ଓ୍ବାଶିଂଟନ,୨୮।୮(ପି.ଟି.): ନ୍ୟୁୟର୍କକୁ ୩ ଦିନିଆ ଗସ୍ତରେ ଯାଇଥିବା ରାଷ୍ଟ୍ରୀୟ ସ୍ବୟଂସେବକ ସଂଘ (ଆର୍ଏସ୍ଏସ୍) ମୁଖ୍ୟ ମୋହନ ଭାଗବତଙ୍କ ଭିଜା ରଦ୍ଦ କରିବାକୁ ଆମେରିକାର ଅନ୍ତର୍ଜାତୀୟ ଧର୍ମୀୟ ସ୍ବାଧୀନତା କମିଶନ (ୟୁଏସ୍ସିଆଇଆର୍ଏଫ୍) ଡୋନାଲ୍ଡ ଟ୍ରମ୍ପ୍ ପ୍ରଶାସନ ନିକଟରେ ଦାବି କରିଛି । ଆମେରିକା କଂଗ୍ରେସ ଉକ୍ତ କମିଶନ ଗଠନ କରିଥିଲା। ଆସନ୍ତା ୨୯ରେ ମାଡିସନ ସ୍କୋୟାର ଗାର୍ଡେନ୍ର ଇନ୍ଫୋସିସ୍ ଥିଏଟରରେ ହେବାକୁ ଥିବା ବିଶ୍ୱ ଏକତା ଉତ୍ସବରେ ଭାଗବତଙ୍କର ଉଦ୍ବୋଧନ ଦେବା କାର୍ଯ୍ୟକ୍ରମ ରହିଛି । ଏହି କାର୍ଯ୍ୟକ୍ରମକୁ ଏକ ସର୍ବଧର୍ମ ସମାବେଶ ଭାବେ ଘୋଷଣା କରାଯାଇଛି, ଯେଉଁଠି ଆର୍ଏସ୍ଏସ୍ ମୁଖ୍ୟ ଏକ ବିବିଧତାପୂର୍ଣ୍ଣ, ବହୁ ସାଂସ୍କୃତିକ ଓ ବହୁ ଧର୍ମୀୟ ଶ୍ରୋତାମଣ୍ଡଳୀଙ୍କୁ ଉଦ୍ବୋଧନ ଦେବେ।
ତେବେ ଭାଗବତଙ୍କ ଆମେରିକା ଗସ୍ତକୁ ନେଇ ୟୁଏସ୍ସିଆଇଆର୍ଏଫ୍ ଅତ୍ୟନ୍ତ ଚିନ୍ତିତ ବୋଲି କହିଛି । ଏହାର ଅଭିଯୋଗ ହେଲା ଆର୍ଏସ୍ଏସ୍ର ଉପସଂଗଠନଗୁଡ଼ିକ ଧର୍ମୀୟ ସଂଖ୍ୟାଲଘୁଙ୍କ ବିରୋଧରେ ହିଂସାତ୍ମକ ଆକ୍ରମଣରେ ସମ୍ପୃକ୍ତ। ଧର୍ମୀୟ ସ୍ବାଧୀନତା ଉଲ୍ଲଂଘନରେ ସମ୍ପୃକ୍ତ ବ୍ୟକ୍ତିମାନଙ୍କ ବିରୋଧରେ ନିର୍ଦ୍ଦିଷ୍ଟ ପ୍ରତିବନ୍ଧକ ଲଗାଇବା ପାଇଁ ଉକ୍ତ ସଂଗଠନ ଆମେରିକା ସରକାରଙ୍କୁ ନିବେଦନ କରିଛି। ଭାଗବତଙ୍କୁ ଦିଆଯାଇଥିବା ଭିଜା ରଦ୍ଦ କରିବା ଦାବି ସେଥିରେ ରହିଛି।
ଅଭିଯୋଗକୁ ଭାରତ ଖଣ୍ଡନ କରିଛି। ୟୁଏସ୍ସିଆଇଆର୍ଏଫ୍ ଏକ ପକ୍ଷପାତପୂର୍ଣ୍ଣ ସଂଗଠନ ଏବଂ ଏହାର ବିଶ୍ୱସନୀୟତା ନ ଥିବା ଭାରତ କହିଛି। ୟୁଏସ୍ସିଆଇଆର୍ଏଫ୍ ଭାରତର ବହୁମୁଖୀ ବ୍ୟବସ୍ଥା ସହ ଜଡ଼ିତ ହେବ କିମ୍ବା ଏହାର ବିଭିନ୍ନ ସମ୍ପ୍ରଦାୟର ସୌହାର୍ଦ୍ଦ୍ୟପୂର୍ଣ୍ଣ ସହାବସ୍ଥାନକୁ ସ୍ବୀକାର କରିବା ଆମେ ଆଶା କରୁନାହୁଁ ବୋଲି ବହିର୍ବ୍ୟାପାର ମନ୍ତ୍ରଣାଳୟ ମୁଖପାତ୍ର ରଣଧୀର ଜୟସ୍ବାଲ କହିଛନ୍ତି।