ବୈଶିଙ୍ଗା,୨୯।୪(ରତନ ଦାଶ): ମୟୂରଭଞ୍ଜ ଜିଲାର ବୈଶିଙ୍ଗା ଅଞ୍ଚଳରେ ଦିନକୁ ଦିନ ଗୋରୁ ଚୋରା ଚାଲାଣ ବୃଦ୍ଧି ପାଉଥିବା ବେଳେ ଏହି ଗ୍ୟାଙ୍ଗ ସହ ଜଡ଼ିତ ଅସାମାଜିକ ବ୍ୟକ୍ତିମାନଙ୍କର ଉତ୍ପାତ ମଧ୍ୟ ବଢ଼ି ଚାଲିଛି । ସୂଚନା ଅନୁଯାୟୀ, ମଙ୍ଗଳବାର ରାତିରେ କିଛି ଗୋମାଫିଆ ଯୁଗପୁରା, ଯାମୁନଣ୍ଡା, କଦଳିଆ ରାସ୍ତାରେ ଶୋଇଥିବା ଗୋରୁମାନଙ୍କୁ ଚୋରି କରି ଏକ ଭ୍ୟାନ ଭିତରେ ଭର୍ତ୍ତି କରୁଥିବା ବେଳେ ଗ୍ରାମବାସୀମାନେ ପହଞ୍ଚି ଯାଇଥିଲେ।
ଫଳରେ ଗୋରୁ ଗୁଡିକୁ ଛାଡ଼ିଦେଇ ଫେରାର ହୋଇଯାଇଥିଲେ। ସେମାନେ ମୁଖ୍ୟ ରାସ୍ତାରେ ନଯାଇ ଯୁଗପୁରାରୁ ଜାମୁନଣ୍ଡା ଓ କଦଳିଆ ରାସ୍ତାରେ ପଳାଇ ଯାଇଥିଲେ। ଗ୍ରାମବାସୀମାନେ ସେମାନଙ୍କୁ ବାଇକ ଯୋଗେ ପିଛା କରିଥିଲେ। ତେବେ କଦଳିଆ ଛକ ନିକଟରେ ଗୋରକ୍ଷକ ଯୁବକ ରମେଶ ବିଶ୍ବାଳ ଓରଫ ଦିପୁ ଓ ତାଙ୍କ ସହଯୋଗୀମାନେ ଗୋରୁ ଚୋରି ଉବ୍ଦେଶ୍ୟରେ ଆଣିଥିବା ଗାଡ଼ିକୁ ଅଟକାଇବାକୁ ଚେଷ୍ଟା କରିଥିବା ବେଳେ ସେମାନଙ୍କୁ ସୁରକ୍ଷା ଯୋଗାଇ ପଛରୁ ଆସୁଥିବା ଦୁଇଟି ବାଇକରେ ଥିବା ଯୁବକମାନେ ଗୋରକ୍ଷକଙ୍କ ଉପରକୁ ୨ ରାଉଣ୍ଡ ଗୁଳିଚାଳନା କରିଥିଲେ ଏବଂ ସେଠାରେ ଭ୍ୟାନ ଛାଡ଼ିଦେଇ ଡ୍ରାଇଭରକୁ ସାଙ୍ଗରେ ନେଇ ଚମ୍ପଟ ମାରିଥିଲେ।
ପରେ ପରିବାର ଲୋକ ପହଞ୍ଚି ଆହତ ଦିପୁଙ୍କୁ ବୈଶିଙ୍ଗା ଡାକ୍ତରଖାନାରେ ନେଇ ଚିକିତ୍ସା କରାଇଥିଲେ । ତେବେ ଆଜି ସକାଳେ ଗ୍ରାମବାସୀମାନେ ଭ୍ୟାନଟିକୁ ଜଳୁଥିବାର ଦେଖି ପୋଲିସକୁ ଖବର ଦେଇଥିଲେ । ବୈଶିଙ୍ଗା ପୋଲିସ ଘଟଣା ସ୍ଥଳରେ ପହଞ୍ଚି ଘଟଣାର ଛାନଭିନ ଆରମ୍ଭ କରିଛି । ଅନ୍ୟପଟେ ଗୋମାଫିଆଙ୍କ ଆତଙ୍କରେ ଭୟଭୀତ ହୋଇପଡିଛନ୍ତି ଅଞ୍ଚଳବାସୀ।
