ଡେରାଡୁନ,୨୮।୪: ଉତ୍ତରାଖଣ୍ଡ ସରକାର ଚାରିଧାମ ଯାତ୍ରା କରୁଥିବା ତୀର୍ଥଯାତ୍ରୀଙ୍କ ପାଇଁ ହିନ୍ଦୀ ଏବଂ ଇଂରାଜୀ ବ୍ୟତୀତ ଅନ୍ୟ ସାତୋଟି ଭାରତୀୟ ଭାଷାରେ ସ୍ବାସ୍ଥ୍ୟ ସମ୍ବନ୍ଧୀୟ ନିର୍ଦ୍ଦେଶାବଳୀ ଜାରି କରିଛନ୍ତି। ସ୍ବାସ୍ଥ୍ୟ ସଚିବ ଆର।ରାଜେଶ କୁମାର କହିଛନ୍ତି, ଆମେ ହିନ୍ଦୀ ଏବଂ ଇଂରାଜୀରେ ନିର୍ଦ୍ଦେଶାବଳୀ ଜାରି କରିସାରିଛୁ। ବର୍ତ୍ତମାନ ଆମେ ଏହାକୁ ଆହୁରି ସାତୋଟି ଭାଷାରେ ପ୍ରକାଶ କରିଛୁ। ଯାହା ଦ୍ୱାରା ବିଭିନ୍ନ ରାଜ୍ୟରୁ ଚାରିଧାମ ଯାତ୍ରା କରୁଥିବା ଭକ୍ତମାନେ ସହଜରେ ବୁଝିପାରିବେ ଏବଂ ସେମାନଙ୍କ ସୁରକ୍ଷା ପାଇଁ ସତର୍କତା ଅବଲମ୍ବନ କରିପାରିବେ।
ସେ କହିଛନ୍ତି, ହିନ୍ଦୀ ଏବଂ ଇଂରାଜୀ ବ୍ୟତୀତ ଗୁଜୁରାଟୀ, ପଞ୍ଜାବୀ, ବଙ୍ଗଳା, ମରାଠୀ, ତେଲୁଗୁ, କନ୍ନଡ, ଓଡ଼ିଆ ଏବଂ ତାମିଲରେ ନିର୍ଦ୍ଦେଶାବଳୀ ଜାରି କରାଯାଇଛି। ଗତ ବର୍ଷ ଚାରିଧାମ ଯାତ୍ରା ସମୟରେ ଅନେକ ଭକ୍ତଙ୍କର ହୃଦଘାତ ଏବଂ ଅନ୍ୟାନ୍ୟ ସ୍ବାସ୍ଥ୍ୟ କାରଣରୁ ମୃତ୍ୟୁ ଘଟିଥିଲା ଏବଂ ଏହାକୁ ଦୃଷ୍ଟିରେ ରଖି ରାଜ୍ୟ ସରକାର ଏହି ଯାତ୍ରା ଆରମ୍ଭ କରିବା ପୂର୍ବରୁ ଏହି ନିର୍ଦ୍ଦେଶନାମା ଜାରି କରିଛନ୍ତି। ଏହି ଗାଇଡଲାଇନରେ ଚାରିଧାମ ବଦ୍ରିନାଥ, କେଦାରନାଥ, ଗାଙ୍ଗୋତ୍ରୀ ଏବଂ ୟାମୁନୋତ୍ରିର ସମୁଦ୍ର ପତ୍ତନଠାରୁ ୨୭୦୦ ମିଟରରୁ ଅଧିକ ଉଚ୍ଚରେ ଅବସ୍ଥିତ ହେତୁ ଜଳବାୟୁ ଅନୁକୂଳକୁ ଦୃଷ୍ଟିରେ ରଖି ଅତି କମରେ ସାତ ଦିନର କାର୍ଯ୍ୟକ୍ରମ କରିବାକୁ ପରାମର୍ଶ ଦିଆଯାଇଛି। ଗାଇଡଲାଇନରେ ଦର୍ଶାଯାଇଛି, ତୀର୍ଥସ୍ଥାନଗୁଡିକର ଉଚ୍ଚତା ହେତୁ ତୀର୍ଥଯାତ୍ରୀମାନେ ଅତ୍ୟଧିକ ଥଣ୍ଡା, କମ ଆର୍ଦ୍ରତା, ଅତ୍ୟଧିକ ଅଲଟ୍ରା ବାଇଗଣୀ ରଶ୍ମୀ, ନିମ୍ନ ବାୟୁ ଚାପ, କମ ଅମ୍ଳଜାନ ପରିମାଣ ଦ୍ୱାରା ପ୍ରଭାବିତ ହୋଇପାରନ୍ତି, ତେଣୁ ସେମାନେ ଯାତ୍ରା ପୂର୍ବରୁ ଏବଂ ସମୟରେ ସଠିକ ସତର୍କତା ଅବଲମ୍ବନ କରିବା ଉଚିତ୍।
