ଲକ୍ଷ୍ନୌ,୫।୧: ଉତ୍ତର ପ୍ରଦେଶରୁ ଏକ ଆଶ୍ଚର୍ଯ୍ୟଜନକ ଖବର ସାମ୍ନାକୁ ଆସିଛି। ଜଣେ ସରକାରୀ କର୍ମଚାରୀ ତାଙ୍କ ମହିଳା ସହକର୍ମୀଙ୍କ ୧୬ ବର୍ଷୀୟା ଝିଅକୁ ବଳାତ୍କାର କରିଥିବା ଅଭିଯୋଗ ହୋଇଛି। ପୋଲିସ କହିଛି ଯେ ଉତ୍ତର ପ୍ରଦେଶର ହମିରପୁର ଜିଲାରେ ଜଳ ସଂସ୍ଥାନ (ଜଳ ସମ୍ପଦ ବିଭାଗ)ର ଜଣେ ଚତୁର୍ଥ ଶ୍ରେଣୀ କର୍ମଚାରୀଙ୍କୁ ଜଣେ ମହିଳା ସହକର୍ମୀଙ୍କ ଝିଅକୁ ବଳାତ୍କାର କରିବା ଅଭିଯୋଗରେ ଗିରଫ କରାଯାଇଛି। କର୍ମଚାରୀଙ୍କ ବିରୋଧରେ ଅଶ୍ଳୀଳ ଭିଡିଓ ଏବଂ ଫଟୋଗ୍ରାଫ ରେକର୍ଡିଂ କରିବା ଅଭିଯୋଗ ମଧ୍ୟ ରହିଛି।
ଅଭିଯୁକ୍ତ ଜଣଙ୍କ ହେଉଛନ୍ତି ଅବଦୁଲ ସଲାମ ଓରଫ ଆରିଫ । ସେ ମୌଧା ତହସିଲର ନାଇକପୁରୱା ଇଚୌଲାରେ ଥିବା ଜଳ ସଂସ୍ଥାନ ୟୁନିଟରେ ଚତୁର୍ଥ ଶ୍ରେଣୀ କର୍ମଚାରୀ। ପୀଡିତାଙ୍କ ମାଆଙ୍କ ଅଭିଯୋଗ ଉପରେ କାର୍ଯ୍ୟାନୁଷ୍ଠାନ ଗ୍ରହଣ କରି ପୋଲିସ ସଦର କୋଟୱାଲି ଥାନାରେ ବଳାତ୍କାର, ଯୌନ ଅପରାଧରୁ ଶିଶୁ ସୁରକ୍ଷା ଆଇନ ଏବଂ ସୂଚନା ପ୍ରଯୁକ୍ତିବିଦ୍ୟା ଆଇନ ସହିତ ଜଡିତ ଧାରା ଅନୁଯାୟୀ ଏକ ଏଫଆଇଆର ରୁଜୁ କରିଛି। ପୋଲିସ କହିଛି ଯେ ଅଭିଯୁକ୍ତ ନାବାଳିକାଙ୍କୁ ପ୍ରଲୋଭିତ କରିଥିଲା ଏବଂ ତାଙ୍କୁ ବହୁବାର ଯୌନ ନିର୍ଯାତନା ଦେଇଥିଲା। ସେ ରେକର୍ଡ ହୋଇଥିବା ଭିଡିଓ ଏବଂ ଫଟୋଗ୍ରାଫ ବ୍ୟବହାର କରି ଝିଅକୁ ଧମକ ଦେବା ଏବଂ ଯୌନ ନିର୍ଯାତନା ଜାରି ରଖିବାକୁ ଚାପ ପକାଉଥିଲେ ଅଭିଯୁକ୍ତ।
ପୀଡିତା ତାଙ୍କ ମାଆଙ୍କୁ ନିର୍ଯାତନା ବିଷୟରେ କହିବା ପରେ ମାମଲାଟି ସାମ୍ନାକୁ ଆସିଥିଲା। ଅଭିଯୋଗ ପରେ ପୋଲିସ ଏକ ଅଭିଯାନ ଆରମ୍ଭ କରି ଅଭିଯୁକ୍ତଙ୍କୁ ଗିରଫ କରିଥିଲା। କ୍ରାଇମ ଇନ୍ସପେକ୍ଟର ଡିକେ ମିଶ୍ର କହିଛନ୍ତି ଯେ ଅବଦୁଲ ସଲାମ ଓରଫ ଆରିଫକୁ କୋର୍ଟରେ ହାଜର କରାଯାଇ ନ୍ୟାୟିକ ହେପାଜତକୁ ପଠାଯାଇଛି। ସେ କହିଛନ୍ତି, “ପୀଡିତାଙ୍କ ଡାକ୍ତରୀ ପରୀକ୍ଷା କରାଯାଇଛି ଏବଂ କୋର୍ଟରେ ତାଙ୍କ ବୟାନ ରେକର୍ଡ କରାଯାଇଛି। ଅଧିକ ତଦନ୍ତ ଚାଲିଛି।”
