ଥିରୁଭାନନ୍ତପୁରମ,୨୨।୯: ଆଜିକାଲି ଦେଶର ଅନେକ ରାଜ୍ୟରେ ପ୍ରବଳ ବର୍ଷା ହେଉଛି। ଏହି କାରଣରୁ ଖାଲ ରାସ୍ତା ଓ ଗଳିରେ ପାଣି ଜମା ହୋଇରହିଛି। ସମସ୍ତଙ୍କ ପାଇଁ ନିଜ ସହରର ସମସ୍ୟାକୁ ସରକାରଙ୍କ ଆଗରେ ଉପସ୍ଥାପନ କରିବା ସହଜ ନୁହେଁ, କିନ୍ତୁ କେରଳର ଜଣେ କନ୍ୟା ବିବାହ ଫଟୋଶୁଟ୍ ମାଧ୍ୟମରେ ରାସ୍ତାର ଖରାପ ଅବସ୍ଥାକୁ ଲୋକଲୋଚନକୁ ଆଣିଛନ୍ତି। ନାଲି ଶାଢି ପିନ୍ଧିଥିବା ଏହି କନ୍ୟାଙ୍କ ଭିଡିଓ ସୋସିଆଲ ମିଡିଆରେ ଭାଇରାଲ ହୋଇଛି।
ଏପର୍ଯ୍ୟନ୍ତ ଭିଡିଓଟି ୪ ମିଲିୟନରୁ ଅଧିକ ଭ୍ୟୁ ମିଳିଛି। ଏହି ଭାଇରାଲ ଭିଡିଓ ଇନଷ୍ଟାଗ୍ରାମରେ ଆରୋ ଓ୍ବେଡିଂ କମ୍ପାନୀ ଦ୍ୱାରା ଶେୟାର କରାଯାଇଛି। ଏହି ଭିଡିଓରେ ଦେଖିବାକୁ ମିଳେ ଶାଢି ପିନ୍ଧି ଭାରୀ ଅଳଙ୍କାର ସଜେଇ ହୋଇ ହସି ହସି ବାହାରକୁ ଆସୁଛନ୍ତି। ୟୁଜର୍ସ ତାଙ୍କ ଚିନ୍ତାଧାରା ଏବଂ ଫଟୋଗ୍ରାଫରଙ୍କ ସୃଜନଶୀଳତାକୁ ପସନ୍ଦ କରିଛନ୍ତି।
