ବୁଗୁଡ଼ା,୧୯ା୨: ଗଞ୍ଜାମ ଜିଲା ଭଞ୍ଜନଗର ଉଦ୍ୟାନ ବିଭାଗ କାର୍ଯ୍ୟାଳୟର ବୁଗୁଡ଼ା ଦାୟିତ୍ୱରେ ଥିବା ଓଭରସିୟର ଶୁକ୍ରବାର ଲାଞ୍ଚ ନେଇ ଗିରଫ ହୋଇଛନ୍ତି। ସେ ହେଲେ ଉମା ଶଙ୍କର ବେହେରା। ବୁଗୁଡ଼ା ଥାନା ଅନ୍ତର୍ଗତ କରଚୁଲିଠାରେ ଚାଷୀ ପୂର୍ଣ୍ଣଚନ୍ଦ୍ର ପାତ୍ରଙ୍କଠାରୁ ଉମାଶଙ୍କର ୨୬ ହଜାର ଟଙ୍କା ନେଉଥିବା ବେଳେ ଭିଜିଲାନ୍ସ କର୍ମଚାରୀ ତାଙ୍କୁ କାବୁ କରିଛନ୍ତି। ଏ ନେଇ ନଂ. ୨/୨୧ରେ ଏକ ମାମଲା ରୁଜୁ ହୋଇଥିବା ବ୍ରହ୍ମପୁର ଭିଜିଲାନ୍ସ ଡିଏସ୍ପି ଅରୁଣ କୁମାର ନାୟକ ସୂଚନା ଦେଇଛନ୍ତି। ଭଞ୍ଜନଗର ଲଣ୍ଡେଇସାହିରେ ଥିବା ଉମାଶଙ୍କରଙ୍କ ବାସଭବନରେ ଭିଜିଲାନ୍ସର ଏକ ଟିମ୍ ଚଢ଼ାଉ କରିଛି।
ଗତ ଅକ୍ଟୋବର ମାସରେ କରଚୁଲିରେ ପରିବା ଚାଷରେ ଲତା ବାଡ଼ କରିବା ପାଇଁ ଓଭରସିୟର ଉମାଶଙ୍କର ୧୩ ଚାଷୀଙ୍କୁ ୧୨,୫୦୦ ଟଙ୍କା ଲେଖାଏ କାର୍ଯ୍ୟାଦେଶ ଦେଇଥିଲେ। ବାଡ଼ କାମ ସରିବା ପରେ ଉମାଶଙ୍କର ୧୦ ଜଣଙ୍କୁ ବିଲ୍ ବାବଦ ଅର୍ଥ ଦେଇଥିବା ବେଳେ ୩ ଜଣଙ୍କ ବିଲ୍ କରି ନ ଥିଲେ। ଏହି ୩ ଜଣଙ୍କ ବିଲ୍ ପାସ କରିବାକୁ ସେ ପୂର୍ଣ୍ଣଚନ୍ଦ୍ରଙ୍କୁ ୧୩ ଚାଷୀଙ୍କଠାରୁ ୨୦୦୦ ଟଙ୍କା ଲେଖାଏ ଆଦାୟ କରି ୨୬ ହଜାର ଟଙ୍କା ଲାଞ୍ଚ ଦେବାକୁ କହିଥିଲେ। ଏଥିରେ ଚାଷୀମାନେ ରାଜି ହୋଇ ନ ଥିଲେ। ପୂର୍ଣ୍ଣଚନ୍ଦ୍ର ଏ ସମ୍ପର୍କରେ ବ୍ରହ୍ମପୁର ଭିଜିଲାନ୍ସ କାର୍ଯ୍ୟାଳୟରେ ଅଭିଯୋଗ କରିଥିଲେ। ଶୁକ୍ରବାର ପୂର୍ବାହ୍ନରେ ଭିଜିଲାନ୍ସ ଡିଏସ୍ପି ନାୟକଙ୍କ ନେତୃତ୍ୱରେ ଇନ୍ସପେକ୍ଟର ରାଜେନ୍ଦ୍ର କୁମାର ନାୟକ ଓ ଶରତ ଚନ୍ଦ୍ର ସାହୁ ପ୍ରମୁଖଙ୍କ ସମେତ ବ୍ରହ୍ମପୁର ପୂର୍ତ୍ତ ବିଭାଗ ସହକାରୀ ଯନ୍ତ୍ରୀ ପ୍ରଭାକର ସେଠୀ ଓ କିରାଣି ସୂର୍ଯ୍ୟନାରାୟଣ ପଣ୍ଡା କରଚୁଲିରେ ପୂର୍ଣ୍ଣଚନ୍ଦ୍ରଙ୍କ ଫାର୍ମ ହାଉସକୁ ଆସିଥିଲେ। ସେମାନେ ଯୋଜନା ପ୍ରକାରେ ମୂଲିଆ ବେଶ ହୋଇ ମାଟି ଖୋଳା ଓ ଫାର୍ମହାଉସରେ ରଙ୍ଗ ଦେବା କାମ କରିବା ଅଭିନୟ କରିଥିଲେ। ଏହି ସମୟରେ ଓଭରସିୟର ଉମାଶଙ୍କର ସେଠାକୁ ଆସି ପୂର୍ଣ୍ଣଚନ୍ଦ୍ରଙ୍କଠାରୁ ୨୬ ହଜାର ଟଙ୍କା ନେବା ବେଳେ ଭିଜିଲାନ୍ସ ଟିମ୍ ତାଙ୍କୁ କାବୁ କରିଥିଲେ।
