ସମ୍ବଲପୁର,୩୦ା୬(ଶୁଭାଶିଷ ପାଢ଼ୀ): ଚିମିନିରୁ ଅନବରତ ନିଷ୍କାସିତ ହେଉଛି କଳା ଧୂଆଁ। ବାୟୁମଣ୍ଡଳରେ ଉଡୁଛି ଧୁଳିଗୁଣ୍ଡ। ପୂର୍ବପରି ଆଉ ଚାଷ ବି ହେଉନି। ମଣିଷ, ଜୀବଜନ୍ତୁଙ୍କ ଉପରେ ମଧ୍ୟ ଏହାର ପ୍ରଭାବ ପଡୁଛି। ଏପରି କି ସେହି ରାସ୍ତା ଦେଇ ଯିବା କଷ୍ଟକର ହୋଇପଡିଛି। ସମସ୍ତେ ପ୍ରଦୂଷଣ ବଳୟରେ ଜୀବନ ବିତାଉଛନ୍ତି। ସମ୍ବଲପୁର ଜିଲା ରେଙ୍ଗାଲି ବ୍ଲକରେ ଥିବା ବିରାଜ ଷ୍ଟିଲ ଆଖପାଖ ଅଞ୍ଚଳରେ ଏଭଳି ସ୍ଥିତି ଦେଖିବାକୁ ମିଳିଛି।
ସମ୍ବଲପୁର-ଝାରସୁଗୁଡ଼ା ବିଜୁ ଏସ୍କପ୍ରେସ ୱେ ରାସ୍ତାକଡ଼କୁ ଲାଗିରହିଛି ଏହି କାରଖାନା। ଚିମିନିକୁ ଦେଖିଲେ ଲାଗୁଛି ପ୍ରଦୂଷଣକୁ ନେଇ କମ୍ପାନୀର ଆଦୌ ଚିନ୍ତା ନାହିଁ। କାରଣ ଏଠାରୁ ଅନବରତ କଳା ଧୂଆଁ ବାହାରି ବାୟୁମଣ୍ଡଳରେ ମିଶୁଛି। ପ୍ରଦୂଷିତ ଧୂଆଁକୁ ବାୟୁମଣ୍ଡଳରେ ଛାଡିବା ପାଇଁ ବ୍ୟାକ୍ ଫିଲଟର୍ ଲଗାଇବା ନିୟମ ରହିଛି। କିନ୍ତୁ କମ୍ପାନୀ କର୍ତ୍ତୃପକ୍ଷ ଏହାକୁ ଖୋଲାଖୋଲି ଉଲ୍ଲଂଘନ କରୁଥିବା ଦେଖିବାକୁ ମିଳିଛି। ପୂର୍ବରୁ ଅନେକଥର ଏହାକୁ ନେଇ କମ୍ପାନୀ ଉପରେ ଜରିମାନା ହୋଇଛି। ନିକଟସ୍ଥ ଗୁରୁପାଲି ଗ୍ରାମବାସୀ କମ୍ପାନୀ ବିରୋଧରେ ବହୁବାର ଜିଲାପାଳଙ୍କ ନିକଟରେ ଅଭିଯୋଗ କରିଛନ୍ତି। ଚାଷ ନଷ୍ଟ ହେବା ସହ ମଣିଷ ଜୀବନ ପ୍ରତି ବିପଦ ରହିଛି। ଅନେକ ଲୋକ ପ୍ରଦୂଷଣ ପାଇଁ ପ୍ରାଣ ହରାଉଥିବା ସେମାନେ ଅଭିଯୋଗରେ ଦର୍ଶାଇଛନ୍ତି। ଏପଟେ ଥରେ ଦୁଇଥର କମ୍ପାନୀ ଉପରେ ଜରିମାନା ଲଗାଇ ଚୁପ୍ ବସିଛି ସମ୍ବଲପୁର ପ୍ରଦୂଷଣ ନିୟନ୍ତ୍ରଣ ବୋର୍ଡ।
ସ୍ଥାନୀୟ ଲୋକଙ୍କ କହିବା ଅନୁସାରେ, ପ୍ରଦୂଷଣ କେବଳ ମଣିଷଙ୍କ ଉପରେ ପ୍ରଭାବ ପକାଉନି, ଜୀବଜନ୍ତୁଙ୍କ ଉପରେ ମଧ୍ୟ ଏହାର ପ୍ରତିକ୍ରିୟା ଦେଖିବାକୁ ମିଳୁଛିା ପ୍ରଦୂଷଣ ପାଇଁ ବୁଲା କୁକୁରଙ୍କ ଲୋମ ଝଡିବା ସହ ନାନା ରୋଗର ଶିକାର ହେଉଛନ୍ତି। ପୂର୍ବଭଳି ପକ୍ଷୀଙ୍କ କଳରବ ଶୁଣିବାକୁ ମିଳୁନି। ଘରଚଟିଆ, କୋଇଲି, କାଉ ଭଳି ପକ୍ଷୀ ଲୋପ ପାଇବାକୁ ବସିଲେଣି। କୀଟପତଙ୍ଗ ଓ ଅନ୍ୟ ପ୍ରାଣୀଙ୍କ ଉପରେ ମଧ୍ୟ ଏହାର ପ୍ରଭାବ ଅଧିକ। ପୂର୍ବରୁ ଘରେ ଘରେ ପ୍ରାୟ ବିରୁଡି ବସା କରୁଥିଲେ। କିନ୍ତୁ ଏବେ ବିରୁଡିଙ୍କୁ ଦେଖିବାକୁ ମିଳୁନି। ମହୁମାଛି ଖୋଜିଲେ ବି ମିଳୁ ନାହାନ୍ତି। ତୁରନ୍ତ ପ୍ରଦୂଷଣ ରୋକିବା ଦିଗରେ ପଦକ୍ଷେପ ନେବା ଆବଶ୍ୟକ। ଏ ସମ୍ପର୍କରେ ସମ୍ବଲପୁର ପ୍ରଦୂଷଣ ନିୟନ୍ତ୍ରଣ ବୋର୍ଡ ଅଧିକାରୀ ସତ୍ୟନାରାୟଣ ନନ୍ଦ କହିଛନ୍ତି, ଅଭିଯୋଗ କ୍ରମେ ତଦନ୍ତ କରି ଉଚ୍ଚସ୍ତରୀୟ ଅଧିକାରୀଙ୍କୁ ରିପୋର୍ଟ ଦିଆଯାଇଛି। ନିର୍ଦ୍ଦେଶ ଆସିବା ପରେ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି ସେ କହିଥିଲେ।
