ନୂଆଦିଲ୍ଲୀ,୨୧ା୧୧: ମହାମାରୀ କରୋନା ସାରା ବିଶ୍ୱକୁ କବଳିତ କରି ବିପର୍ଯ୍ୟୟ ଆଣିଥିବାବେଳେ ଶୁକ୍ରବାର ଏହି ଘାତକ ଭାଇରସ୍ ସମ୍ପର୍କିତ ଆଉ ଏକ ଆସନ୍ନ ବିପଦକୁ ନେଇ ଇଣ୍ଟରନ୍ୟାଶନାଲ ପୋଲିସ ଅର୍ଗାନାଇଜେଶନ ବା ଇଣ୍ଟରପୋଲ ସତର୍କ କରାଇଛି। ଅପରାଧୀମାନେ ଭାରତ ସମେତ ଅନେକ ଦେଶର ନେତାଙ୍କୁ ଏହି ଭାଇରସ୍ ଜରିଆରେ ଟାର୍ଗେଟ କରିପାରନ୍ତି। ରାଜନେତା ଏବଂ ଅନ୍ୟମାନଙ୍କ ନିକଟକୁ କୋଭିଡ୍ ସଂକ୍ରମିତ ଚିଠି ପଠାଯିବା ଆଶଙ୍କା ରହିଛି ବୋଲି ୧୯୪ ସଦସ୍ୟ ରାଷ୍ଟ୍ରକୁ ଇଣ୍ଟରପୋଲ ପକ୍ଷରୁ ଜାରି ଗାଇଡ୍ଲାଇନ୍ରେ ଚେତାଇ ଦିଆଯାଇଛି।
ଆଇନ ପ୍ରବର୍ତ୍ତନକାରୀ ଅଧିକାରୀ, ଡାକ୍ତର, ସ୍ବାସ୍ଥ୍ୟକର୍ମୀଙ୍କୁ ଉତ୍ତେଜିତ କରିବା ଲାଗି କେତେକ ଲୋକ ସେମାନଙ୍କ ମୁହଁରେ ଛେପ ପକାଇଥିବା ଦେଖିବାକୁ ମିଳିଛି। ଏଥିଯୋଗୁ ସେବା ପ୍ରଦାନକାରୀ ସମ୍ପୃକ୍ତ ଅଧିକାରୀମାନେ କୋଭିଡ୍-୧୯ରେ ସଂକ୍ରମିତ ହେବା ଆଶଙ୍କା ସୃଷ୍ଟି ହୋଇଛି। ଅନ୍ୟ କେତେକ ସ୍ଥାନରେ ମଧ୍ୟ ଲୋକେ ଏପରି କରୁଥିବା ରିପୋର୍ଟ ଆସିଛି। ସେହିପରି କେତେଜଣ ନେତାଙ୍କ ନିକଟକୁ ଧମକପୂର୍ଣ୍ଣ ଚିଠି ଆସିଛି, ଯେଉଁଥିରେ କରୋନା ଭୂତାଣୁ ରହିଛି। ଅନ୍ୟମାନଙ୍କ ପାଖକୁ ମଧ୍ୟ ଅନୁରୂପ ପତ୍ର ପଠାଯାଇପାରେ। ତେବେ କେଉଁ ରାଜନେତାମାନଙ୍କ ନିକଟକୁ ଏପରି ଚିଠି ଯାଇଛି ସେନେଇ ଏହି ଅନ୍ତର୍ଜାତୀୟ ସଂସ୍ଥା ପକ୍ଷରୁ କିଛି ସ୍ପଷ୍ଟ କରାଯାଇ ନାହିଁ। କେତେଜଣ ବ୍ୟକ୍ତି କଟକଣାକୁ ନ ମାନି ଜାଣିଶୁଣି କୋଭିଡ୍-୧୯ ପ୍ରଭାବିତ ଅଞ୍ଚଳରୁ ଅଣପ୍ରଭାବିତ ଅଞ୍ଚଳକୁ ଯାଉଛନ୍ତି। ପୋଷ୍ଟାଲ୍ ଓ ଫ୍ରଣ୍ଟ-ଡେସ୍କ ସେବାଗୁଡ଼ିକୁ ଜୈବିକ ବିପଦ ସମ୍ପର୍କରେ ଅବଗତ କରାଯିବା ଉଚିତ। ସନ୍ଦିଗ୍ଧ ପ୍ୟାକେଟଗୁଡ଼ିକୁ ପଠାଇବା ବେଳେ ନିୟମିତ ସୁରକ୍ଷାମତ୍କ ଉପାୟ ଅବଲମ୍ବନ ଜରୁରୀ ବୋଲି ଏଥିରେ କୁହାଯାଇଛି। ଅପରାଧୀମାନେ ସେମାନଙ୍କ କଳାଧନକୁ ବୈଧ କରିବା ପାଇଁ କାରବାରରେ ସ୍ବାସ୍ଥ୍ୟ ଉପକରଣ ପଠାଉଥିବା ଇଣ୍ଟରପୋଲ କହିଛି।
