ମୁମ୍ବାଇ,୨।୧୦: ବଲିଉଡ ଅଭିନେତ୍ରୀ ଅନୁଷ୍କା ଶର୍ମା ଏବଂ ବିରାଟ କୋହଲି ଦ୍ୱିତୀୟ ଥର ପାଇଁ ମାତାପିତା ହେବାକୁ ଯାଉଛନ୍ତି ବୋଲି ଖବର ଆସିବା ପରେ ଏବେ ସେମାନେ ହେଡଲାଇନକୁ ଆସିଛନ୍ତି। ଏକ ଘରୋଇ ଟେଲିଭିଜନ ଚ୍ୟାନେଲ ମଧ୍ୟ ଦାବି କରିଥିଲା କି ସୂତ୍ରରୁ ମିଳିଥିବା ଖବର ନିଶ୍ଚିତ ଯେ ଅଭିନେତ୍ରୀ ଦ୍ୱିତୀୟ ଥର ଗର୍ଭବତୀ ଅଛନ୍ତି। ତେବେ ଏହି ଦମ୍ପତି ଏପର୍ଯ୍ୟନ୍ତ ଦ୍ୱିତୀୟ ଗର୍ଭଧାରଣ ଘୋଷଣା କରିନାହାଁନ୍ତି। ଅନୁଷ୍କା ଶର୍ମା ଦ୍ୱିତୀୟ ଥର ଗର୍ଭବତୀ ଥିବା ଖବର ମଧ୍ୟରେ ଗୁଆହାଟୀରେ ଚାଲିଥିବା ବିଶ୍ୱକପ ୨୦୨୩ର ୱାର୍ମ ଅପ ମ୍ୟାଚରେ ବ୍ୟସ୍ତ ଥିବା ବିରାଟ କୋହଲିଙ୍କୁ ଶୀଘ୍ର ମୁମ୍ବାଇ ଫେରିବାକୁ ପଡିଲା, ଯାହା ଏବେ ସମସ୍ତଙ୍କୁ ଆଶ୍ଚର୍ଯ୍ୟ କରିଛି। ଆଉ ଅନୁଷ୍କା ଗର୍ଭବତୀ ଥିବା ଖବରକୁ ଆହୁରି ସସପେନ୍ସ ଭିତରକୁ ନେଇ ଯାଇଛି।
ଅନୁଷ୍କାଙ୍କ ଗର୍ଭବତୀ ଖବର ମଧ୍ୟରେ ବିରାଟ କୋହଲି ଜରୁରୀକାଳୀନ ପରିସ୍ଥିତିରେ ମୁମ୍ବାଇ ଫେରିଥିଲେ। ଖବର ମୁତାବକ ବିରାଟ କୋହଲି ପତ୍ନୀ ଅନୁଷ୍କା ଶର୍ମାଙ୍କୁ ଭେଟିବା ପାଇଁ ଗୁଆହାଟୀରୁ ମୁମ୍ବାଇକୁ ଜରୁରୀକାଳୀନ ବିମାନ ନେଇଥିଲେ ଏବଂ ଏହା ଅନେକ କଳ୍ପନାଜଳ୍ପନା ସୃଷ୍ଟି କରୁଛି। ମଙ୍ଗଳବାର ତିରୁବନନ୍ତପୁରମରେ ନେଦରଲ୍ୟାଣ୍ଡ ବିପକ୍ଷ ଆଇସିସି ଓଡିଆଇ କ୍ରିକେଟ ବିଶ୍ୱକପର ଟିମ ଇଣ୍ଡିଆର ଦ୍ୱିତୀୟ ଅଭ୍ୟାସ ମ୍ୟାଚରେ ବିରାଟ ବ୍ୟସ୍ତ ଥିଲେ। ତେବେ ବିରାଟ କୋହଲିଙ୍କ ହଠାତ୍ ଜରୁରୀକାଳୀନ ପରିସ୍ଥିତିକୁ ଫେରିବା ପଛର କାରଣ ଜଣାପଡିନାହିଁ।
ସୂଚନାଯୋଗ୍ୟ, ଏସିଆ କପ ପରେ ଆଇସିସି ଓଡିଆଇ କ୍ରିକେଟ ବିଶ୍ୱକପ ଆରମ୍ଭ ହେବାକୁ ଯାଉଛି। ଏହି ବିଶ୍ୱକପ ୧୨ବର୍ଷ ପରେ ଭାରତରେ ଆରମ୍ଭ ହେଉଛି ଏବଂ ଏହା ୫ ଅକ୍ଟୋବରରୁ ଆରମ୍ଭ ହେବାକୁ ଯାଉଛି।
