ଖୋର୍ଦ୍ଧା ଅଫିସ,୧୯। ୯: ଖୋର୍ଦ୍ଧା ଜିଲା ଜଟଣୀ ବ୍ଲକ ଅଧୀନ କାଇମାଟଆ ଗ୍ରାମର ସୁକାନ୍ତ ଓ ପବିତ୍ର ଭୋଇଙ୍କଠାରେ ରହିଛି ଅନନ୍ୟ ପ୍ରତିଭା। ସୁକାନ୍ତ ଗୀତ ଗାଉଥିବା ବେଳେ ପବିତ୍ର ପାଟି ଓ ହାତ ମାଧ୍ୟମରେ ବାଦ୍ୟର ଭ୍ରମ ସୃଷ୍ଟି କରୁଛନ୍ତି। ଏମାନେ ଗାଇଥିବା ଏକ ହିନ୍ଦୀ ଗୀତର ଭିଡିଓ ସୋସିଆଲ ମିଡିଆରେ ଭାଇରାଲ ହେବା ସହ ଶ୍ରୋତାଙ୍କ ମନ ଜିଣିବାରେ ଲାଗିଛି। ଉଭୟଙ୍କ ମନୋବଳ, ନିଷ୍ଠା ଯୋଗୁ ଏମାନେ ନିଜର ସ୍ବତନ୍ତ୍ର ପରିଚୟ ସୃଷ୍ଟି କରିପାରିଛନ୍ତି।
ସୁକାନ୍ତ ଗ୍ରାମରେ ଟେଲେରିଂ କରି ପରିବାର ପୋଷଣ କରୁଥିବା ବେଳେ ପବିତ୍ର ଦଶମ ଶ୍ରେଣୀରେ ପଢୁଛନ୍ତି। କୋଭିଡ୍-୧୯ ଯୋଗୁ ସ୍କୁଲ ବନ୍ଦ ରହିଥିବାରୁ ଅନ୍ଲାଇନରେ ପାଠ ପଢାଯାଉଛି। ସ୍ମାର୍ଟ ଫୋନ ନ ଥିବାରୁ ପବିତ୍ର ପାଠପଢାରୁ ବଞ୍ଚିତ ହୋଇଛନ୍ତି। ତଥାପି ସେ ପାଠପଢା ଜାରି ରଖିଛନ୍ତି। ସୁକାନ୍ତଙ୍କ କହିବାନୁଯାୟୀ, ପିଲାବେଳୁ ସଙ୍ଗୀତ ଶିକ୍ଷା ପ୍ରତି ତାଙ୍କର ଆଗ୍ରହ ରହିଥିଲା। ଆର୍ଥିକ ସମସ୍ୟା ଯୋଗୁ ସଙ୍ଗୀତ ଶିକ୍ଷା ଲାଭି କରିପାରି ନ ଥିଲେ। ସମୟ ମିଳିଲେ ଗଁା ନଈକୂଳ, ଆମ୍ବତୋଟାରେ ଗୀତା ଗାଇବା ଅଭ୍ୟାସ ଜାରି ରଖିଥିଲି।
ଦିନେ ପବିତ୍ର ପାଟିରେ ସୁନ୍ଦର ଶବ୍ଦ ବାହାର କରୁଥିବା ଦେଖିଥିଲି। ପରେ ଏକ ହିନ୍ଦୀ ଗୀତ ଗାଇ ସୋସିଆଲ ମିଡିଆରେ ପୋଷ୍ଟ କରିଥିଲୁ। ଯାହାକୁ ଅଧିକ ଲୋକ ପସନ୍ଦ କରିଥିଲେ। ଏହାପରେ ଏଥିପ୍ରତି ଆଗ୍ରହ ବଢିଥିଲା। ସେହିପରି ପବିତ୍ର କହିଛନ୍ତି, ପିଲାବେଳୁ ବାଜା ବଜାଇବା ପାଇଁ ଆଗ୍ରହ ରହିଥିଲା। ବାଡି ଖଣ୍ଡେ ମିଳିଲେ, ହାଣ୍ଡି ଓ ମାଠିଆରେ ବାଜା ବଜାଇବା ଆରମ୍ଭ କରି ଦେଉଥିଲି। ପାଟି ଓ ଛାତିରେ ହାତ ବାଡେଇ ଶବ୍ଦ ବାହାର କରିବା ପାଇଁ ଚେଷ୍ଟା କରିଥିଲି। ପରେ ଏହା ମୋର ଅଭ୍ୟାସରେ ପରିଣତ ହୋଇଥିଲା। ସୁକାନ୍ତ ଭାଇ ବାଦ୍ୟ ବଜାଇବା ଲାଗି କହିବାଠାରୁ ଏହି ଅଭିଯାନ ଜାରି ରହିଛି। ବଣମଲ୍ଳୀ ବଣରେ ଫୁଟି ବଣରେ ମଉଲିଗଲା ପରି ଏହି ଦୁଇଜଣଙ୍କ ପ୍ରତିଭା ମଉଳି ନ ଯାଉ ବୋଲି ସାଧାରଣରେ ମତପ୍ରକାଶ ପାଇଛି।
