ରସୁଲପୁର, ୨୪।୭ (ଡି.ଏନ.ଏ.): ରସୁଲପୁର ବ୍ଲକ ଅଞ୍ଚଳର ଅଧିକାଂଶ ଲୋକ ଚାଷ କରି ପରିବାର ପ୍ରତିପୋଷଣ କରିଥାନ୍ତି। ସବୁ ଋତୁରେ ବିଭିନ୍ନ ପନିପରିବା ଚାଷ କରୁଥିବା ବ୍ଲକ ଅଞ୍ଚଳର ଚାଷୀମାନେ କରୋନା ଯୋଗୁ ବହୁ କ୍ଷତି ସହିଲେଣି। ଶଟ୍ଡାଉନ୍, ଲକ୍ଡାଉନ୍ ଯୋଗୁ ହାଟ ବଜାର ବନ୍ଦ ଯୋଗୁ ଉତ୍ପାଦିତ ଫସଲ ବିକ୍ରି ହୋଇପାରୁନି। ବିଲରୁ ଫସଲ ଅମଳ କରି ଚାଷୀମାନେ ଘରକୁ ଆଣୁଥିବା ବେଳେ କିଣିବା ପାଇଁ ବ୍ୟବସାୟୀ ଆସିପାରୁ ନାହାନ୍ତି। ସପ୍ତାହାନ୍ତ ସଟ୍ଡାଉନ୍ ଓ ତା’ ସାଙ୍ଗକୁ ୧୪ ଦିନିଆ ଲକ୍ଡାଉନ୍ କଟକଣା ଯୋଗୁ ଚାଷୀମାନେ କ୍ଷତିଗ୍ରସ୍ତ ହେଉଥିବା କହିଛନ୍ତି। ଅଧିକାଂଶ ବ୍ୟବସାୟୀଙ୍କ ପାଖରେ ପାସ୍ ନ ଥିବାରୁ ସେମାନେ ପରିବା କିଣିବାକୁ ଆସିପାରୁ ନାହାନ୍ତି। ଫଳରେ ଟନ୍ ଟନ୍ ପରିବା ଚାଷୀଙ୍କ ଘର ଆଗରେ ଗଦା ହୋଇ ପଡ଼ିରହୁଥିବା ଦେଖାଯାଇଛି। କାଁ ଭାଁ ବ୍ୟବସାୟୀ ଚାଷୀଙ୍କ ଘରକୁ ଆସୁଥିବାରୁ ସେମାନେ ବାଧ୍ୟ ହୋଇ ସାଗ ମାଛ ଦରରେ ପନିପରିବା ବିକ୍ରି କରିଦେଉଛନ୍ତି। ଅନ୍ୟପଟେ ଅତିକମ୍ ଦରରେ ପରିବା ବିକ୍ରି କରିବାକୁ ପଡୁଥିବାରୁ କେତେଜଣ ବ୍ୟବସାୟୀ ବିଲରୁ ଫସଲ ତୋଳୁ ନାହାନ୍ତି। ସେଗୁଡ଼ିକ କ୍ଷେତରେ ପଚି ନଷ୍ଟ ହେଉଛି ବୋଲି ଅଗ୍ରଣୀ ପରିବା ଚାଷୀ ପ୍ରଦୀପ୍ତ ନାୟକ ଅଭିଯୋଗ କରିଛନ୍ତି।
ବ୍ଲକ ଅଧୀନ ଯାବରା, ନଠୁଆବର, ଶ୍ରୀବନ୍ତପୁର, ସିଂହାପରୁ, ଓଡ଼ିଶୋ, ବାରବାଟୀ, ବଡ଼କଇଁଚି, ଭୋଟକା, ରସୁଲପୁର, ରାହାମ୍ବା ପ୍ରଭୃତି ପଞ୍ଚାୟତର ଶତାଧିକ ହେକ୍ଟର ଜମିରେ ଭେଣ୍ଡି, ଜହ୍ନି, କଲରା, କାକୁଡି, ଛଛିନ୍ଦ୍ରା, ଝୁଡ଼ଙ୍ଗ ଆଦି ଚାଷ କରିଛନ୍ତି। ଏହି ଅଞ୍ଚଳର ଚାଷୀମାନେ ପରିବା ବିକ୍ରି ପାଇଁ ବାରବାଟୀ ଦୈନିକ ପରିବା ହାଟ, କୁଆଖିଆ ବଜାର ପରିବାହାଟ ଓ ବ୍ଲକ ଅଂଚଳରେ ଥିବା ସାପ୍ତାହିକ ହାଟ ଉପରେ ନିର୍ଭର କରିଥାନ୍ତି। ହେଲେ ଗତ ୧୬ ତାରିଖରୁ ଆସନ୍ତା ୩୧ ତାରିଖ ପର୍ଯ୍ୟନ୍ତ ଜିଲାରେ ଲକ୍ଡାଉନ୍ କରାଯାଇଥିବାରୁ ବ୍ୟବସାୟୀ ଓ ଖାଉଟିମାନେ ବଜାରକୁ ଆସୁନାହାନ୍ତି। ଏହାଛଡ଼ା ବାହାର ଜିଲା ଓ ରାଜ୍ୟକୁ ପରିବହନ ବନ୍ଦ ଥିବାରୁ ଉତ୍ପାଦିତ ଫସଲ ବିକ୍ରି ହୋଇ ନ ପାରି ଗାଁ ଦାଣ୍ଡରେ ଗଦା ହୋଇ ପଚୁଛି। ଚାଷୀମାନଙ୍କ ପାଇଁ ଉଦ୍ଦିଷ୍ଟ ସରକାରୀ ବ୍ୟବସ୍ଥା କାମ କରୁନି। କରୋନା ପାଇଁ ସରକାର ନେଉଥିବା ନିଷ୍ପତ୍ତି ସ୍ବାଗତ ଯୋଗ୍ୟ। ମାତ୍ର ଚାଷୀମାନଙ୍କୁ ଭୁଲିଯିବା ଅତ୍ୟନ୍ତ ଦୁର୍ଭାଗ୍ୟଜନକ। କରୋନା କଟକଣା ସମୟରେ ଚାଷୀମାନଙ୍କ ଉତ୍ପାଦିତ ଫସଲକୁ ସରକାର କ୍ରୟ କରନ୍ତୁ। ପ୍ରତ୍ୟେକ ପରିବାର ମୂଲ୍ୟ ସ୍ଥିର କରାଯାଇ ପଞ୍ଜୀକୃତ ବ୍ୟବସାୟୀଙ୍କ ଜରିଆରେ ଗାଁଗଣ୍ଡାରୁ ଚାଷୀମାନଙ୍କଠାରୁ ପରିବା କିଣିବାର ବ୍ୟବସ୍ଥା କରିବାକୁ ବ୍ଲକ ଅଞ୍ଚଳର ଚାଷୀମାନେ ଦାବି କରିଛନ୍ତି। ଏହାସହ ହାଟଗୁଡିକ ନିକଟରେ ଶୀତଳ ଭଣ୍ଡାର ସୁବିଧା ତୁରନ୍ତ ପ୍ରଦାନ କରିବାକୁ ଚାଷୀମାନେ କହିଛନ୍ତି। ଏ ଦିଗରେ ଉଭୟ କୃଷି ଓ ଉଦ୍ୟାନ କୃଷି ବିଭାଗ ଅଧିକାରୀଙ୍କ ସହ ଯୋଗାଯୋଗ କରିବାରୁ ଚାଷୀଙ୍କ ଦୁଃସ୍ଥିତି ସମ୍ପର୍କରେ ଅବଗତ ଅଛୁ। ମାତ୍ର ସରକାରୀ ନିର୍ଦ୍ଦେଶ ଅନୁସାରେ ସମସ୍ତ କାର୍ଯ୍ୟ କରାଯିବ ବୋଲି ନାମ ଗୋପନ ରଖିବା ସର୍ତ୍ତରେ ପ୍ରକାଶ କରିଛନ୍ତି।
