ଦଶମନ୍ତପୁର,୧୮ା୪( ଡି.ଏନ.ଏ. ): ପାନୀୟ ଜଳ ସମସ୍ୟା ନେଇ ବାରମ୍ବାର ପ୍ରଶାସନକୁ ଜଣାଇଥିଲେ ମଧ୍ୟ ଏଥିପ୍ରତି ପ୍ରଶାସନ ଗୁରୁତ୍ୱ ଦେଲାନାହିଁ। ଜନ ପ୍ରତିନିଧିଙ୍କୁ କହି କିଛି ସୁଫଳ ମିଳିଲାନି। ଶେଷରେ ନିଜ ପାଇଁ ନିଜେ ଅଣ୍ଟା ଭିଡିଲେ ଗ୍ରାମବାସୀ। ଗ୍ରାମରେ ଚାନ୍ଦା ଆଦାୟ କରି ଶ୍ରମଦାନ କରି କୂଅ ଖୋଲିଲେ। ସୋମବାର ସାମାଜିକ କର୍ମୀ ଶଙ୍କର ସାଉନ୍ତାଙ୍କୁ ଅତିଥି ରୂପେ ନିମନ୍ତ୍ରଣ କରି କୁଅ ଉଦ୍ଘାଟନ କରିଛନ୍ତି। ଏପରି ଦେଖିବାକୁ ମିଳିଛି କୋରାପୁଟ ଜିଲା ଦଶମନ୍ତପୁର ବ୍ଲକ ଅନ୍ତର୍ଗତ ମୁଜାଙ୍ଗ ପଞ୍ଚାୟତର ବାଉଁଶଗୁଡା ଗ୍ରାମରେ। ବାଉଁଶଗୁଡା ଗ୍ରାମ ୮୦ ପରିବାର ବସବାସ କରନ୍ତି। ଜନସଂଖ୍ୟା ପାଖାପାଖି ୬୦୦ ରହିଛି। ଦୀର୍ଘ ବର୍ଷ ତଳେ ଗ୍ରାମରେ ଦୁଇଟି ନଳକୂପ ଖନନ ହୋଇଥିଲା। ଖୋଳା ହେବା ଦିନଠାରୁ ଗୋଟିଏ ନଳକୂଅରୁ ପାଣି ବାହାରିନାହିଁ। ଅନ୍ୟ ଏକ ନଳକୂଅରେ ଗୋଳିଆ ପାଣି ବାହାରୁଛି। ଫଳରେ ପାନୀୟ ଜଳ ପାଇଁ ଗ୍ରାମବାସୀ ଅସୁବିଧାର ସମ୍ମୁଖୀନ ହେଉଥିଲେ। ଗ୍ରାମ ନିକଟସ୍ଥ ନଦୀ କୂଳରେ ଚୁଆ କରି ପାଣି ଆଣି ଚଳୁଥିଲେ। ଏହି ପାଣି ବ୍ୟବହାର କରି ବିଭିନ୍ନ ରୋଗର ଶିକାର ହେଉଥିଲେ। ଏହି ସମସ୍ୟା ନେଇ ପଞ୍ଚାୟତଠାରୁ ଆରମ୍ଭ କରି ବ୍ଲକ ପ୍ରଶାସନକୁ ବହୁବାର ଗ୍ରାମବାସୀ ଜଣାଇଛନ୍ତି। ପଲ୍ଲିସଭା ଓ ଗ୍ରାମସଭାରେ ମଧ୍ୟ ପ୍ରସ୍ତାବ ଗୃହୀତ କରାଇ ପ୍ରଶାସନକୁ ଏନେଇ ଅବଗତ କରାଇଛନ୍ତି। ଏନେଇ କୌଣସି ସୁଫଳ ନ ମିଳବାରୁ ଶେଷରେ ଗ୍ରାମବାସୀ ଗ୍ରାମରେ ଏକ ବୈଠକ କରି ଗ୍ରାମରେ କୂଅ ଖନନ କରିବାକୁ ନିଷ୍ପତ୍ତି ନେଇଥିଲେ ବୋଲି ୱର୍ଡସଭ୍ୟ ଲବ ଗୌଡ, ରଘୁନାଥ ଗୌଡ, ସଦନ ନାୟକ, ଧନ ହନ୍ତାଳ, ପଦ୍ମା ଗୌଡ, ନୟନା ଗୌଡ ପ୍ରମୁଖ କହିଛନ୍ତି। ତୁରନ୍ତ ଜିଲା ପ୍ରଶାସନ ଦୃଷ୍ଟି ଦେଇ ଦଶମନ୍ତପୁର ବ୍ଲକର ବିଭିନ୍ନ ଗ୍ରାମାଞ୍ଚଳର ପାନୀୟ ଜଳ ସମସ୍ୟା ଦୂର କରିବାକୁ ଗ୍ରାମବାସୀ ଦାବି କରିଛନ୍ତି।
