍ତ ବାଲଟ ବକ୍ସ ସିଲ୍କରି ଜିଲା କୋଷାଗାରଠାରେ ରଖାଯାଇଛି।
ନିର୍ବାଚନ ପାଇଁ ହୋଇଥିବା ପୂର୍ବ ଘୋଷଣା ପ୍ରକାରେ ସକାଳ ୧୧ଟା ବେଳେ ପୌର ପରିଷଦ କାର୍ଯ୍ୟାଳୟ ପରିସରରେ ଭୋଟିଂ ହୋଇଥିଲା। ଅନାସ୍ଥା ପ୍ରସ୍ତାବ ଆଣିଥିବା ୧୯ ଜଣ କାଉନସିଲରଙ୍କ ସମେତ ଉପାଧ୍ୟକ୍ଷା ଓ ୧୩ ନଂ. ୱାର୍ଡର କାଉନସିଲର ପ୍ରତିମା ପାଣିଗ୍ରାହୀ ଉପସ୍ଥିତ ରହି ଭୋଟଦାନ କରିଥିଲେ। ମୋଟ ୨୧ ଜଣ କାଉନସିଲର ଉପସ୍ଥିତ ଥିବା ଦେଖିବାକୁ ମିଳିଥିଲା। ପ୍ରତିମା ଅସୁସ୍ଥ ଥିବାରୁ ହୁଇଲ ଚେୟାରରେ ବସି ଭୋଟିଂ ପାଇଁ ଆସିଥିଲେ । ହେଲେ ଅନାସ୍ଥା ଆଣିଥିବା ୧୯ ଜଣ କାଉନସିଲର ଏକାଠି ହୋଇ ଆସିଥିବା ନଜରକୁ ଆସିଥିଲା। ଭୋଟିଂ ପ୍ରକ୍ରିୟା ଶେଷ ହୋଇଥିବା ବେଳେ ଫଳାଫଳକୁ ନେଇ ରାଜନୈତିକ ଉତ୍ସୁକତା ଆରମ୍ଭ ହୋଇଛି। ଗଣତି ବନ୍ଦ କରିଦେଇଥିବାରୁ ଭୋଟ ଗଣତି କାହିଁକି କରାଯିବ ନାହିଁ ବୋଲି କାଉନସିଲରମାନେ ନିର୍ବାଚନ ଅଧିକାରୀ ଜେନାଙ୍କୁ ପ୍ରଶ୍ନ କରିଥିଲେ। ଅଦାଲତ ନିର୍ଦ୍ଦେଶନାମା ଦେଖାଇବା ପାଇଁ ଦାବି କରିଥିଲେ। ତେବେ ନିୟମ ଅନୁସାରେ ଆମେ କାର୍ଯ୍ୟ କରିବୁ କହି ନିର୍ବାଚନ ଅଧିକାରୀ ସମସ୍ତ ବାଲଟ ବକ୍ସ ସିଲ୍ କରିଦେଇଥିଲେ। ଅନ୍ୟପକ୍ଷେ ଅଦାଲତ ନିର୍ଦ୍ଦେଶନାମା ଆସିବା ପରେ ବିଜେଡି ନେତା ଓ କର୍ମୀଙ୍କ ମଧ୍ୟରେ ଉତ୍ସାହ ଦେଖିବାକୁ ମିଳିଥିଲା। ଏ ନେଇ ଉପାଧ୍ୟକ୍ଷା ଶୁଭ୍ରା ପଣ୍ଡା କହିଛନ୍ତି, ସତ୍ୟର ଜୟ ହୋଇଛି। ନବୀନ ପଟ୍ଟନାୟକଙ୍କ ଉପରେ ମୋର ଭରସା ରହିଛି। ଭୋଟିଂ ପ୍ରକ୍ରିୟା ଶାନ୍ତିଶୃଙ୍ଖଳାରେ ପରିଚାଳନା ପାଇଁ ୨ ପ୍ଲାଟୁନ ପୋଲିସ ଫୋର୍ସ ନିୟୋଜିତ ହୋଇଥିଲେ।
ପ୍ରକାଶ ଥାଉକି, ଏହି ମାମଲାରେ ବିଜେଡି ରାଜ୍ୟ ସଭାପତି ନବୀନ ପଟ୍ଟନାୟକ ସମସ୍ତ ବିଜେଡି କାଉନସିଲରଙ୍କୁ ହୁଇପ୍ ଜାରି କରିଥିଲେ। ଅନାସ୍ଥା ପ୍ରସ୍ତାବ ପାଇଁ ହେବାକୁ ଥିବା ଭୋଟିଂରେ ସମସ୍ତେ ଉପସ୍ଥିତ ରହି ଅନାସ୍ଥା ବିରୋଧରେ ଭୋଟ ଦେବାକୁ ନୋଟିସ ଜାରି କରିଥିଲେ। ଯଦି କୌଣସି କାଉନସିଲର ଏହି ନିର୍ଦ୍ଦେଶ ବିରୋଧରେ ଯାଆନ୍ତି ତେବେ ଓଡ଼ିଶା ମ୍ୟୁନିସିପାଲ ଆମେଣ୍ଡମେଣ୍ଟ ନିୟମାବଳୀ ୨୦୧୮ର ରୁଲ୍ ୪୬(ଖ) ଅନୁଯାୟୀ ଦଳ ପଦକ୍ଷେପ ଗ୍ରହଣ କରିବ ବୋଲି ଉକ୍ତ ଚିଠିରେ ଉଲ୍ଲେଖ ରହିଛି ।
Dharitri – Odisha’s No.1 Odia Daily
