ପାଟଣା,୪।୬(ବୀର କିଶୋର ଦାଶ ): କେନ୍ଦୁଝର ଜିଲା ପାଟଣା ଥାନା ବେଗନା ଗାଁରେ ଭୋଟର କାର୍ଡ ଠିକଣା ସଂଶୋଧନକୁ ନେଇ ଗୁରୁବାର ତିବ୍ର ଉତ୍ତେଜନା ଦେଖାଦେଇଛି । ଏସ୍ଆଇଆର୍ କାର୍ଯ୍ୟରେ ଯାଇଥିବା ବିଏଲ୍ଓ ସଦାଶିବ ସେଠୀଙ୍କୁ ଗ୍ରାମବାସୀମାନେ ଅଟକ ରଖିବା ସହ ଠେଲାପେଲା କରିଥିବା ଅଭିଯୋଗ ହୋଇଛି ।
ବେଗନା ଗ୍ରାମର ୩ଶହରୁ ଉର୍ଦ୍ଧ୍ବ ଲୋକଙ୍କ ନାମ ସରସ୍ଵତୀ ପଡା ଗାଁର ଭୋଟର ତାଲିକାରେ ରହିଛି । ଏହାକୁ ନେଇ ଗ୍ରାମବାସୀମାନେ ତୀବ୍ର ଆପତ୍ତି ଜଣାଇଥିଲେ ଏବଂ ତୁରନ୍ତ ଠିକଣା ସଂଶୋଧନ ଦାବି କରି ବିଏଲ୍ଓ ସଦାଶିବ ସେଠୀଙ୍କୁ ଗ୍ରାମବାସୀମାନେ ଅଟକ ରଖିବା ସହ ଠେଲାପେଲା କରିଥିଲେ । ଘଟଣା ସ୍ଥଳରେ ସାହାରପଡା ତହସିଲଦାରଙ୍କ ସହ ପାଟଣା ପୋଲିସ ପହଞ୍ଚି ବିଏଲଓ ଙ୍କୁ ଉଦ୍ଧାର କରି ଘଟଣା ତଦନ୍ତ କରିବା ସହ ଲୋକଙ୍କୁ ବୁଝାସୁଝା କରୁଛନ୍ତି ।
