ଜଗତ୍ସିଂହପୁର ଅଫିସ, ୨ା୧୨-ଭିଜିଲାନ୍ସ ଜାଲରେ ପଡ଼ିଛନ୍ତି ଜଗତ୍ସିଂହପୁର ଜିଲା ଗ୍ରାମପଞ୍ଚାୟତ କାର୍ଯ୍ୟାଳୟ (ଜିପିଓ) ସେକ୍ସନ୍ ଅଫିସର ସଞ୍ଜୁକ୍ତା ଦାସ। ଭିଜିଲାନ୍ସ ଟିମ୍ ବୁଧବାର ତାଙ୍କ ଜଗତ୍ସିଂହପୁର ସାତପୁରାସ୍ଥିତ ପୈତୃକ ବାସଭବନ ସମେତ ସ୍ଥାନୀୟ ପାଣିଶାଳିଆସ୍ଥିତ ଘର, କଟକ ମହାନଦୀ ବିହାରସ୍ଥିତ ଫ୍ଲାଟ୍ ଓ ଜିପିଓରେ ଏକକାଳୀନ ଚଢ଼ାଉ କରିଛି। ଏହି ସମୟରେ ୧ କୋଟି ୪୨ ଲକ୍ଷ ୮ ହଜାର ୮୭୦ ଟଙ୍କାର ସମ୍ପତ୍ତି ଠାବ କରାଯାଇଛି ବୋଲି କଟକ ଭିଜିଲାନ୍ସ ପକ୍ଷରୁ ସୂଚନା ଦିଆଯାଇଛି । କଟକ ଜିଲା ଭିଜିଲାନ୍ସ ସ୍ବତନ୍ତ୍ର ବିଚାରପତିଙ୍କ ୱାରେଣ୍ଟ ବଳରେ ବିଭାଗୀୟ ଏସ୍ପିଙ୍କ ନିର୍ଦ୍ଦେଶକ୍ରମେ ଜଗତ୍ସିଂହପୁର ଜିଲାର ୪ଟି ସ୍ଥାନରେ ସକାଳୁ ଚଢ଼ାଉ ଆରମ୍ଭ ହୋଇଥିଲା । ଏଥିରେ ୩୦ ଜଣିଆ ଅଧିକାରୀ ଓ କର୍ମଚାରୀ ନିୟୋଜିତ ଥିଲେ। ରାତି ୭ଟା ସୁଦ୍ଧା ମିଳିଥିବା ତଥ୍ୟ ଅନୁଯାୟୀ, ଦାସଙ୍କ ସାତପୁରାସ୍ଥିତ ତ୍ରିତଳ ବିଶିଷ୍ଟ ପୈତୃକ ଘରର ମୂଲ୍ୟ ୩୭,୬୪,୭୮୭ ଟଙ୍କା ଥିବା ଜଣାଯାଇଛି ।
