ନୂଆଦିଲ୍ଲୀ,୨୧।୪: ଦିଲ୍ଲୀ କ୍ୟାପିଟାଲ୍ସର ଅନୁଭବୀ ଲେଗ୍ ସ୍ପିନର ଅମିତ ମିଶ୍ରା ମଙ୍ଗଳବାର ଚେନ୍ନାଇର ଏମ୍ଏ ଚିଦାମ୍ବରମ୍ ଷ୍ଟାଡିୟମରେ ମୁମ୍ବାଇ ଇଣ୍ଡିଆନ୍ସ ବିପକ୍ଷରେ ଉଲ୍ଲେଖନୀୟ ପ୍ରଦର୍ଶନ କରିଥିଲେ। ନିଜର ସ୍ପେଲ୍ରେ ସେ ୨୪ରନ୍ ଦେଇ ୪ ଉଇକେଟ ନେଇଥିଲେ। ଏହି ପ୍ରଦର୍ଶନ ପାଇଁ ତାଙ୍କୁ ମ୍ୟାନ୍ ଅଫ୍ ଦ ମ୍ୟାଚ୍ ପୁରସ୍କାରରେ ସମ୍ମାନିତ କରାଯାଇଥିଲା। ଏଥିସହ ଦିଲ୍ଲୀ କ୍ୟାପିଟାଲ୍ସ ୬ ଉଇକେଟରେ ମ୍ୟାଚ୍କୁ ଜିତିଯାଇଥିଲା। ଏବେ ଭାରତୀୟ ପୂର୍ବ କ୍ରିକେଟର ବିରେନ୍ଦ୍ର ସେହ୍ବାଗ୍ ଅମିତଙ୍କୁ ପ୍ରଶଂସାରେ ପୋତି ପକାଇଛନ୍ତି।
ନିଜ ଦଳର ଖେଳାଳିମାନଙ୍କ ମଧ୍ୟରୁ ଅମିତଙ୍କୁ ପସନ୍ଦ କରନ୍ତି ସେହ୍ବାଗ୍। ସେ କହିଛନ୍ତି, ଅମିତ ଜଣେ ଶାନ୍ତ ସ୍ବଭାବର ବ୍ୟକ୍ତି। ସମସ୍ତଙ୍କ ସହ ଭଲରେ ମିଶିଯାଇଥାନ୍ତି। ଏଣୁ ସେ ଦଳରେ ସମସ୍ତଙ୍କର ପ୍ରିୟ ଖେଳାଳି। ଯେତେବେଳେ ବ୍ୟାଟ୍ସମ୍ୟାନ୍ ତାଙ୍କ ବଲ୍ରେ ଭଲ ସ୍କୋର କରେ, ଅନ୍ୟମାନେ ଦୁଃଖିତ ହୋଇଥାନ୍ତି। ସେ ଉଇକେଟ ନେଲେ ସବୁ ଖୁସି ହୋଇଥାନ୍ତି। ଆଇପିଏଲ୍ରେ ସେ ପ୍ରଥମ ହାଟ୍ରିକ୍ ସେ ନେବା ବେଳ କଥା ମନେପଡେ। ତାଙ୍କୁ କ’ଣ ଆବଶ୍ୟକ ବୋଲି ପଚାରିଥିଲି। ସେ ଜବାବରେ ଭିରୁ ଭାଇ ମୋର ଦରମା ବଢ଼ାଇଦିଅ ବୋଲି କହିଥିଲେ। ଏବେ ତାଙ୍କୁ ଏଭଳି କଥା କହିବାର ଆବଶ୍ୟକତା ନାହିଁ। ଟୁର୍ନାମେଣ୍ଟର ଶ୍ରେଷ୍ଠ ବୋଲରଙ୍କ ମଧ୍ୟରୁ ସେ ଜଣେ। ସ୍ପିନର ହିସାବରେ ସେ ସବୁଠାରୁ ଅଧିକ ଉଇକେଟ ନେଇଛନ୍ତି ବୋଲି ସେହ୍ବାଗ କହିଛନ୍ତି।
