କେନ୍ଦୁଝର,୨୯ା୧୦(ସ୍ବ.ପ୍ର.): ଜାତୀୟ ଅନୁସୂଚିତ ଜାତି କମିଶନର ୪ ଜଣିଆ ଏକ ତଥ୍ୟ ସଂଗ୍ରହକାରୀ ଦଳ କେନ୍ଦୁଝର ଗସ୍ତରେ ଆସି ଶୁଆକାଟୀସ୍ଥିତ ଗନ୍ଧମାର୍ଦ୍ଦନ ଲୌହ ଖଣିର ପାରିପାର୍ଶ୍ୱିକ ଅଞ୍ଚଳ ଗସ୍ତ କରି ଶ୍ରମିକ ତଥା ଆଦିବାସୀଙ୍କ ବିଭିନ୍ନ ସମସ୍ୟା ଶୁଣିଛନ୍ତି। ଆଦିବାସୀ ଲୋକଙ୍କ ସହ ଆଲୋଚନା କରି ତଥ୍ୟ ସଂଗ୍ରହ କରିଛନ୍ତି। ଏହି ତଥ୍ୟ ସମ୍ମିଳିତ ରିପୋର୍ଟ କମିଶନଙ୍କ ନିକଟରେ ଦାଖଲ କରିବେ ବୋଲି ଜଣାପଡ଼ିଛି। ତେବେ ଏ ନେଇ ସଦସ୍ୟମାନେ କୌଣସି ସୂଚନା ଦେଇ ନ ଥିଲେ ହେଁ ଏହାକୁ ନେଇ ଚର୍ଚ୍ଚା ଆରମ୍ଭ ହୋଇଛି । ଖଣି ଅଞ୍ଚଳରେ ବିଭିନ୍ନ ସମସ୍ୟାକୁ ନେଇ ବହୁ ଅଭିଯୋଗ କମିଶନଙ୍କ ନିକଟକୁ ଯାଇଥିବାବେଳେ ତାହାର ସତ୍ୟାସତ୍ୟ ଜାଣିବା ପାଇଁ କମିଶନଙ୍କ ନିର୍ଦ୍ଦେଶକ୍ରମେ ଏହି କମିଟି ଗସ୍ତ କରିଛି। ଏହି କମିଟିରେ କମିଶନର ଯୁଗ୍ମ ସଚିବ କନଥାଙ୍ଗ ତଉଥାଙ୍ଗ, ପୂର୍ବତନ ସ୍ବତନ୍ତ୍ର ସଚିବ(ବ୍ୟକ୍ତିଗତ ଅଭିଯୋଗ) ସୁଦର୍ଶନ ନାୟକ, ସେଲ୍ର ପୂର୍ବତନ ସାଧାରଣ ପରିଚାଳକ ଭୂବନାନନ୍ଦ ତ୍ରିପାଠୀ, କମିଶନର ବରିଷ୍ଠ ଆଇନ ପରାମର୍ଶଦାତା ରାଧାକାନ୍ତ ତ୍ରିପାଠୀ ଏହି ଟିମ୍ରେ ସାମିଲ ହୋଇଛନ୍ତ। ବିଶେଷକରି ଖଣି ଶ୍ରମିକଙ୍କ ନିଯୁକ୍ତି ଏବଂ ଆଦିମ ଜନଜାତିଙ୍କ ସମସ୍ୟା ତଥା ଆଦିବାସୀ ବସବାସ ଅଞ୍ଚଳ ବୁଲି ତଥ୍ୟ ସଂଗ୍ରହ କରିଛନ୍ତି। ଅନ୍ୟପକ୍ଷରେ ଆଦିବାସୀ ନେତା ଭବାନୀ ନାୟକଙ୍କ ନେତୃତ୍ୱରେ ଏକ ଦଳ କମିଟିକୁ ଭେଟି ଆଦିବାସୀଙ୍କ ସମସ୍ୟା ଉପରେ ଜଣାଇବା ସହ ଦାବିପତ୍ର ଦେବାକୁ ଯାଇଥିଲେ ହେଁ ତାଙ୍କୁ ଭେଟ କରି ନ ଥିଲେ। ଏ ନେଇ ଭବାନୀ ଶଙ୍କର ନାୟକ କହିଛନ୍ତି, ଜିଲାରେ ଆଦିବାସୀଙ୍କ ବିଭିନ୍ନ ସମସ୍ୟା ଏବଂ ଅଭିଯୋଗ କମିଶନଙ୍କ ପାଖକୁ ଯାଇଥିଲେ ହେଁ କୌଣସି ସମସ୍ୟା ସମାଧାନ ହୋଇପାରିନାହିଁ। ଅନ୍ୟପକ୍ଷରେ ଜିଲାର ନେତା ଅନନ୍ତ ନାୟକ ଉକ୍ତ କମିଶନର ସଦସ୍ୟ ହୋଇଥିବାରୁ ଜିଲାର ଆଦିବାସୀମାନେ ବହୁ ଆଶାବାଦୀ ଥିବା ସତ୍ତ୍ୱେ ତାଙ୍କର ସମସ୍ୟା ଓ ଦାବି ସମାଧାନ ହୋଇ ନ ପାରିବା ଦୁର୍ଭାଗ୍ୟଜନକ। ଆଦିବାସୀଙ୍କ ସମସ୍ୟା ସମାଧାନ କରିବା ପରିବର୍ତ୍ତେ ଅନ୍ୟାନ୍ୟ ସ୍ବାର୍ଥ ସାଧନରେ ବ୍ୟସ୍ତ ରହୁଥିବା ନେଇ ଉଦ୍ବେଗ ପ୍ରକାଶ କରିଥିଲେ।
