ବ୍ରହ୍ମପୁର,୨୬ା୨(ଅଶୋକ କୁମାର ସାହୁ): ଗଞ୍ଜାମ ଜିଲା ବ୍ରହ୍ମପୁର ନିକଟସ୍ଥ ଶୀତଳାପଲ୍ଲୀସ୍ଥିତ ପାରଳା ମହାରାଜା ଯାନ୍ତ୍ରିକ ମହାବିଦ୍ୟାଳୟ ପରିସରରେ ଗୁରୁବାର ବ୍ରହ୍ମପୁର ବିଶ୍ୱବିଦ୍ୟାଳୟ ସ୍ତରୀୟ ବିପର୍ଯ୍ୟୟ ପରିଚାଳନା ଏବଂ ପ୍ରାଥମିକ ଚିକିତ୍ସା କାର୍ଯ୍ୟକ୍ରମ ଉଦ୍ଘାଟିତ ହୋଇଯାଇଛି। କାର୍ଯ୍ୟକ୍ରମକୁ କଟକ ନିକଟସ୍ଥ ମୁଣ୍ଡୁଳିଠାରେ ଥିବା ଏନ୍ଡିଆର୍ଏଫ୍ ତୃତୀୟ ବାଟାଲିୟନର ମୁଖ୍ୟ ମେଡିକାଲ ଅଫିସର୍ ଡ. ନବୀନ କୁମାର ମୁଖ୍ୟ ଅତିଥି ଭାବେ ଯୋଗଦେଇ କାର୍ଯ୍ୟକ୍ରମକୁ ଉଦ୍ଘାଟନ କରିଥିଲେ। ଏହି ଅବସରରେ ସେ ପ୍ରାକୃତିକ ବିପର୍ଯ୍ୟୟ ସମୟରେ ସ୍ବେଚ୍ଛାସେବୀଙ୍କ ଭୂମିକା ସମ୍ପର୍କରେ କହିଥିଲେ। ବ୍ରହ୍ମପୁର ବିଶ୍ବବିଦ୍ୟାଳୟ ଜାତୀୟ ସେବା ଯୋଜନା ବ୍ୟୁରୋ ଅଧିକାରୀ ଡ. ଜୟନ୍ତ କୁମାର ପଣ୍ଡା ସମ୍ମାନିତ ଅତିଥି ଭାବେ ଯୋଗଦେଇ ବ୍ରହ୍ମପୁର ବିଶ୍ୱବିଦ୍ୟାଳୟ ଅଧୀନରେ ପ୍ରାୟ ୧୦୦ ଏନ୍ଏସଏସ୍ ଶାଖା ଅଛି ବୋଲି କହିଥିଲେ। ଉକ୍ତ ସମସ୍ତ ଶାଖାରେ ପ୍ରାୟ ୧୦ ହଜାର ସ୍ବେଚ୍ଛାସେବୀ ଅଛନ୍ତି। ସେହିଭଳି ରାଜ୍ୟରେ ପ୍ରାୟ ଦେଢ଼ଲକ୍ଷ ସ୍ବେଚ୍ଛାସେବୀ ଥିବା ବେଳେ ସମଗ୍ର ଦେଶରେ ୪୦ ଲକ୍ଷରୁ ଊଦ୍ଧର୍ବ ସ୍ବେଚ୍ଛାସେବୀ ଅଛନ୍ତି।
ପ୍ରାକୃତିକ ବିପର୍ଯ୍ୟୟ ପରିଚାଳନାରେ ସ୍ବେଚ୍ଛାସେବୀଙ୍କ ଭୂମିକା ଗୁରୁତ୍ୱପୂର୍ଣ୍ଣ। ବିଗତ କିଛି ବର୍ଷ ହେବ ଆମେ ବାରମ୍ବାର ପ୍ରାକୃତିକ ବିପର୍ଯ୍ୟୟର ସମ୍ମୁଖୀନ ହେଉଛନ୍ତି। ବରଫ ତରଲୁଛି। ଜଳବାୟୁ ପରିବର୍ତ୍ତନ ହେଉଛି। ବାରମ୍ବାର ପ୍ରାକୃତିକ ବିପର୍ଯ୍ୟୟ ମଧ୍ୟ ହେଉଛି। ତାହାର ମୁକାବିଲା ପାଇଁ ଜାତୀୟ ସେବା ଯୋଜନା ସ୍ବେଚ୍ଛାସେବୀଙ୍କ ଭୂମିକା ଗୁରୁତ୍ୱପୂର୍ଣ୍ଣ ବୋଲି ପଣ୍ଡା କହିଥିଲେ। ଏଥିସହ ସେ କହିଥିଲେ ଏହି ଶିବିରରେ ପ୍ରାଥମିକ ଚିକିତ୍ସା ଉପରେ ମଧ୍ୟ ତାଲିମ ଦିଆଯିବ। ଦୁର୍ଘଟଣାର ପ୍ରଥମ ଏକ ଘଣ୍ଟା ଆହତଙ୍କୁ ବଞ୍ଚାଇବା ପାଇଁ ଗୁରୁତ୍ୱପୂର୍ଣ୍ଣ ସମୟ। ତେଣୁ ସ୍ବେଚ୍ଛାସେବୀମାନେ କିଭଳି ଜଣେ ଆହତ କିମ୍ବା ହୃଦ୍ଘାତ ବ୍ୟକ୍ତିଙ୍କୁ କିଭଳି ପ୍ରାଥମିକ ଚିକିତ୍ସା ସେବା ଯୋଗାଇ ଦେବେ ତାହାରି ଉପରେ ଡ ପଣ୍ଡା କହିଥିଲେ। ତେଣୁ ଏହାର ମୁକାବିଲା ପାଇଁ ସ୍ବେଚ୍ଛାସେବୀମାନେ ଆଗଭର ହେବାକୁ ପଡ଼ିବ। ରାଜ୍ୟ ସରକାରଙ୍କ ଜାତୀୟ ସେବା ଯୋଜନା ଶାଖା ପକ୍ଷରୁ ଉଚ୍ଚଶିକ୍ଷା ବିଭାଗର ନିର୍ଦ୍ଦେଶ କ୍ରମେ ଏହି କାର୍ଯ୍ୟକ୍ରମ ଅୟୋଜନ କରାଯାଇଛି। ଶିବିରର ମୂଳ ଲକ୍ଷ୍ୟ ହେଲା ସ୍ବେଚ୍ଛାସେବୀମାନଙ୍କୁ ତାଲିମ ଦେବା। ସେମାନେ ଏଠାରୁ ଯାହା ତାଲିମ ଗ୍ରହଣ କଲେ ପରବର୍ତ୍ତୀ ପର୍ଯ୍ୟାୟରେ ତାହାକୁ ଲୋକଙ୍କ ସେବାରେ ଲଗାଇବାକୁ ପଡ଼ିବ। ତା’ହେଲେ ଯାଇ ଶିବିରର ଲକ୍ଷ୍ୟ ସାଧନ ହୋଇପାରିବ ବୋଲି ଡ ପଣ୍ଡା କହିଥିଲେ। ଏଥିପ୍ରତି ଯତ୍ନବାନ ହେବାକୁ ଡ. ପଣ୍ଡା ଉପସ୍ଥିତ ଛାତ୍ରୀଛାତ୍ରଙ୍କୁ ଆହ୍ବାନ କରିଥିଲେ। ପ୍ରଥମ ଅଧିବେଶନରେ ମହାବିଦ୍ୟାଳୟ ଅଧ୍ୟକ୍ଷ ପ୍ରଫେସର ଚିତ୍ତରଞ୍ଜନ ମହାନ୍ତି ଅନ୍ୟତମ ଅତିଥି ଭାବେ ଯୋଗ ଦେଇଥିଲେ। କାର୍ଯ୍ୟକ୍ରମ ଅଧିକାରୀ ଚିତ୍ତରଞ୍ଜନ ମଲ୍ଲିକ ସ୍ୱାଗତ ଭାଷଣ ଦେଇଥିବା ବେଳେ କାର୍ଯ୍ୟକ୍ରମ ଅଧିକାରିଣୀ ରାନୁମୟୀ ସିଂ ଧନ୍ୟବାଦ୍ ପ୍ରଦାନ କରିଥିଲେ। ଦ୍ୱିତୀୟ ଅଧିବେଶନରେ ଏନ୍ ଡିଆର୍ ଏଫ୍ ସବ୍ ଇନ୍ସପେକ୍ଟର ସୁଶୀଲ କୁମାର ତାଲିମଦାତା ଭାବେ ଯୋଗଦେଇ ସ୍ବେଚ୍ଛାସେବୀମାନେ ପ୍ରାକୃତିକ ବିପର୍ଯ୍ୟୟ ପରିଚାଳନା କିଭଳି କରିବେ ସେ ଉପରେ କହିଥିଲେ। ଆମମାନଙ୍କ ମନୋଭାବ ସର୍ବଦା ସେବା ମନୋବୃତ୍ତି ରହିବା ଦରକାର। ପ୍ରାକୃତିକ ବିପର୍ଯ୍ୟୟ ସମୟରେ ଲୋକେ ଅସହାୟ ଅବସ୍ଥାରେ ଥାନ୍ତି। ସେହି ସମୟରେ ସେବା ଯୋଗାଇବାକୁ ପଡ଼ିବ। ରିଲିଫ, ଥଇଥାନ, ପୁନରୁଦ୍ଧାର କାର୍ଯ୍ୟ ଗୁରୁତ୍ୱପୁର୍ଣ୍ଣ। ପ୍ରାକୃତିକ ବିପର୍ଯ୍ୟୟ ସମୟରେ ଅନେକ ଆହତ ହେବାର ସମ୍ଭାବନା ରହିଥାଏ। ଏହି ସମୟରେ ଆହତଙ୍କୁ କିଭଳି ପ୍ରାଥମିକ ଚିକିତ୍ସା ଯୋଗାଇ ଦିଆଯିବ ସେନେଇ ତାଲିମ ଦେଇଥିଲେ। କାର୍ଯ୍ୟକ୍ରମକୁ ପରିଚାଳନା କରିବାରେ ଏନ୍ଏସ୍ଏସ୍ ବ୍ୟୁରୋ ଡିଇଓ ଚିରଞ୍ଜିବୀ ବାଡ଼ତ୍ୟା, ଛାତ୍ରୀ ଅନନ୍ୟା ପଟ୍ଟନାୟକ, ଛାତ୍ର ଆସମାନ ପାଲ ପ୍ରମୁଖ ସହଯୋଗ କରିଥିଲେ।
ପ୍ରଥମ ଅଧିବେଶନରେ ଚିରଞ୍ଜିବୀ ବାଡ଼ତ୍ୟା ଓ ଆର୍ତ୍ତତ୍ରାଣ ମହାପାତ୍ରଙ୍କୁ ମୁଖ୍ୟ ଅତିଥି ସେମାନଙ୍କର ଉଲ୍ଲେଖନୀୟ ସେବା ପାଇଁ ସମ୍ବର୍ଦ୍ଧିତ କରିଥିଲେ। ଶନିବାର ସନ୍ଧ୍ୟାରେ ଏହି ଶିବିର ଉଦ୍ଯାପିତ ହେବ। ଶିବିରରେ ଗଞ୍ଜାମ, ଗଜପତି ଓ କନ୍ଧମାଳ ଜିଲାରୁ ୨୦୦ରୁ ଊର୍ଦ୍ଧ୍ୱ ଛାତ୍ରୀଛାତ୍ର ସମେତ ଭଞ୍ଜନଗର କବି ସମ୍ରାଟ ଉପେନ୍ଦ୍ର ଭଞ୍ଜ ମହାବିଦ୍ୟାଳୟ ଜାତୀୟ ସେବା ଯୋଜନା ଅଧିକାରୀ ବାବୁଲା ପ୍ରଧାନ , କେନ୍ଦୁପଦର କଲେଜ ଯୋଜନା ଅଧିକାରୀ ଶିଲୁ ସେଠୀ, ଚିକିଟି ମହାବିଦ୍ୟାଳୟ ଯୋଜନା ଅଧିକାରୀଣୀ ଡ. ସୁଜାତା ସାମନ୍ତରାୟ, ବାଲିପଦର କଲେଜ ଯୋଜନା ଅଧିକାରିଣୀ ମିନତୀ ଅଚାରୀ, ଆସିକା ନିରଞ୍ଜନ ସରକାରୀ ମହିଳା ମହାବିଦ୍ୟାଳୟ ଯୋଜନା ଅଧିକାରିଣୀ ପ୍ରମୁଖ ଯୋଗ ଦେଇଛନ୍ତି।
