ଭୁବନେଶ୍ୱର, ୨୨।୧୨(କ୍ରୀଡ଼ା ପ୍ରତିନିଧି): ଡେରାଡୁନରେ ଚାଲିଥିବା ରଣଜୀ ଟ୍ରଫି କ୍ରିକେଟ ମ୍ୟାଚରେ ଓଡ଼ିଶା ବୋଲରଙ୍କ ପ୍ରଦର୍ଶନ ପ୍ରଭାବହୀନ ରହିଛି। ଅଧିନାୟକ ଜିଓ୍ବନଜୋତ ସିଂଙ୍କ ଅପରାଜିତ ଶତକ ସହାୟତାରେ ଉତ୍ତରାଖଣ୍ଡ ପ୍ରଥମ ଇନିଂସ ଅଗ୍ରଣୀଲାଭ କରିଛି। ଅଭିମନ୍ୟୁ କ୍ରିକେଟ ଏକାଡେମୀ ପଡ଼ିଆରେ ଚାଲିଥିବା ମ୍ୟାଚରେ ବୁଧବାର ଦ୍ୱିତୀୟ ଦିବସ ଶେଷ ବେଳକୁ ଉତ୍ତରାଖଣ୍ଡ ୩ ଉଇକେଟ ହରାଇ ୩୦୮ ରନ ସଂଗ୍ରହ କରିଛି। ଫଳରେ ଓଡ଼ିଶା ପ୍ରଥମ ଇନିଂସଠାରୁ ଏହି ଦଳ ୯୫ ରନରେ ଅଗ୍ରଣୀ ହୋଇଛି। ଓଡ଼ିଶା ପ୍ରଥମ ଇନିଂସରେ ମାତ୍ର ୨୧୩ ରନ କରିଥିଲା।
ଓଡ଼ିଶା ବୋଲର ପ୍ରଭାବହୀନ
ପ୍ରଥମ ଦିବସର ଅସମାପ୍ତ ସ୍କୋର ୪/୦ରୁ ଖେଳ ଆରମ୍ଭ କରିଥିବା ଉତ୍ତରାଖଣ୍ଡ ୨୧ ରନରେ ଓପନର ପ୍ରିୟାଂଶୁ ଖଣ୍ଡୁରୀଙ୍କ ଉଇକେଟ ହରାଇଥିଲା। ଉଇକେଟ କିପର ରାଜେଶ ଧୂପରଙ୍କ ହାତରେ କ୍ୟାଚ କରାଇ ପ୍ରିୟାଂଶୁ (୬ ରନ)ଙ୍କୁ ପ୍ୟାଭିଲିୟନ ପଠାଇଥିଲେ ସୂର୍ଯ୍ୟକାନ୍ତ ପ୍ରଧାନ। କୁନାଲ ଚାଣ୍ଡେଲା ରନଆଉଟ ହୋଇଥିବାବେଳେ ୬୦ତମ ଓଭରରେ ଦୀକ୍ଷାଂଶୁ ନେଗିଙ୍କ ଉଇକେଟ ନେଇଥିଲେ ଶୁଭମ୍ ନାୟକ। ଉଭୟ ଚାଣ୍ଡେଲା ଓ ନେଗି ୨୮ ରନ ଲେଖାଏ କରି ଆଉଟ ହେବାରୁ ୧୭୦ ରନରେ ଉତ୍ତରାଖଣ୍ଡର ୩ୟ ଉଇକେଟ ପଡ଼ିଥିଲା। ତେବେ ଅନ୍ୟତମ ଓପନର ଜିଓ୍ବନଜୋତ ଓ ମିଡିଲ ଅର୍ଡର ବ୍ୟାଟର ସ୍ବପ୍ନିଲ ସିଂ ଅସମାପ୍ତ ୪ର୍ଥ ଉଇକେଟରେ ୧୩୮ ରନର ଭାଗୀଦାରି ଗଢ଼ି ଦଳକୁ ଅଗ୍ରଣୀ କରାଇଥିଲେ। ମ୍ୟାଚ ଆହୁରି ୨ ଦିନ ବାକିଥିବାରୁ ଉତ୍ତରାଖଣ୍ଡ ଏକ ବଡ଼ ଇନିଂସ ଗଢ଼ିବା ସମ୍ଭାବନା ସୃଷ୍ଟି କରିଛି। ୩୦୬ ବଲ୍ର ସମ୍ମୁଖୀନ ହୋଇଥିବା ଜିଓ୍ବନଜୋତ ୨୮ ଚୌକା ସହାୟତାରେ ୧୭୪ ଏବଂ ସ୍ବପ୍ନିଲ ୯୧ ବଲ୍ରୁ ୬୦ ( ୩ ଚୌକା, ୩ ଛକା) ରନରେ ଅପରାଜିତ ରହିଛନ୍ତି। ଓଡ଼ିଶା ଅଧିନାୟକ ଶୁଭ୍ରାଂଶୁ ସେନାପତି ୭ ଜଣ ବୋଲରଙ୍କୁ ଲଗାଇଥିଲେ ହେଁ ଯୋଡ଼ି ଭାଙ୍ଗିପାରି ନ ଥିଲେ। ପ୍ରକାଶଯୋଗ୍ୟ ଯେ ସିଜନ ଆରମ୍ଭରେ ବରୋଦା ବିପକ୍ଷରେ ଓଡ଼ିଶା ଏହାର ପ୍ରଥମ ମ୍ୟାଚର ମଧ୍ୟ ପ୍ରଥମ ଇନିଂସରେ ପଛୁଆ ରହି ମ୍ୟାଚ ଡ୍ର ରଖିଥିଲା। ଏଠାରେ ଅନୁରୂପ ପରିସ୍ଥିତି ସୃଷ୍ଟି ହୋଇଛି। ଏପରି କି ଓଡ଼ିଶା ଦ୍ୱିତୀୟ ଇନିଂସରେ ସତର୍କତାର ସହ ବ୍ୟାଟିଂ ନ କଲେ ପରାଜୟର ମଧ୍ୟ ଆଶଙ୍କା ରହିବ।
ସଂକ୍ଷିପ୍ତ ସ୍କୋର
ଓଡ଼ିଶା ପ୍ରଥମ ଇନିଂସ: ୨୧୩। ଉତ୍ତରାଖଣ୍ଡ ପ୍ରଥମ ଇନିଂସ: ୩୦୮/୩ (ଜିଓ୍ବନଜୋତ ସିଂ-୧୭୪*, ସ୍ବପ୍ନିଲ ସିଂ-୬୦*, ସୂର୍ଯ୍ୟକାନ୍ତ ପ୍ରଧାନ-୧/୪୩, ଶୁଭମ୍ ନାୟକ-୧/୭୦)।
