ହାଇଦ୍ରାବାଦ,୩।୧ : ସାଧାରଣ ଜନତାଙ୍କୁ ମଧ୍ୟ ପ୍ରଭାବିତ କରିବା ଆରମ୍ଭ କରିଥିବା ନୂଆ ହିଟ ଏବଂ ରନ ଆଇନ ଉପରେ ସାରା ଦେଶରେ ଟ୍ରକ ଡ୍ରାଇଭରମାନେ ଧର୍ମଘଟ କରିଥିଲେ। ଏହି ଧର୍ମଘଟ ଯୋଗୁଁ ଦେଶର ଅନେକ ସ୍ଥାନରେ ପେଟ୍ରୋଲ ଏବଂ ଡିଜେଲ ପରିବହନ ହୋଇପାରି ନ ଥିଲା। ଏହି ସମୟରେ ସୋସିଆଲ ମିଡିଆରେ ଏକ ଭିଡିଓ ସାମ୍ନାକୁ ଆସିଛି ଯେଉଁଥିରେ ଜୋମାଟୋ ଡେଲିଭରି ବୟ ବାଇକ ବଦଳରେ ଘୋଡା ଚଢ଼ି ଲୋକଙ୍କ ଘରେ ଖାଦ୍ୟ ଯୋଗାଉଛନ୍ତି। ଏହି ଭିଡିଓ ଯେତିକି ମଜାଦାର, ସେଥିରେ ଥିବା ୟୁଜରଙ୍କ ମନ୍ତବ୍ୟଗୁଡିକ ମଧ୍ୟ ମଜାଳିଆ ରହିଛି ।
ଏହି ଭିଡିଓ ସୋସିଆଲ ମିଡିଆରେ ଭାଇରାଲ ହେବାରେ ଲାଗିଛି। ଏହି ଭିଡିଓରେ ଜୋମାଟୋ ଡେଲିଭରି ବୟ କାନ୍ଧରେ ବ୍ୟାଗ ଧରି ରାସ୍ତାରେ ଘୋଡା ଚଢ଼ି ଯାଉଥିବାର ନଜର ଆସିଛନ୍ତି। ଜୋମାଟୋ ବୟ ରାସ୍ତାରେ ଘୋଡା ଚଢ଼ି ଯାଉଥିବା ଦେଖି ହଠାତ ଲୋକମାନେ ଆଶ୍ଚର୍ଯ୍ୟ ହୋଇ ଯାଇଥିଲେ। ଏହି ଲୋକମାନଙ୍କ ମଧ୍ୟରୁ ଜଣେ ଏହି ଘଟଣାର ଏକ ଭିଡିଓ ପ୍ରସ୍ତୁତ କରି ସୋସିଆଲ ମିଡିଆରେ ପୋଷ୍ଟ କରିଥିଲେ। ଏହା ପରେ ଭିଡିଓଟି ଶୀଘ୍ର ଇଣ୍ଟରନେଟରେ ଭାଇରାଲ ହୋଇଥିଲା। କୁହାଯାଉଛି ଏହି ଭିଡିଓ ହାଇଦ୍ରାବାଦ ସହରରୁ ଆସିଛି।
ଲୋକମାନେ ଏହି ଭିଡିଓକୁ ବହୁତ ପସନ୍ଦ କରିଛନ୍ତି। ଏହା ସହିତ, ଅନେକ ୟୁଜର ଏହି ଭିଡିଓ ଉପରେ ବହୁତ ଆକର୍ଷଣୀୟ ମନ୍ତବ୍ୟ ଦେଇଛନ୍ତି। ଜଣେ ୟୁଜର ଭିଡିଓ କମେଣ୍ଟରେ ଲେଖିଛନ୍ତି, ଏଭଳି ଚମତ୍କାର ଲୋକ କେବଳ ଭାରତରେ ଦେଖିବାକୁ ମିଳନ୍ତି। ଅନ୍ୟ ଜଣେ ୟୁଜର ଲେଖିଛନ୍ତି ମୋ ଦେଶ ବଦଳୁଛ। କିଛି ୟୁଜର ଏହି ଘଟଣାକୁ ଏକ ଶୋ ଗେମ ବୋଲି କହିଛନ୍ତି। କିଛି ଲୋକ ଏପରିକି କହିଛନ୍ତି ଜୋମାଟୋ ବୟ ପ୍ରସିଦ୍ଧ ହେବା ପାଇଁ ଏସବୁ କରୁଛନ୍ତି।’
