ଚଣ୍ଡିଗଡ଼,୧୦।୪: ୨୦୨୪ ପ୍ୟାରିସ ଅଲିମ୍ପିକ୍ସ ସମୟରେ ଚର୍ଚ୍ଚାକୁ ଆସିଥିବା ଭାରତୀୟ କୁସ୍ତିଯୋଦ୍ଧା ଭିନେଶ ଫୋଗାଟଙ୍କ ବିଷୟରେ ଏକ ବଡ଼ ଖୁଲାସା ହୋଇଛି। ଅଲିମ୍ପିକ୍ସରୁ ଅଯୋଗ୍ୟତା ବିବାଦ ପରେ, ଭିନେଶ କୁସ୍ତିରୁ ଅବସର ନେବାକୁ ନିଷ୍ପତ୍ତି ନେଇ ସମସ୍ତଙ୍କୁ ଆଶ୍ଚର୍ଯ୍ୟ କରିଦେଇଥିଲେ। ଏହା ପରେ, ସେ ରାଜନୀତିରେ ପ୍ରବେଶ କରିଥିଲେ ଏବଂ ୨୦୨୪ ହରିୟାଣା ବିଧାନସଭା ନିର୍ବାଚନରେ କଂଗ୍ରେସ ପକ୍ଷରୁ ପ୍ରତିଦ୍ୱନ୍ଦ୍ୱିତା କରି ଜୁଲାନା ଆସନରେ ବିଜୟୀ ହୋଇଥିଲେ। ନିକଟରେ, ହରିୟାଣା ସରକାର ତାଙ୍କ ସମ୍ମୁଖରେ ତିନୋଟି ବିକଳ୍ପ ରଖିଥିଲେ, ଏବେ ଏକ ଅପଡେଟ ଆସିଛି ଯେ ଏଥିମଧ୍ୟରୁ ଭିନେଶ ଗୋଟିଏ ବିକଳ୍ପ ବାଛିଛନ୍ତି।
ଭିନେଶ ଫୋଗାଟ ୪ କୋଟି ଟଙ୍କାର ନଗଦ ପୁରସ୍କାରର ବିକଳ୍ପ ବାଛିଛନ୍ତି। ଏସମ୍ପର୍କରେ, ହରିୟାଣା ସରକାରଙ୍କ କ୍ରୀଡା ବିଭାଗକୁ ଏକ ଚିଠି ପଠାଯାଇଛି, ଯାହା ପରେ ପରବର୍ତ୍ତୀ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ। ମିଳିଥିବା ରିପୋର୍ଟ ଅନୁଯାୟୀ, ଜୁଲାନା ଆସନର ବିଧାୟକ ଭିନେଶ ଫୋଗାଟ ଗତ ମାସରେ ବଜେଟ ଅଧିବେଶନରେ ଏହି ପ୍ରସଙ୍ଗ ଉଠାଇଥିଲେ। ଭିନେଶ କହିଛନ୍ତି ଯେ ସରକାର ତାଙ୍କ ପାଇଁ ଅଲିମ୍ପିକ୍ସରେ ରୌପ୍ୟ ପଦକ ସହିତ ସମାନ ପୁରସ୍କାର ଘୋଷଣା କରିଥିଲେ, କିନ୍ତୁ ୮ ମାସ ପରେ ମଧ୍ୟ ତାଙ୍କୁ ସମ୍ମାନିତ କରାଯାଇ ନାହିଁ।
ଭିନେଶଙ୍କ ଦାବି ଉପରେ ହରିୟାଣା ମୁଖ୍ୟମନ୍ତ୍ରୀ ନାଇବ ସିଂହ ସାଇନି ଉତ୍ତର ଦେଇଥିଲେ ଯେ ଯଦିଓ ସେ ବର୍ତ୍ତମାନ କଂଗ୍ରେସ ବିଧାୟକ, ତଥାପି ତାଙ୍କୁ ସରକାରୀ ଚାକିରି, ଏକ ପ୍ଲଟ କିମ୍ବା ୪କୋଟି ଟଙ୍କାର ନଗଦ ପୁରସ୍କାରର ବିକଳ୍ପ ଦିଆଯିବ। ରିପୋର୍ଟ ଅନୁଯାୟୀ, ଏହାର ଜବାବରେ, ଭିନେଶ ୪ କୋଟି ଟଙ୍କାର ନଗଦ ପୁରସ୍କାର ପାଇଁ ରାଜି ହୋଇଛନ୍ତି।
ଭିନେଶ ତାଙ୍କର ବିକଳ୍ପ ନିଷ୍ପତ୍ତି ସମ୍ପର୍କରେ କ୍ରୀଡ଼ା ବିଭାଗକୁ ଏକ ଚିଠି ପଠାଇଛନ୍ତି। ଯେହେତୁ ସେ ଏବେ ବିଧାୟକ, ସେ ସରକାରୀ ଚାକିରି ବାଛି ନ ଥିଲେ। ଆପଣଙ୍କୁ ମନେ ପକାଇ ଦେଉଛୁ ଯେ ଭିନେଶ ଫୋଗତଙ୍କୁ ନିର୍ଦ୍ଧାରିତ ଓଜନ ସୀମାଠାରୁ ୧୦୦ ଗ୍ରାମ ଅଧିକ ଓଜନ ପାଇଁ ଅଲିମ୍ପିକ୍ସରୁ ଅଯୋଗ୍ୟ ଘୋଷଣା କରାଯାଇଥିଲା।
