ଆନନ୍ଦପୁର,୭ା୬(ସୁଶାନ୍ତ କୁମାର ସାହୁ ): ମଦ ପରିତ୍ୟାଗ କରି ୧୫ରୁ ଊର୍ଦ୍ଧ୍ବ ବ୍ୟକ୍ତି ଲଣ୍ଡା ହେବା ସହ ନଦୀରେ ବୁଡ଼ ପକାଇଛନ୍ତି ଏବଂ ଠାକୁରଙ୍କ ପାଖରେ ଶପଥ କରିଛନ୍ତି । ଏଭଳି ନିଆରା ଦୃଶ୍ୟ ଦେଖିବାକୁ ମିଳିଛି କେନ୍ଦୁଝର ଜିଲା ଘସିପୁରା ବ୍ଲକ୍ ଦରଡି଼ପାଳ ପଞ୍ଚାୟତ ଜଳସୁଆଁ ଗାଁରୁ ଆସିଛି ।
ଶନିବାର ସ୍ଥାନୀୟ କୁଶେଇ ନଦୀରେ ବୁଡ଼ ପକାଇ ଆଗାମୀ ଦିନରେ ମଦ ଛୁଇଁବେ ନାହିଁ ବୋଲି ସମ୍ପୃକ୍ତ ବ୍ୟକ୍ତିମାନେ ଠାକୁରଙ୍କ ପାଖରେ ଶପଥ ନେଇଛନ୍ତି । ନଦୀରେ ବୁଡ଼ ପକାଇବା ପରେ ସମ୍ପୃକ୍ତ ବ୍ୟକ୍ତିମାନେ ସ୍ଥାନୀୟ ଜଳେଶ୍ଵର ଶିବମନ୍ଦିର ସମ୍ମୁଖରେ ପୂଜକ ଶ୍ରୀଧର ମହାପାତ୍ରଙ୍କ ତତ୍ତ୍ବାବଧାନରେ ଶପଥ ପାଠ କରିଥିଲେ ।
ଜଳସୁଆଁ ଗାଁ କିପରି ସମ୍ପୂର୍ଣ୍ଣ ମଦମୁକ୍ତ ହୋଇପାରିବ ସେଥିପାଇଁ ଘରକୁ ଘର ବୁଲି ଲୋକଙ୍କୁ ବୁଝାଇବେ ବୋଲି କହିଛନ୍ତି। ମଦ ବିରୋଧରେ ସମସ୍ତେ ଏକାଠି ହେବାକୁ ନାରା ଦେଇଛନ୍ତି । ମଦ ଛାଡ଼ିବାକୁ ଏଭଳି ଦୃଢ଼ ନିଷ୍ପତ୍ତ ନେଇଥିବା ବ୍ୟକ୍ତିମାନେ ଗାଁର ସଞ୍ଜୟ ଜେନା, କୃଷ୍ଣଚନ୍ଦ୍ର କୁଅଁର, ହାଡ଼ିବନ୍ଧୁ ରାଉତ, ରଞ୍ଜନ ରାଉତ, ସନାତନ ନାୟକ, ଚଗୁଲୁ ବେହେରା, କେଶବ ଚନ୍ଦ୍ର ସାହୁ, ଗଣେଶ୍ବର ସାହୁ, ସନ୍ତୋଷ ବିହାରୀ ପ୍ରମୁଖ ।
