ପଟ୍ଟାଙ୍ଗି,୨୩/୧୦(ଶରତ ଧଳ): ଗ୍ରାମାଞ୍ଚଳରେ ବସବାସ କରୁଥିବା ପରିବାର ବର୍ଗଙ୍କୁ ଜଙ୍ଗଲ ଜମି ଅଧିକାର ଆଇନ ମାଧ୍ୟମରେ ସରକାର ଜଙ୍ଗଲ ଜମି ପଟ୍ଟା ପ୍ରଦାନ କରି ସମ୍ପୂର୍ଣ୍ଣ ଅଧିକାର ଦେଉଥିବା ବେଳେ ସେପଟେ ଗ୍ରାମବାସୀଙ୍କ ଅଜାଣତରେ ମାଇନିଙ୍ଗ୍କୁ ଜଙ୍ଗଲ ଜମି ତଥା ପାହାଡ଼ ପ୍ରଦାନ କରିବା କି ଉଦ୍ଦେଶ୍ୟ ରହିଛି । ଏହିପରି କିଛି ପ୍ରଶ୍ନ ଉଠାଇ କୋରାପୁଟ ଜିଲା ପଟ୍ଟାଙ୍ଗି ବ୍ଲକର ଅମ୍ପାବାଲି ପଞ୍ଚାୟତ ଗ୍ରାମବାସୀ ଯଥା ସୋରଡା , ମିର୍ତ୍ତିଗୁଡା , ବୋଡାପାଡୁ ଓ ଝାଙ୍ଗରଗୁଡା ପ୍ରମୁଖ ଗ୍ରାମର ଗ୍ରାମବାସୀ ଏକତ୍ରିତ ହୋଇ ଉଦ୍ଦେଶ୍ୟ ମୂଳକ କାର୍ଯ୍ୟକୁ ନା ପସନ୍ଦ କରିବା ସହ ବିରୋଧ କରି ସ୍ଥାନୀୟ ତହସିଲଦାରଙ୍କ ଉଦ୍ଦେଶ୍ୟରେ ଗ୍ରାମକୁ ଯାଇଥିବା ଜଙ୍ଗଲ ବିଭାଗ କର୍ମଚାରୀଙ୍କୁ ଲିଖିତ ଦାବିପତ୍ର ପ୍ରଦାନ କରିଛନ୍ତି ।
ସୂଚନା ଅନୁଯାଇ ଉକ୍ତ ୪ ଗ୍ରାମକୁ ଲାଗି ରହିଥିବା ଏରସେଲମା ଓ ଜେଟା ଡଙ୍ଗର ଯଥା ଦୁଇଟି ପାହାଡ଼ ଉପରେ ଉପରୋକ୍ତ ଗ୍ରାମବାସୀ ନିର୍ଭର କରି ଆସୁଥିବା ସହ ସରକାରୀ ସ୍ତରରେ ପାଇଥିବା ଜଙ୍ଗଲ ଜମି ପଟ୍ଟା ଉପରେ ନିର୍ଭର କରି ଚାଷ କରି ନିଜ ପରିବାର ଗୁଜୁରାଣ ମେଣ୍ଟାଇଥାନ୍ତି କିନ୍ତୁ ଉପରୋକ୍ତ ସମସ୍ତ ଗ୍ରାମବାସୀଙ୍କୁ ନ ଜଣାଇ ଓ କୈଣସି ଗ୍ରାମସଭା ନ କରି ଉକ୍ତ ଦୁଇଟି ପାହାଡ଼ର ୫୭ ହେକ୍ଟର ଜମିକୁ ଓଏମସି କମ୍ପାନୀକୁ ହସ୍ତାନ୍ତର କରି ତରବରିଆ ଭାବେ ସୋମବାର ଜଙ୍ଗଲ ବିଭାଗ କର୍ମଚାରୀ ଦୁଇ ପାହାଡ଼ରେ ପହଞ୍ଚି ସୀମା ନିର୍ଦ୍ଧାରଣ ଖୁଣ୍ଟ ପୋତି ଗଛ ଲଗାଇବା ପାଇଁ କରିଥିବା ଯୋଜନାକୁ ଗ୍ରାମବାସୀ ବିରୋଧ କରି ଏହା କାହା ନିର୍ଦ୍ଦେଶରେ କରା ଯାଉଛି ପ୍ରଶ୍ନ କରି ଯେପର୍ଯ୍ୟନ୍ତ ଆମେ ଗ୍ରାମବାସୀ କିଛି ଜାଣିନାହୁଁ ସେପର୍ଯ୍ୟନ୍ତ ଏଠି କୌଣସି କାମ ହୋଇ ପାରିବ ନାହିଁ ବୋଲି ଯାଇଥିବା ଜଙ୍ଗଲ ବିଭାଗ କର୍ମଚାରୀଙ୍କୁ ରୋକ୍ ଠୋକ୍ ଶୁଣାଇ ପଟ୍ଟାଙ୍ଗି ତହସିଲଦାରଙ୍କ ଉଦ୍ଦେଶ୍ୟରେ ଏକ ଲିଖିତ ଦାବିପତ୍ର ପ୍ରଦାନ କରିଥିଲେ ।
ଏହିପରି କି ଉପରୋକ୍ତ ଦୁଇ ପାହାଡ଼ ଉପରେ ମିର୍ତ୍ତିଗୁଡା ଓ ଝାଙ୍ଗରଗୁଡା ଦୁଇ ଗ୍ରାମବାସୀଙ୍କୁ ଜଙ୍ଗଲ ଜମି ପଟ୍ଟା ପ୍ରଦାନ କରା ଯାଇଥିବା ବେଳେ ପୁଣି ଉକ୍ତ ପାହାଡ଼କୁ କମ୍ପାନୀକୁ ପ୍ରଦାନ କରି ଜଙ୍ଗଲ ବିଭାଗ ପକ୍ଷରୁ ଗଛ ଲଗାଯିବା କାର୍ଯ୍ୟକୁ ନେଇ ଗ୍ରାମବାସୀ ଅସନ୍ତୋଷ ପ୍ରକାଶ କରି ଗ୍ରାମବାସୀଙ୍କୁ ଏଥିରେ ଅଣଦେଖା କରି କୌଣସି ପଦକ୍ଷେପ ଗ୍ରହଣ କରାଯାଏ ତାହେଲେ ଆସନ୍ତା ଦିନରେ ଏହାକୁ ଦୃଢ଼ ବିରୋଧ କରାଯିବା ସହ ଆନ୍ଦୋଳନ କରିବାକୁ ପଛାଇବୁ ନାହିଁ ବୋଲି କଡ଼ା ଚେତାବନୀ ଦେଇଛନ୍ତି । ଏନେଇ ତହସିଲଦାର ଦେବେନ୍ଦ୍ର ବାହାଦୂର ସିଂ ଧାରୁଆଙ୍କୁ ଯୋଗାଯୋଗ କରାଯିବାରୁ ଛୁଟି ପରେ ଉକ୍ତ ପାହାଡ଼ର ଜମିକୁ ନେଇ ଡିମାର୍କେଶନ କରାଯାଇ ସମସ୍ୟାର ସମାଧାନ କରାଯିବ ବୋଲି ପ୍ରକାଶ କରିଥିଲେ ।
