ନୂଆଦିଲ୍ଲୀ,୧୯ା୮: ଦେଶବ୍ୟାପୀ ବିଶ୍ୱବିଦ୍ୟାଳୟଗୁଡ଼ିକରେ ଆସନ୍ତା ସେପ୍ଟେମ୍ବର ୩୦ସୁଦ୍ଧା ଚୂଡ଼ାନ୍ତ ବର୍ଷର ପରୀକ୍ଷା କରିବା ପାଇଁ ବିଶ୍ୱବିଦ୍ୟାଳୟ ଅନୁଦାନ ଆୟୋଗ(ୟୁଜିସି)ର ନିର୍ଦ୍ଦେଶକୁ ଚ୍ୟାଲେଞ୍ଜ କରି ସର୍ବୋଚ୍ଚ ଅଦାଲତରେ କରାଯାଇଥିବା ଏକାଧିକ ଆବେଦନର ଶୁଣାଣି କରି ରାୟକୁ ମଙ୍ଗଳବାର କୋର୍ଟ ସ୍ଥଗିତ ରଖିଛନ୍ତି। ବିଚାରପତି ଅଶୋକ ଭୂଷଣ, ଆର୍. ସୁବାସ ରେଡ୍ଡୀ ଏବଂ ଏମ୍. ଆର୍. ଶାହଙ୍କୁ ନେଇ ଗଠିତ ଖଣ୍ଡପୀଠ ଏହି ମାମଲାର ସମସ୍ତ ପକ୍ଷଙ୍କୁ ଆସନ୍ତା ୩ଦିନ ମଧ୍ୟରେ ଲିଖିତ ଜବାବ ଦାଖଲ କରିବାକୁ ନିର୍ଦ୍ଦେଶ ଦେଇଛନ୍ତି।
ଓଡ଼ିଶା ସରକାରଙ୍କ ପକ୍ଷରୁ ୟୁଜିସି ନିର୍ଦ୍ଦେଶନାମାକୁ ବିରୋଧ କରାଯାଇ ସୁପ୍ରିମ୍କୋର୍ଟରେ ମାମଲା ରୁଜୁ କରାଯାଇଛି। ରାଜ୍ୟରେ ଏବେ କରୋନା ଉଦ୍ବେଗଜନକ ସ୍ଥିତିରେ ରହିଛି। ଏଭଳି ଅବସ୍ଥାରେ ୟୁଜିସି ଦ୍ୱାରା ଦିଆଯାଇଥିବା ନିର୍ଦ୍ଦେଶନାମା ଅନୁସାରେ ପରୀକ୍ଷା କରିବା ସମ୍ଭବ ହେବ ନାହିଁ ବୋଲି ଆଡ୍ଭୋକେଟ ଜେନେରାଲ ଅଶୋକ ପରିଜା ନିଜର ମତ ରଖିଛନ୍ତି। ବର୍ତ୍ତମାନ ସ୍ଥିତିରେ କଲେଜଗୁଡ଼ିକ ବନ୍ଦ ରହିଛି। ଛାତ୍ରୀଛାତ୍ରମାନେ ସେମାନଙ୍କ ନିଜ ଗ୍ରାମକୁ ଫେରି ଯାଇଛନ୍ତି। ରାଜ୍ୟର ଅନେକ ସ୍ଥାନରେ ପିଲାମାନେ ଇଣ୍ଟରନେଟ ସୁବିଧା ପାଇପାରୁ ନାହାନ୍ତି। ଏପରି କି ହଷ୍ଟେଲଗୁଡ଼ିକ ବନ୍ଦ ଥିବା କାରଣରୁ ପିଲାମାନେ କଲେଜକୁ ମଧ୍ୟ ଫେରିପାରୁ ନାହାନ୍ତି। ୟୁଜିସି ଦେଇଥିବା ନିର୍ଦ୍ଦେଶନାମା ସ୍ବାଭାବିକ ସ୍ଥିତି ପାଇଁ ଠିକ୍ ଅଛି, ହେଲେ କରୋନା ଭଳି ସ୍ଥିତିରେ ପରୀକ୍ଷା କରିବା ସମ୍ଭବ ନୁହେଁ ବୋଲି ପରିଜା କହିଛନ୍ତି।
ଯଦି ୟୁଜିସି ସ୍ବଚ୍ଛତାରେ ପରୀକ୍ଷା କରିବାକୁ ଚାହୁଁଛନ୍ତି, ତେବେ ସେହି ଅନୁସାରେ ଗାଇଡ୍ଲାଇନ ପ୍ରସ୍ତୁତ କରିବା ଆବଶ୍ୟକ ବୋଲି ପରିଜା କହିଛନ୍ତି। ଅପରପକ୍ଷରେ ୟୁଜିସି ପରୀକ୍ଷା ତାରିଖକୁ ଘୁଞ୍ଚାଇ ପାରିବେ କିନ୍ତୁ ବିନା ପରୀକ୍ଷାରେ କାହାକୁ ଡିଗ୍ରୀ ସାର୍ଟିଫିକେଟ ଦେଇପାରିବେ ନାହିଁ ବୋଲି ସଲିସିଟର ଜେନେରାଲ୍ ତୁଷାର ମେହେଟ୍ଟା କହିଛନ୍ତି। ପ୍ରକାଶ ଯେ, ଗତ ଜୁଲାଇ ୬ରେ ୟୁଜିସି ଦେଶର ୯୦୦ ବିଶ୍ୱବିଦ୍ୟାଳୟକୁ ସେପ୍ଟେମ୍ବର ୩୦ସୁଦ୍ଧା ଚୂଡ଼ାନ୍ତ ବର୍ଷ ପରୀକ୍ଷାକୁ ଅନ୍ଲାଇନ୍ କିମ୍ବା ଅଫ୍ଲାଇନରେ କରିବାକୁ ନିର୍ଦ୍ଦେଶ ଦେଇଥିଲେ। ହେଲେ ଏହି ନିର୍ଦ୍ଦେଶନାମାକୁ ଓଡ଼ିଶା, ପଶ୍ଚିମବଙ୍ଗ, ମହାରାଷ୍ଟ୍ର ଏବଂ ଦିଲ୍ଲୀ ସରକାର ବିରୋଧ କରିବା ସୟ ସୁପ୍ରିମକୋର୍ଟଙ୍କ ଦ୍ୱାରସ୍ଥ ହୋଇଛନ୍ତି।
