ନୂଆଦିଲ୍ଲୀ,୨୩।୨:ଆଜି ଭାରତ ଏବଂ ପାକିସ୍ତାନ ମଧ୍ୟରେ ଏକ ବଡ଼ ମ୍ୟାଚ ଖେଳାଯାଉଛି। ମ୍ୟାଚରେ ଭାରତ ବିଜୟୀ ହୋଇ ଚାମ୍ପିଅନ୍ସ ଟ୍ରଫିର ସେମିଫାଇନାଲରେ ନିଜର ସ୍ଥାନ ସୁରକ୍ଷିତ କରିବାକୁ ଚାହିଁବ। ଅନ୍ୟପଟେ ପାକିସ୍ତାନ ପାଇଁ ଏହି ମ୍ୟାଚ କର ବା ମର ସ୍ଥିତିରେ ଅଛି। ଏହି ମ୍ୟାଚରେ ବିରାଟ କୋହଲିଙ୍କ ପାଖରେ ସଚିନ ତେନ୍ଦୁଲକରଙ୍କ ଏକ ବଡ଼ ରେକର୍ଡ ଭାଙ୍ଗିବାର ସୁଯୋଗ ରହିବ।
ବିରାଟ କୋହଲି ଏବେ ଫର୍ମରେ ନାହାନ୍ତି କିନ୍ତୁ ଭଲ କଥା ହେଉଛି ସେ ପାକିସ୍ତାନ ବିପକ୍ଷରେ ଅଧିକାଂଶ ମ୍ୟାଚ ଖେଳନ୍ତି। ସଚିନଙ୍କ ଏହି ମହାନ ରେକର୍ଡ ଭାଙ୍ଗିବା ପାଇଁ ବିରାଟ କୋହଲିଙ୍କୁ କୌଣସି ବଡ଼ ଇନିଂସ ଖେଳିବାର ଆବଶ୍ୟକତା ନାହିଁ। କୋହଲିଙ୍କୁ କେବଳ ୧୫ ରନ ଆବଶ୍ୟକ।
ବିରାଟ କୋହଲି ତାଙ୍କର ୧୪ ହଜାର ଦିନିକିଆ ରନ ଠାରୁ ମାତ୍ର ୧୫ ରନ ଦୂରରେ ଅଛନ୍ତି। ବର୍ତ୍ତମାନ କେବଳ ୨ ଜଣ ବ୍ୟାଟସମ୍ୟାନ ଦିନିକିଆ କ୍ରିକେଟରେ ୧୪ ହଜାର ରନ କରିଛନ୍ତି। ସଚିନ ତେନ୍ଦୁଲକର ଏବଂ ଶ୍ରୀଲଙ୍କାର କୁମାର ସାଙ୍ଗାକାରା। ଏହି ସଂଖ୍ୟା ଛୁଇଁବାରେ କୋହଲି ତୃତୀୟ ଖେଳାଳି ହେବେ।
ସଚିନ ତେନ୍ଦୁଲକର ପାକିସ୍ତାନ ବିପକ୍ଷରେ ତାଙ୍କର ୧୪ ହଜାର ଦିନିକିଆ ରନ ମଧ୍ୟ ପୂରଣ କରିଥିଲେ। ସେ ୬ ଫେବୃଆରୀ ୨୦୦୬ରେ ପେଶାୱରରେ ୧୪,୦୦୦ ରନ ପୂରଣ କରିଥିଲେ, ଯାହା ତାଙ୍କ ୩୫୯ତମ ମ୍ୟାଚର ୩୫୦ତମ ଇନିଂସ ଥିଲା।
ବିରାଟ କୋହଲି ବର୍ତ୍ତମାନ ୨୯୮ ମ୍ୟାଚର ୨୮୬ ଇନିଂସରେ ୧୩୯୮୫ ରନ କରିଛନ୍ତି। ଏଥିରେ ୭୩ଟି ଅର୍ଦ୍ଧଶତକ ଏବଂ ୫୦ଟି ଶତକ ଅନ୍ତର୍ଭୁକ୍ତ। କୋହଲିଙ୍କୁ ୧୪ ହଜାର ରନ ପୂରଣ କରିବା ପାଇଁ ଆଉ ମାତ୍ର ୧୫ ରନ ଆବଶ୍ୟକ।
