ନୂଆଦିଲ୍ଲୀ,୨୬।୨: ଚାମ୍ପିଅନ୍ସ ଟ୍ରଫି ୨୦୨୫ରେ ଜବରଦସ୍ତ ପ୍ରଦର୍ଶନ କରି ସେମିଫାଇନାଲରେ ପ୍ରବେଶ କରିଛି ଟିମ୍ ଇଣ୍ଡିଆ। ଏବେ ଦଳର ନଜର ଏବେ ଫାଇନାଲରେ ପ୍ରବେଶ କରିବା ଉପରେ ରହିଛି। ସେମିଫାଇନାଲ ପୂର୍ବରୁ ଟିମ ଇଣ୍ଡିଆକୁ ନ୍ୟୁଜିଲ୍ୟାଣ୍ଡ ବିପକ୍ଷରେ ଗ୍ରୁପ ପର୍ଯ୍ୟାୟରେ ଶେଷ ମ୍ୟାଚ୍ ଖେଳିବାକୁ ପଡିବ। କିନ୍ତୁ ଏହା ପୂର୍ବରୁ ମଧ୍ୟ ଟିମ ଇଣ୍ଡିଆକୁ ବିରତି ମିଳିଛି। ଏହି ବିରତିରେ ଭାରତୀୟ ଖେଳାଳିମାନେ ବିଶ୍ରାମ ନେବା ପରେ ପୁଣି ଥରେ ଅଭ୍ୟାସ ଆରମ୍ଭ କରିଛନ୍ତି। କିନ୍ତୁ ଦଳର ଷ୍ଟାର ବ୍ୟାଟ୍ସମ୍ୟାନ ବିରାଟ କୋହଲି IPL ପାଇଁ ପ୍ରସ୍ତୁତି ଆରମ୍ଭ କରି ପ୍ରଶ୍ନ ଘେରକୁ ଆସିଛନ୍ତି। ସେ ବିସିସିଆଇର ନିୟମ ଭାଙ୍ଗିଛନ୍ତି କି ବୋଲି ପ୍ରଶ୍ନ କରାଯାଉଛି।
ଚାମ୍ପିଅନ୍ସ ଟ୍ରଫିର ଦ୍ୱିତୀୟ ମ୍ୟାଚ୍ରେ ଟିମ ଇଣ୍ଡିଆ ପାକିସ୍ତାନକୁ ଶୋଚନୀୟ ଭାବେ ପରାସ୍ତ କରିଥିଲା। ୨୩ ଫେବୃଆରୀରେ ଦୁବାଇ ଅନ୍ତର୍ଜାତୀୟ ଷ୍ଟାଡିୟମରେ ଖେଳାଯାଇଥିବା ଏହି ମ୍ୟାଚ୍ରେ ବିରାଟ କୋହଲି ଭାରତୀୟ ଦଳ ପାଇଁ ଏକ ଚମତ୍କାର ଅପରାଜିତ ଶତକ ହାସଲ କରିଥିଲେ ଏବଂ ଦଳକୁ ବିଜୟୀ କରାଇଥିଲେ। ଏହି ବିଜୟ ପରେ ଟିମ ଇଣ୍ଡିଆର ପରବର୍ତ୍ତୀ ମ୍ୟାଚ୍ ପାଇଁ ଏବେ ଗୋଟିଏ ସପ୍ତାହର ବିରତି ରହିଛି। ଏପରି ପରିସ୍ଥିତିରେ ଭାରତୀୟ ଖେଳାଳିମାନେ ବିରତିର ପୂର୍ଣ୍ଣ ସୁଯୋଗ ଉଠାଇଛନ୍ତି।
କୋହଲି ବିଶ୍ରାମ ନେବା ସହିତ ଆଇପିଏଲ୍ ସହିତ ଜଡିତ ଗୁରୁତ୍ୱପୂର୍ଣ୍ଣ କାମ ମଧ୍ୟ ସମାପ୍ତ କରିଛନ୍ତି। ସୋସିଆଲ ମିଡିଆରେ ବିରାଟଙ୍କ ଏକ ଫଟୋ ଭାଇରାଲ ହେଉଛି, ଯେଉଁଥିରେ ସେ ତାଙ୍କ ଆଇପିଏଲ ଦଳ ରୟାଲ ଚ୍ୟାଲେଞ୍ଜର୍ସ ବାଙ୍ଗାଲୋରର ଜର୍ସି ପିନ୍ଧିଥିବାର ନଜର ଆସୁଛନ୍ତି। ଏହି ଫଟୋ ସହିତ ଦାବି କରାଯାଉଛି ଯେ କୋହଲି ଦୁବାଇର ଟିମ୍ ହୋଟେଲରେ ଏହି ଜର୍ସି ପିନ୍ଧିଥିଲେ ଏବଂ ଏହି ସମୟରେ ସେ IPL ୨୦୨୫ ସିଜିନ ପାଇଁ ଏକ ବିଜ୍ଞାପନ ଶୁଟିଂ କରୁଥିଲେ। ଏହି ଫଟୋସୁଟ ଜିଓଷ୍ଟାର ପାଇଁ କରାଯାଉଥିଲା।
ଗତ ମାସରେ ବିସିସିଆଇ ପକ୍ଷରୁ ଖେଳାଳିମାନଙ୍କ ପାଇଁ ନୂତନ ନିୟମ (ନିର୍ଦ୍ଦେଶନାମା) ଜାରି କରାଯାଇଥିଲା। ଯେଉଁଥିରେ ସ୍ପଷ୍ଟ କରାଯାଇଥିଲା ଯେ ଖେଳାଳିମାନେ କୌଣସି ଟୁର୍ନାମେଣ୍ଟ କିମ୍ବା ସିରିଜ ସମୟରେ ବ୍ୟକ୍ତିଗତ ଫଟୋଶୁଟ କିମ୍ବା ବିଜ୍ଞାପନ ଶୁଟ୍ କରିବେ ନାହିଁ। ଏଣୁ ବିରାଟଙ୍କ ଫଟୋ ଭାଇରାଲ ପରେ ସେ ବିସିସିଆଇ ନିୟମ ଭାଙ୍ଗିଛନ୍ତି କି ବୋଲି ପ୍ରଶ୍ନ କରାଯାଉଛି।
ତେବେ ବିସିସିଆଇ ଖେଳାଳିଙ୍କ ବ୍ୟକ୍ତିଗତ ପ୍ରମୋଶନ କିମ୍ବା ବିଜ୍ଞାପନକୁ ନେଇ ଏହି ନିୟମ ଲାଗୁ କରିଛି। କିନ୍ତୁ ଆଇପିଏଲ୍ ହେଉଛି ବିସିସିଆଇର ଟୁର୍ନାମେଣ୍ଟ। ଶୁଟିଂ ଏହାର ସରକାରୀ ପ୍ରସାରକଙ୍କ ପାଇଁ କରାଯାଉଛି। ଏଣୁ ଏହି ଶୁଟିଂ କୋହଲିଙ୍କ ପାଇଁ ବ୍ୟକ୍ତିଗତ କିମ୍ବା ବିଜ୍ଞାପନ ବର୍ଗରେ ଆସୁନାହିଁ।
Virat Kohli at the RCB shoot for JioHotstar! pic.twitter.com/lvKLLrIxpl
— RCBIANS OFFICIAL (@RcbianOfficial) February 26, 2025
ଚାମ୍ପିଅନ୍ସ ଟ୍ରଫି ଶେଷ ହେବାର ମାତ୍ର କିଛି ଦିନ ପରେ IPLର ୧୮ତମ ସିଜିନ ଆରମ୍ଭ ହେବ। ଏହି ଟୁର୍ନାମେଣ୍ଟର ଫାଇନାଲ ମାର୍ଚ୍ଚ ୯ ରେ ଖେଳାଯିବ, ଯେତେବେଳେ IPL ମାର୍ଚ୍ଚ ୨୨ ରୁ ଆରମ୍ଭ ହେବ। ପ୍ରଥମ ମ୍ୟାଚ୍ରେ କୋହଲିଙ୍କ ବାଙ୍ଗାଲୋର ଡିଫେଣ୍ଡିଂ ଚାମ୍ପିଅନ କୋଲକାତା ନାଇଟ ରାଇଡର୍ସକୁ ଭେଟିବ। ଏଥର ବେଙ୍ଗାଲୁରୁ ଜଣେ ନୂତନ ଅଧିନାୟକଙ୍କ ନେତୃତ୍ୱରେ ଖେଳିବ। ଷ୍ଟାର ବ୍ୟାଟ୍ସମ୍ୟାନ ରଜତ ପଟିଦାରଙ୍କୁ ଦଳର ନୂତନ ଅଧିନାୟକ କରାଯାଇଛି, ଯିଏ ଫାଫ ଡୁ ପ୍ଲେସିଙ୍କ ସ୍ଥାନ ନେବେ।
